Xəyal Bəşirov: “Vardanyanla bağlı həm Rusiyanın, həm Avropanın, həm də Ermənistan hakimiyyətinin əndişəsi onun maliyyə resursları, maddi imkanları ilə bağlıdır”
Azərbaycan məhkəməsində mühakimə olunan Ruben Vardanyan ətrafında həm Ermənistanda, həm də müəyyən ölkələrdə şoular düzəldilir. Bu prosesə Avropa İttifaqının (Aİ) bəzi təmsilçiləri də qoşulublar. Aİ-nin Ermənistandakı səfiri Vasilis Maraqos Vardanyanın müdafiəsinə girişib.
“...Avropa İttifaqı çox açıq şəkildə bildirib ki, biz ədalətli mühakimə gözləyirik və bu konkret işlə bağlı bütün hadisələri yaxından izləyirik”-deyə səfir bildirib.
Avropa strukturları Vardanyanın üstündə niyə belə “əsirlər”? Vardanyan bunlar üçün niyə belə “qiymətlidir”? Rusiya və Avropa təsisatları üçün Vardanyanın belə “qiymətli” olmasının səbəbi nədir?
Təbii ki, bu təsadüfi deyil və burda söhbət maddi maraqlardan gedir. Yeri gəlmişkən, diplomatik dairələrə yaxın mənbələrdən aldığımız məlumata görə, Vardanyanın Avropa banklarında bir neçə milyard pulu var. Burda söhbət həmin o pulun taleyindən gedir. Rusiya da o pulu əldə etmək üçün çalışır, Avropa da. Yoxsa burda söhbət Vardanyanın hansısa bir qiymət kəsb etməsindən getmir. Vardanyanın o pulunu Avropa da, Rusiya da ələ keçirmək istəyir. Ona görə də, Vardanyanın ətrafında bu oyunlar gedir. Elə İrəvanda da onun müdafiəsi ilə bağlı proseslərin kökündə onun Avropa banklarının birində olan milyadrlarla pulu dayanır. Yoxsa, buna başqa cür izah vermək olmur.
“Onlar bu milyardları əldə etməyə görə yarışa giriblər”
Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə şərhində bildirdi ki, R.Vardanyanla bağlı son zamanlar bəzi qüvvələlərin əndişəsini hiss edirik, görürük. “Təbii ki, burda söhbət Vardanyandan tutmuş o birilərin heç birinin taleyindən getmir, onları heç bu maraqlandırmır da. Araik Artunyunyanla, eləcə də cinayət əməlləri törətməkdə təqsirləndirilən digər şəxslərlə bağlı niyə narahatlıq yoxdur, amma Vardanyana görə narahat olurlar? Əslində, Vardanyanla bağlı həm Rusiyanın, həm Avropanın, həm də Ermənistan hakimiyyətinin əndişəsi onun maliyyə resursları, maddi imkanları ilə bağlıdır. Qarabağa da milyarder qismində gəlmişdi və öz maliyyə resurslarından istifadə edəcəyi ilə bağlı vədlər verirdi. Baxmayaraq ki, bu adam Azərbaycan ərazisinə daxil olduğu andan cinayətə yol verməyə başlamışdı. Amma hər bir halda onun pulları həmin o qüvvələri narahatlıq hiss etməyə vadar edib. Bilirik ki, Rusiyanın, Avropanın, Ermənistanın özü nəinki milyardlara, hətta on milyonlara, yüz molyonlara görə hansı addımlar atıb. Təbii ki, burda söhbət milyardlardan gedirsə onlar bu milyardaları əldə etməyə görə yarışa giriblər. Vardanyan milyarder kimi Qarabağ ərazisinə gələrkən, qanunsuz olaraq Azərbaycan ərazilərinə daxil olarkən, addımlar atarkən niyə həmin o qüvvələr narahatlıq keçirmirdilər? Sözsüz ki, bu sualın cavabı özü öz üzərindədir.
