Ağ Evdə Trampla Zelenski arasında gərgin mübahisədən sonra Vaşinqtondan gələn mesajlar ABŞ-ın Ukrayna siyasətində tarixi dəyişikliklərə gedə biləcəyindən xəbər verir.
Tramp administrasiyasının sözçüsü Karoline Leavitt ABŞ-ın Ukraynaya hərbi yardımı dayandıracağını və əsas diqqətin sülh danışıqlarına yönəldiləcəyini açıqlayıb.
Məlumatlara görə, Tramp rəsmilərə Ukraynaya yardımın dayandırılması ehtimalını araşdırmağı tapşırıb.
“The Wall Street Journal” Ağ Evin yüksək rütbəli rəsmisinə istinadən yazıb ki, Tramp milli təhlükəsizlik rəsmilərindən ABŞ-ın Ukraynaya hərbi yardımı müvəqqəti və ya birdəfəlik dayandıra biləcəyini araşdırmasını istəyib. Bildirilir ki, belə bir qərar qəbul edilərsə, ABŞ Ukraynaya milyardlarla dollar dəyərində silah, sursat, hərbi maşın və radar dəstəyini dayandıra bilər. “The New York Times” yazır ki, ABŞ təkcə birbaşa hərbi yardımı deyil, həm də maliyyələşdirməni, kəşfiyyat məlumatlarının mübadiləsini və Ukrayna ordusuna təlim dəstəyini də tamamilə dayandıra bilər. CBS News xəbər verir ki, Ağ Ev indi ABŞ-ın Rusiya və Ukraynanı sülh bağlamağa məcbur edə biləcəyinə şübhə edir.
Biden administrasiyası dövründə Ukraynaya birbaşa hərbi yardımın ümumilikdə 67 milyard dollara çatdığı bildirilsə də, Tramp vəzifəyə gəldikdən sonra yeni hərbi yardım paketi açıqlanmayıb. Tramp bildirib ki, hazırda ABŞ Ukraynaya heç bir müdafiə yardımı göstərmir. Üstəlik Konqresin təsdiqlədiyi 67 milyard dollarlıq hərbi yardımın da ləğv olunma risqi var.
Bayden administrasiyası Ukraynaya verilən silah dəstəyini “vacib” hesab edirdi. Lakin Tramp bu yardımdan Kiyev administrasiyasını Rusiya ilə sülh danışıqlarına məcbur etmək üçün bir vasitə kimi istifadə etməyi hədəfləyir.
Tramp administrasiyası bu qərarla Ukraynanın hərbi gücünü ciddi şəkildə zəiflədə və Kiyevi Avropa ölkələrindən daha çox dəstək almağa məcbur edə bilər. Ekspertlər hesab edir ki, ABŞ-ın Ukraynaya hərbi yardımı dayandırmaq qərarı müharibənin gedişatını kəskin şəkildə dəyişə bilər. Qeyd edilir ki, Oval ofisdəki gərginlikdən sonra Vaşinqtonda qəbul edilən qərarlar Ukraynanın döyüş meydanındakı gələcəyinə birbaşa təsir edə bilər.
Bu arada ABŞ Dövlət Departamenti Ağ Evdəki gərgin mübahisədən sonra Ukraynada enerji infrastrukturunun yenidən qurulmasını dəstəkləyən USAID layihəsini dayandırıb. Ukraynanın enerji şəbəkəsini dirçəltmək üçün böyük sərmayələr qoyan ABŞ-ın artıq layihəyə son qoyduğu bildirilir.
Ağ Evdəki mübahisəni dəyərləndirən Rusiya Dövlət Dumasının deputatı Mixail Şeremet bildirib ki, qalmaqal Ukraynaya ayrılan vəsaitlərin oğurlanması ilə bağlı yüksək səviyyəli araşdırmaya səbəb ola bilər. Onun sözlərinə görə, bu hadisələr ABŞ-ın Ukraynaya qarşı sanksiyalarının artmasına, Starlink peyk sistemlərinin bağlanmasına və hava hücumundan müdafiə sistemlərinin geri çəkilməsinə səbəb ola bilər.
TAHİR
