İlyas Hüseynov: “Maraqlıdır, təyyarə qəzasında həlak olan, milli qəhrəman adı alanlar niyə Çeçenistan hökuməti tərəfindən təltif edilmir?”
25 dekabr 2024-ci il tarixində Azərbaycan Respublikasının Bakı şəhərindən Rusiya Federasiyasının Qroznı şəhərinə J2-8243 reysi üzrə müntəzəm uçuş həyata keçirən “Azərbaycan Hava Yolları” QSC-yə (“AZAL”) məxsus və dövlət reyestrində 4K-AZ65 nömrəsi ilə qeydiyyata alınmış Embraer 190-100 IGW tipli sərnişin hava gəmisi Qazaxıstan Respublikası ərazisində Aktau hava limanı yaxınlığında qəzaya uğrayıb.
Qəza nəticəsində iki uçuş heyəti üzvü (kapitan və ikinci pilot), böyük təyyarə bələdçisi və 35 sərnişin həlak olub. İnsan tələfatı və xəsarət alanlar olmasına baxmayaraq, pilotların, bələdçilərin yüksək peşəkarlığı, şücaəti və cəsurluğu sayəsində təyyarə qəza enişi həyata keçirib və 29 nəfərin həyatını xilas etmək mümkün olub.
Qeyd edək ki, Çeçenistan rəhbəri Ramzan Kadırov 2024-cü ilin dekabrında qəzaya uğrayan AZAL-a məxsus "Embraer E190" sərnişin təyyarəsinin ekipaj üzvlərini “Çeçenistan Respublikası qarşısında xidmətlərinə görə” medalları ilə təltif edib. Trend xəbər portalının məlumatına görə, Bakı-Qroznı reysini həyata keçirərkən qəzaya uğrayan AZAL sərnişin təyyarəsinin bələdçilərinə “Çeçenistan Respublikası qarşısında xidmətlərinə görə” mükafatı təqdim olunacaq.
Maraqlıdır, Kadırovun ekipajı bu medalla - Çeçenistan qarşısında xidmətə görə medalı ilə təltif etməsi nə qədər uyğun addımdır? Axı ekipajın Çeçenistan qarşısında hansısa xidməti olmayıb? Həmçinin, hadisədən 2 ay keçəndən sonra bu addımın atılması nə dərəcədə düzgündür?
“Olaydan iki ay sonra sağ qalan ekipaj üzvlərinə Çeçenistan Respublikası qarşısında xidmətlərinə görə mükafatı təqdim etmək istəyi suallara səbəb olub”
Politoloq İlyas Hüseynov “Bakı-Xəbər”ə şərhində bildirdi ki, təyyarə qəzasından sonra baş verən proseslər və istintaqın ilkin nəticələri olsa belə, Rusiyanın müəmmalı davranışı Bakı ilə Moskva arasındakı münasibətləri pozub: “Baxmayaraq Rusiya prezidenti Vladimir Putin məlum məsələ ilə bağlı ölkə başçısı İlham Əliyevlə telefon danışığı həyata keçirib. Lakin söylənilən fikirlər, üzrxahlıq qaneedici olmadı. Belə ki, kompensasiya ödənilmədi. Hadisə baş verdikdən sonra Çeçenistan rəhbəri Ramzan Kadırovun fikirləri əhəmiyyətsiz hesab olundu, qəbul edilmədi. Olaydan iki ay sonra sağ qalan ekipaj üzvlərinə Çeçenistan Respublikası qarşısında xidmətlərinə görə mükafatı təqdim etmək istəyi suallara səbəb olub. Belə görünür ki, Kadırov qismində Rusiyanın Azərbaycana jesti özünü göstərməkdədir. Bunun qarşılığında ölkəmizin hansı addımlar atacağını qarşıdakı müddətdə görəcəyik. Maraqlıdır, həyatını itirən, milli qəhrəman adı alanlar Çeçenistan hökuməti tərəfindən niyə təltif edilmir? Ümumiyyətlə, bu mövzu ilə bağlı çoxlu suallar var”.
Günel CƏLİLOVA
