Azər Həsrət: “Azərbaycanın başına gətirilənlərdə Fransanın rolu var, hətta…”
Xocalı faciəsinin 33-cü ildönümü ilə bağlı xarici ölkələr Azərbaycana başsağlığı verir. Fransanın Azərbaycandakı səfirliyi də Xocalı faciəsinin 33-cü ildönümü ilə əlaqədar başsağlığı verib. Bu barədə paylaşım səfirliyin sosial şəbəkədəki səhifəsində yerləşdirilib.
“Bu gün biz Xocalı qurbanlarının xatirəsini ehtiramla yad edirik və bütün Azərbaycan xalqına başsağlığı veririk”, - bəyanatda bildirilib.
Fransanın Xocalı faciəsi ilə bağlı ölkəmizə başsağlığı verməsi ölkə ictimaiyyəti tərəfindən müsbət qarşılanmır. Bəllidir ki, Fransa Xocalı faciəsində əli olanlara dəstək olub, onlara arxa çıxıb. Maraqlıdır, məlum başsağlığı ilə nə demək istəyirlər?
“İkinci Qarabağ müharibəsi dövründə Ermənistanın lehinə çıxışlar edirdi, bu səbəbdən də Azərbaycan cəmiyyətində Fransa səfirliyinin məlum başsağlığı birmənalı qarşılanmır”
Siyasi şərhçi Azər Həsrət “Bakı-Xəbər”ə şərhində bildirdi ki, səfirliyin bu addımı diplomatik nəzakət örnəyidir: “Protokol qaydasına uyğun olaraq səfirlik başsağlığı verməli idi. Ancaq “üzrü qəbahətindən betər” deyə bir deyim var. Danılmaz faktdır ki, Azərbaycanın başına gətirilənlərdə Fransanın rolu var. Hətta Sovet İttifaqı zamanında, ermənilər bizimlə münaqişəyə başlamadığı dövrdə belə Fransa bu münasibətləri alovlandırıb. Ümumiyyətlə, Qarabağ münaqişəsinin əsası, təməli məhz 1987-ci ildə Fransada atılıb. Sonrakı mərhələdə Fransa Ermənistanın işğalçı siyasətinin arxasında durub, hətta İkinci Qarabağ müharibəsi dövründə də Ermənistanın lehinə çıxışlar edirdi. Bu səbəbdən də Azərbaycan cəmiyyətində Fransa səfirliyinin məlum başsağlığı birmənalı qarşılanmır. Buna baxmayaraq biz öz işimizdə oluruq, kimin nə deməsindən, necə başsağlığı verməsindən asılı olmayaraq Azərbaycan öz doğru bildiyini edir və istəklərinə də nail olur. Bu səbəbdən də hesab edirəm ki, Fransa zamanla Azərbaycanla tam olaraq hesablaşmaq məcburiyyətində qalacaq, bunu etməlidir. Fransaya normal düşüncəli prezident rəhbərlik edəndə həmin ölkənin Azərbaycanla bağlı siyasəti kökündən dəyişəcək”.
Günel CƏLİLOVA
