Elşad Həsənov: “Bunda rus kəşfiyyatının məqsədi Azərbaycanla Ukraynanın arasını vurmaqdır”
Rusiya Ukraynanın Azərbaycan və Ermənistanla münasibətlərini korlamaq üçün əlindən gələni edir. Bu məqsədlə o, daha bir genişmiqyaslı məlumat əməliyyatına başlayıb.
Bu barədə Ukraynanın Baş Kəşfiyyat İdarəsi məlumat yayıb.
Ukrayna BKİ bildirib ki, Ermənistanın informasiya məkanında Azərbaycanla Ermənistan arasında hərbi münaqişə yaratmaq üçün Ukrayna hərbi kəşfiyyatının işə başladığı haqda “fəal şəkildə feyk” yayılır: “Dezinformasiya yayanlar bunu yeni Azərbaycan-Ermənistan müharibəsinin Rusiyanı “ikinci cəbhə” açmağa məcbur edəcəyi, bununla da onun hərbi qüvvələrinin dağılacağı və prosesin Ukraynanın xeyrinə olacağı ilə “əsaslandırırlar”.
Məlumatda o da vurğulanıb ki, bu dezinformasiya Ukrayna müdafiə nazirinin müavini İvan Qavrilyukun adına olan saxta hesabdan tirajlanır: “İşğalçı dövlət olan Rusiyanın əsas məqsədi Ukraynanı gözdən salmaq, Ukrayna-Ermənistan və Ukrayna-Azərbaycan münasibətlərini daha da pisləşdirməkdir. Bu, ilk növbədə işğalçı dövlət olan Rusiya üçün faydalıdır”.
“Belə yalan məlumatlar həm də ona görə yayılır ki, Rusiya-Ukrayna müharibəsindən diqqəti yayındırsınlar”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, bütün bunlar onu göstərir ki, müharibə təkcə hərbi müstəvidə getmir: “Müharibə həm də informasiya cəbhəsində gedir. Artıq uzun illərdir bu belədir. Əsasən də, belə hibrid xarakterli müharibəyə daha çox ağırlıq verilir. Çünki indi müəyyən texniki vasitələrlə feyk xəbərlərin yayılması daha asandır. Nəinki asandır, artıq bu, adi hala çevrilib. Sıradan oxucu anındaca bunu sezə bilmir. Çünki insanların savadı, intellektual səviyyəsi eyni deyil. Rusiya xüsusi xidmət orqanları da bütün bunların fərqində olduqları üçün Ukrayna üzərindən Azərbaycan əleyhinə feyk məlumatlar yayırlar. Guya Ukraynanın məlumatına görə, Azərbaycanla Ermənistan arasında müharibə başlayacaq. Guya Rusiyaya qarşı ikinci cəbhə açılacaq. Təbii ki, belə xəbərlərin heç bir əsası yoxdur. Bunda rus kəşfiyyatının məqsədi Azərbaycanla Ukraynanın arasını vurmaqdır. Çünki MDB məkanında Azərbaycan yeganə ölkədir ki, Rusiya-Ukrayna müharibəsində tərəf tutmur, müstəqil siyasət yeridir. Azərbaycan yeganə ölkədir ki, müharibə başlayandan sonra bir neçə dəfə Ukraynaya humanitar yardım göstərib və bu gün də bu davam edir. Bütün bunlar Rusiyada bir sıra dairələri narahat edir və bunu həzm edə bilmirlər. Azərbaycan torpaqlarını işğaldan azad edərək ərazi bütövlüyünü təmin edib. Belə olan halda biz niyə Ermənistana hücum edək? Bizə lazımdır ki, indiki situasiyada belə provokasiyaya gedib beynəlxalq təzyiqlərlə üz-üzə gələk? Əlbəttə ki, yox. Belə yalan məlumatlar həm də ona görə yayılır ki, Rusiya-Ukrayna müharibəsindən diqqəti yayındırsınlar. O üzdən bu, informasiya müharibəsinin tərkib hissəsidir. Ancaq Rusiya bilməlidir ki, həm Azərbaycan, həm də Ermənistan Ukraynanın ərazi bütövlüyünü tanıyır”.
Vidadi ORDAHALLI
