Əli Orucov: “Bununla istəyirlər ki, özlərini türklərə xoş göstərsinlər”
Ermənistanın sərhəd qoşunlarının hərbi qulluqçuları Türkiyə ilə sərhəddəki “Marqara” nəzarət-buraxılış məntəqəsində Rusiya sərhədçilərini əvəz ediblər. Bunu Ermənistanın baş naziri Nikol Paşinyan bildirib.
O, Rusiya Federal Təhlükəsizlik Xidmətinin Sərhəd Qoşunlarına təşəkkür edib: “Bu gündən etibarən Ermənistan-Türkiyə sərhədinə Rusiya hərbi kontingenti yox, erməni əsgərləri nəzarət edəcək”.
Daha əvvəl Rusiya hərbçiləri Ermənistan-İran sərhədinə nəzarətdən kənarlaşdırılıb. O cümlədən, İrəvan Hava limanına Rusiyanın nəzarətinə də son qoyulub. Türkiyə ilə Ermənistan sərhədindən Rusiya sərhədçilərinin çıxarılacağı əvvəlcədən bəyan edilməmişdi. O baxımdan belə bir addımın atılması və Ermənistan-Türkiyə sərhədinə ermənilərin nəzarət etməsi nə deməkdir?
“Rusiyanın Ermənistan sərhədlərinin mühafizəsində mövcudluğu mərhələli şəkildə ortadan qaldırılır”
Sözügedən məsələni “Bakı-Xəbər”ə şərh edən AMİP funksioneri Əli Orucovun fikrincə, Ermənistanın belə bir addım atmasının arxasında bir neçə səbəb ola bilər: “Bəli, razıyam ki, Ermənistanın Türkiyə sərhədində yerləşən Rusiya sərhədçilərini belə tez oradan çıxaracağı gözlənilmirdi. Ona görə ki, uzun illər bunun üzərində təbliğat qurulmuşdu ki, Rusiya Ermənistanı Türkiyədən qoruyur. Rusiya olmasa Ermənistan yox olacaq və s. Faktiki olaraq bütün bu tezislərin boş olduğu bir-bir ortaya çıxır. Rusiyanın Ermənistan sərhədlərinin mühafizəsində mövcudluğu mərhələli şəkildə ortadan qaldırılır. Əvvəlcə İrəvandakı “Zvartnots” hava limanını, sonra Azərbaycan və İran sərhədini itirdilər. Nəzərə almaq lazımdır ki, Rusiya sərhədçiləri bir müddət Azərbaycan və Ermənistan sərhədlərinin müəyyən hissəsini mühafizə edirdilər. İndi də məlum oldu ki, Türkiyə ilə sərhədə ermənilər nəzarət edəcək. Ola bilsin ki, Türkiyə bunu Ermənistandan tələb edib. O da ola bilər ki, bununla Paşinyan Türkiyəyə jest etmək istəyir. Yəni bu gün Ermənistanın Türkiyə ilə sərhədlərinin açılması üçün necə canfəşanlıq etdiyini hamımız yaxşı bilirik. Bununla istəyirlər ki, özlərini türklərə xoş göstərsinlər. Ola bilsin ki, Avropa İttifaqı bu yöndə Ermənistanı tələsdirir. Çünki bu və ya digər formada Aİ-nin Ermənistanda hərbi mövcudluğu var. Onlar istəmirlər ki, Rusiya hansısa formada onlara mane olsun. Hansısa danışıqlar fonunda bu məsələnin həllini tapması istisna edilmir. Ancaq bütün hallarda reallıq odur ki, ruslar Ermənistan sərhədinin qorunmasında iştirakını yekunlaşdırmaq üzrədir. Ermənistanda yalnız hərbi bazaları qalır. Lakin Rusiya hərbi bazası orada daimi olmayacaq. Bir müddət sonra hərbi bazaların Ermənistandan çıxarılması qaçılmazdır”.
Vidadi ORDAHALLI