Araik Artunyunyana görə Avropa, Rusiya niyə narahat deyil, məhz Ermənistan tərəfi narahatdır? Ona görə ki, cinayətlərdə ittiham olunan Artunyunyan və digər şəxslər məhkəmədə Nikol Paşinyan hakimiyyətinin etdiyi qanunsuz, hüquqa zidd əməlləri ifşa edirlər. Araik Artunyunyanın törətdiyi o cinayətlərdə həm də Ermənistan hakimiyyətinin, Nikol Paşinyanın və onun komandasında olan şəxslərin məsuliyyətilə bağlı məsələlər ifşa olunmaqdadır. O, məhkəmədə etiraf edir ki, Azərbaycanın ayrı-ayrı şəhərlərinin raket atəşinə tutulmasına göstərişi rəsmi İrəvan verib, Araik Artunyunyanın o qərarlara təsir etmək imkanı olmayıb. Təbii ki, bu etiraf onu məsuliyyətdən azad etmir, amma hər bir halda onunla yanaşı digər şəxslərin də bu məsələdə məsuliyyətini müəyyənləşdirir. Hətta Ermənistan dövlətinin məsuliyyətini müəyyənləşdirməklə bağlı məqamları ortaya qoyur. Eyni zamanda Azərbaycanın hava limanlarının, digər strateji obyektlərin vurulması ilə bağlı məsələlər bu gün onların etiraflarında var. Necə ki, İkinci Qarabağ müharibəsinə qədər Azərbaycanın işğal altındakı ərazilərində törədilən cinayətlərə görə məsuliyyət Serj Sarkisyan, Robert Koçaryan, Seyran Ohanyan və digər şəxslərin üzərinə düşürdü, İkinci Qarabağ müharibəsində və ondan sonra Azərbaycan ərazilərində törədilən cinayətlərə görə məsuliyyət də Nikol Paşinyan hakimiyyətinin, onun komandasından olan şəxslərin üzərinə düşür. Ona görə, düşünürəm ki, bu məsələ artıq Nikol Paşinyan hökumətini ciddi şəkildə narahat edir, bu səbəbdən, Araik Artunyunyan və digər şəxslərlə bağlı əsassız fikirlər səsləndirirlər. Ermənistanın xarici işlər naziri bu barədə əsassız fikirlər söyləyir ki, guya Azərbaycan həmin o şəxslərə psixotrop maddələr verib. Azərbaycanı qabaqlamaq istəyir ki, gələcəkdə onların hansısa qanunsuz əməlləri ifşa olunacaqsa bu məsələdə onlara “psixotrop maddələrin verilməsi” “arqimentini” ortaya qoysunlar. Yaxud Ararat Mirzoyan iddia edir ki, Azərbaycan tərəfi guya həmin şəxslərə qarşı “qəddar”, “qeyri-insani” addımlara yol verib, guya bu proseslərin təsiri altında onlardan ifadə alınıb (?). Bu, Ermənistana rəhbərlik edən şəxslərin ənənəvi yanaşmasıdır, siyasətidir ki, onlar həmişə saxtakarlıq yolu ilə, eyni zamanda əsassız fikirlər səsləndirməklə, heç bir arqumentə, reallığa söykənməyən fikirlər bildirməklə öz düşüncələrinə görə guya qarşı tərəfi qabaqlayırlar. Guya bu yolla proseslərə təsir göstərmək istəyirlər. Amma bütün bunlar hamısı əsassızdır. Onların heç bir nəticəsi olmayacaq.
Ruben Vardanyanın cinayət yolu ilə əldə etdiyi milyardlar kimə lazımdırsa bu onların öz probelmləridir. Ancaq Azərbaycanı xalqımıza qarşı törədilən cinayətlərin ifşa edilməsi və o cinayətləri törədən bütün şəxslərin məsuliyyətə cəlb olunması məsələsi maraqlandırır. Kimlərisə Ruben Vardanyanın qanunsuz şəkildə, cinayət yolu ilə əldə etdiyi milyardlar maraqlandırırsa, yaxud Nikol Paşinyanı onun hakimiyyətinin əməllərinin ifşa edilməsi ilə bağlı məsələ narahat edirsə, bu onların problemidir. Bu onların məsələsidir. Bizim məsələmiz göz önündədir, biz haqqın-ədalətin tam şəkildə bərqərar olması istiqamətində addımlarımızı atırıq, bundan sonra da atacağıq” - deyə X.Bəşirov vurğuladı.
İradə SARIYEVA
