Tural İsmayılov: “Bu gün Ermənistan hakimiyyəti saxta sülh bəyanatları versə də, reallıqda Ermənistanın daxilində çox dəhşətli bir türkəfobiya siyasəti hökm sürür”
Ermənistan sosial mediasında baqajından Azərbaycan Bayrağı asılmış avtomobilin magistral yolda hərəkətini əks etdirən video yayılıb. Ermənistan daxili işlər nazirliyi də məlum faktı təsdiq edib.
Qeyd edilir ki, nəqliyyat vasitəsini idarə edən şəxs tərəfindən törədilmiş hüquqpozma hallarının aydınlaşdırılması və bununla bağlı müvafiq işin başlanması məsələsinin müzakirəsi məqsədilə sürücü və avtomobil Vağarşapat RPİ-yə aparılıb.
Maraqlıdır, vətəndaş nə məqsədlə maşınının arxasına Azərbaycan bayrağı qoyub? Ümumiyyətlə, bunun hər hansı bir mənası varmı?
“Ermənistan vətəndaşının maşınında Azərbaycan bayrağı ilə video çəkməsi onu göstərir ki, o ölkədə Azərbaycan və Türkiyə fobiya siyasəti mövcuddur”
Siyasi şərhçi Tural İsmayılov “Bakı-Xəbər”ə şərhində bildirdi ki, bu gün Ermənistan cəmiyyətində revanşizm duyğuları hələ də yüksək səviyyədədir: “Ermənistan vətəndaşının maşınında Azərbaycan bayrağı ilə video çəkməsi onu göstərir ki, o ölkədə Azərbaycan və Türkiyə fobiya siyasəti mövcuddur. Bu da ondan irəli gəlir ki, Ermənistanda revanşistləri faşizmdə qınayıb hakimiyyətə gələn, erməni gəncliyini uçuruma aparan Nikol Paşinyan hakimiyyəti hansısa alternativ siyasət həyata keçirə bilmir. Bu gün Ermənistanda revanşizm və faşizmin ən iyrənc formalarını müşahidə edirik. Azərbaycan bayrağı ilə bağlı yayılan video bir daha onu göstərir ki, Ermənistan ictimai rəyində ölkəmizə qarşı düşmənçilik hissinin qalmasına hazırki Paşinyan hakimiyyəti maraqlı tərəf qismində iştirak edir. Ümumiyyətlə, Ermənistanda aparılan təbliğat onu göstərir ki, bu ölkədə Azərbaycana qarşı hər hansı bir düşüncə fərqliliyi görə bilmərik. Məlumdur ki, bu gün Ermənistan hakimiyyəti saxta sülh bəyanatları versə də, reallıqda Ermənistanın daxilində çox dəhşətli bir türkəfobiya siyasəti hökm sürür. Bu da bir daha sübut edir ki, Ermənistan hakimiyyətinin bölgədə ölkələrin, xalqların gələcəyi ilə bağlı bütün söylənilən dırnaqarası fikirlər böyük bir fiaskodan ibarətdir”.
Günel CƏLİLOVA
