Tramp ABŞ-ın böyüklüyünə özünün şəxsi reytinqi ilə birlikdə böyük ziyan vurdu. Avroatlantika məkanı, yəni Avropa və Böyük Britaniyanın ABŞ-la 74 illik hərbi-siyasi ittifaqı dərin çat verdi.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Avropa liderləri yəqin ki, Ukraynaya hərbi-siyasi dəstəyi bundan sonra daha da artıracaqlar. ABŞ-ın özünün hərbi-siyasi elitasında Trampa qarşı narazılıqlar və açıq çıxışlar güclənəcək.
Bunlar o deməkdir ki, Tramp erası yaranmamış bitir. Ola bilər ki, Zelenskinin özünün də sonu gəlsin və Avropa dövlətləri Ukrayna müharibəsində yeni mərhələni yeni liderlə davam etdirmək istəsinlər. Ancaq Trampla Zelenskinin siyasi bitişlərinin fərqi var. Trampın bitişi siyasi fiaskodur. Zelenskinin bitişi isə siyasi estafetin növbəti liderə ötürülməsi ola bilər. Ukraynanın yeni mərhələni Zelenskinin özü ilə birgə gedəcəyi də istisna olunmur.
2019-cu ildə Trampa qarşı başladılmış ilk impiçment prosesinin yeni dalğasının başlanması təhlükəsi reallaşa bilər.
Amerikaya yeni lider lazımdır fikri dünya ictimai və diplomatik fikrində getdikcə güclənəcək. Artıq ilk "partlayış" var… Avropanın baş diplomatı Kaya Kallas Vaşinqtonda Trampın ulduzunun sönməyə başladığını göstərən hadisədən sonra açıqca dedi: "Azad dünyaya yeni lider lazımdır. Biz Ukraynaya hərbi dəstəyi gücləndirməliyik və gücləndirəcəyik".
Kallasın "azad dünya" deyəndə yəqin məhz ABŞ-ı nəzərdə tutduğunu bilirsiniz.
ABŞ-ın müxtəlif beynəlxalq təşkilatlarda və dünya ölkələrindəki səfirliklərində diplomatların silsilə istefalarının başlanacağını da istisna etmək olmaz. İstefalar niyə də olmaya bilər?! 2003 və 2011- 2024-cü illərdə Səddamın və Bəşər Əsədin səfirləri, 2011 - ci ildə Qəddafinin və Mübarəkin səfirlərinin istefalarını görmədik? Diktatorların diplomatları daha böyük təhlükə altında olmalarına baxmayaraq istefa edə bilirlərsə, ABŞ kimi özünü super demokratik dövlət sayan ölkənin diplomatları yanlışa etiraz etməyi niyə də bacarmasınlar?! “Ərəb baharı” zamanı Qərbin liderləri diktatorların diplomatlarını etiraz istefalarına təşviq etmirdilər?!...Tarix unudulmur...
İstefaların ilk növbədə ABŞ-ın Avropa səfirliklərində başlanacağı gözlənilir...
Tahir TAĞIYEV
