Əli Orucov: "Hazırkı prezidentin yürütdüyü siyasi kurs əsasən mənfəət və iqtisadi maraqlar üzərində qurulub"
27 fevralda İstanbulda Rusiya və ABŞ nümayəndə heyətləri arasında danışıqların yeni raundu "ikitərəfli əlaqələr" və "səfirliklərin işinin qurulması" mövzularına həsr olunub.
Rusiya rəsmi mediası xəbər verir ki, 6 saatdan çox davam edən danışıqlar Amerikanın baş konsulunun Boğaziçi sahilinin Arnavutköy rayonundakı iqamətgahında baş tutub.
Rus mediası xəbər verir ki, tərkibi açıqlanmayan Rusiya nümayəndə heyəti yerli vaxtla saat 16:20-də iqamətgahı tərk edib.
Fevralın 18-də Səudiyyə Ərəbistanında keçirilən ilk belə qapalı görüş prezident Donald Trampın rəhbərliyi altında ABŞ-ın xarici siyasətində açıq-aşkar dəyişikliyi və əvvəlki administrasiyanın Rusiyanı Ukraynaya qarşı əsassız təcavüzünə görə təcrid etmək səylərindən uzaqlaşdığını göstərdi.
Baki-xeber.com saytının sualını cavablandıran politoloq Əli Orucov bildirdi ki, Trampın hakimiyyətə gəlişi bir çox məsələlərdə, xüsusən də Ukrayna-Rusiya müharibəsinə Birləşmiş Ştatların mövqeyini dəyişdi: "Hazırkı prezidentin yürütdüyü siyasi kurs əsasən mənfəət və iqtisadi maraqlar üzərində qurulub. Bəzən bu hədəflərə çatmaq üçün məqbul hesab edilməyən üsul və vasitələrə də əl atılır. Ağ Ev sahibini, göründüyü kimi, Ukraynanın ərazi bütövlüyü, suverenliyi, təhlükəsizliyi deyil, onun təbii resursları və gəlirli sahələri maraqlandırır. Rusiya ilə sövdələşmədə də məhz bu amillər qabağa çəkilir. Rusiya dəfələrlə bəyan edib ki, Ukraynanın işğal edilmiş ərazilərini qaytarmaq müzakirə mövzusu ola bilməz. Ukraynanın da Qərbin fəal hərbi, siyasi və maliyyə dəstəyi olmadan həmin əraziləri qaytarması hələ ki, mümkün görünmür. Birləşmiş Ştatlar prezidentinin Ukraynadan tələb etdiyi faydalı təbii resurslar da məhz işğal olunmuş bölgələrdə yerləşir. Trampın "Ukrayna itirdiyi torpaqlardan əlini üzməlidir" deməsi Rusiyanı daha da iştahlandırır. Tramp üçün faydalı qazıntıların Ukrayna ilə, yaxud Rusiya ilə çıxarılması o qədər önəm daşımır. Rusiya da dünyanın 5 faiz nadir metal yataqlarına malik ərazilərin ABŞ-la işlənməsindən qazanır. Bu təkcə milyardlarla vəsaitin əldə edilməsi deyil, həm də Vaşinqtonla iqtisadi, siyasi və ticari əlaqələrin gücləndirilməsinə gətirib çıxara bilər.
Rusiya heç nə itirmir. İtirən Ukrayna olur. İqtisadiyyatı bərbad hala düşən, sanksiyalardan əziyyət çəkən Rusiya üçün Ukrayna üzərindən ABŞ-Rusiya sövdələşməsi Avropa İttifaqının da ziyanınadır. Qərbin oyundankənar saxlanılması, doğrudur, həmin razılaşmalara bir qədər əngəl yarada bilər. Müharibənin uzun çəkməsi və Qərbin Kiyevə hərbi-siyasi və maliyyə dəstəyini artırması Tramp-Putin bazarlığını çətinə salma ehtimalını da artırır. Lakin bütün bunların fonunda konkret demək olar ki, Ukrayna-Rusiya müharibəsinin qalibi də, bundan ağlasığmaz mənfəət götürən də ABŞ-dir..."
Dəniz NƏSİRLİ
