İbrahim Rüstəmli: “Aİ missiyasının məqsədi Ermənistanı Azərbaycana qarşı növbəti təxribata sövq etmək, sülh prosesini pozmaqdır”
Avropa İttifaqının (Aİ) “müşahidəçilər"inin sərhəddə fəallığı səngimir. Bununla bağlı mətbuatda yeni görüntülər yayılıb. Qeyd olunur ki, Aİ-yə məxsus üç ədəd “Toyota” markalı avtomobildə "müşahidəçilər" Ermənistan-Azərbaycan sərhədinə yaxınlaşaraq ərazilərimizi izləməyə başlayıblar.
"Müşahidəçilər"in fəaliyyəti Dövlət Sərhəd Xidmətinin hərbçilərinin gözündən yayınmayıb. Onlar bizim ərazilərimizi izlədiyi kimi, bizim hərbçilər də onların fəaliyyətlərini diqqətlə izləyir.
Avropa İttifaqının Ermənistandakı mülki missiyasının yenə sərhəddə görsənməsi, onların sərhəddə yerləşməsi həddən artıq həssas məsələdir. Azərbaycan bundan narazıdır və biz onları qəbul etmirik. Bütün bunlara baxmayaraq, onlar sərhəddə yenidən görsəniblər və binoklla müşahidə aparıblar.
Birincisi, bir müddət əvvəl Prezident İlham Əliyev bu məsələyə yenə də toxundu və dedi ki, binoklla baxmaq mənfi yanaşmadır. Prezident qeyd edirdi ki, “Binokl diplomatiyası” heç cür qəbuledilən deyil. Adam dost tərəfə binoklla baxmaz ki. Gəlmək istəyirsizsə, gəlin baxın, yoxsa sərhəddə nə axtarırsınız? Siz Azərbaycana rəsmi səfərə gəlin, Azərbaycan sizi həmin o sərhədə aparsın və hansı hərbi hissəyə baxmaq istəyirsiz baxın. Bu mümkündü.
İkincisi, məsələnin belə həssas dönəmində Azərbaycan İrəvana 12-ci sülh sazişi paketini verdi, cavab gözləyir. Paşinyan o paketə olduqca əbdrabadi bir izah verdi, nə danışdı heç özü də bilmədi. Ümumi nəticə budur ki, Paşinyan sülhə gəlmək istəmir. O biri tərəfdən sülh sazişinin imzalanmasında bir durğunluq əmələ gəlib. Baxın, belə həssas bir vəziyyətdə Aİ missiyasının üzvlərinin sərhədlərdə görsənməsi Azərbaycanı açıq şəkildə qızışdırmaq, provokasiyaya çəkmək cəhdi deyilmi?
“Aİ-nin “mülki missiyasının” sərhəddə görünməsi və binoklla müşahidə aparması qəbuledilməzdir, təxribat xarakterlidir”
Hərbi ekspert İbrahim Rüstəmli “Bakı-Xəbər”ə şərhində bildirdi ki, Aİ-nin bütövlükdə Qarabağ probleminə, Ermənistanın torpaqlarımızı işğal etməsi məsələsinə münasibəti hər kəs üçün aydındır. “Biz təqribən 30 ilə yaxın bir müddət ərzində Avropa Birliyinin, BMT-nin, eləcə də digər beynəlxalq təsisatlatın, hüquqi institutların və dövlətlərin mövqeyini gözlədik, bu mövqe problemin həlli baxımından heç bir produktivliyi ilə seçilmədi. Əslində bu belə idi ki, bütün dünya Azərbaycanın ərazi bütövlüyünü tanıyırdı. Azərbaycanın ərazi bütövlüyünü tanımaq dolayısı ilə Ermənistanın işğalçı bir dövlət olduğunu danmaq demək idi. Lakin problemin həlli üçün bu kifayət etmirdi. Ona görə də, Azərbaycan istər beynəlxalq təşkilatların, istərsə də bir sıra missiyaların yerinə yetirməli olduğu işi öz üzərinə götürdü və 44 gün ərzində öz torpaqlarını işğaldan azad etdi. İndi Aİ-ni narahat edən məsələ nədən ibarətdir? Azərbaycan öz torpaqlarını düşmənlərdən təmizləyib, Azərbaycanın heç bir dövlətin ərazisinə qarşı iddiası yoxdur. Ancaq bu gün Aİ missiyasının üzvlərinin hərəsi əlinə bir binokl alıb o binoklla Azərbaycan ərazisini müşahidə edir. Elə bil ki, Azərbaycan hansısa başqa, yad, düşmən, təcavüzkar bir ölkədir, halbuki, Azərbaycan 30 il müddətində təcavüzə məruz qalmış ölkədir. Yəni elə imitasiya edirlər ki, adamda belə təsəvvür yaranır, sanki torpağı işğal olunan Ermənistan imiş, xalqı qırğına məruz qalan, hərbi təxavüzə məruz qalan ermənilər imiş, Xocalı faciəsi ermənilərin başına gətirilibmiş. Ağdaban, Çaylı, Qaradağlı kimi o qədər faciələr yaşamışıq ki. Sanki bunlar hamısı ermənilərin başına gətirilmiş faciələrdir, sanki əzilən bunlar olub. Halbuki, bütün bunlar bizim dinc xalqımızın başına açılan oyunlardır. Bilirsiz, burda Avropa İttifaqını nə Azərbaycan xalqının, nə də erməni xalqının, əgər ermənilərə xalq demək mümünsə, taleyi maraqlandırmır. Burda o öz maraqlarına uyğun davranır. Cənubi Qafqaz Avropa İttifaqının da, bir sıra Qərb dövlətlərinin də maraqlarının toqquşduğu bir məkandır. İndiki dövrdə, yeni geosiyasi reallıqların yarandığı bir vaxtda onlar Cənubi Qafqaza özünü zəif bənd kimi göstərən və davamlı şəkildə bu missiyanı davam etdirən Ermənistan vasitəsilə sızırlar. Ona görə də Azərbaycan həyata keçirdiyi müstəqil siyasət nəticəsində onların Azərbaycanda at oynatmasına, onların Azərbaycanla başqaları ilə danışdığı dildə danışmasına imkan vermir. Azərbaycan konkret siyasi xətti olan bir ölkədir, onun vahid siyasi kursu var və siyasi kurs onun ərazi bütövlüyünün, suverenliyinin əsas qarantıdır”.
İ.Rüstəmli bir daha qeyd etdi ki, Azərbaycan heç bir ölkənin ərazisinə qarşı torpaq iddiası ilə çıxış etmir. “Ona görə də cənab Prezident çox mükəmməl şəkildə vurğulayıb ki, siz bizim əraziyə niyə binoklla baxırsınız? Əgər siz özünüzü bizə dost sayırsınızsa, bu nə hərəkətdir? Bu utanc gətirən hərəkətdir, əskiklikdir. Hərəsi əlinə bir binokl alıb Azərbaycanın ərazisinə baxır. Nəyə baxısınız? Torpaqlarımız 30 il işğalda olduğu dövrdə heç gəlib Azərbaycanda əlinizə binokl alıb erməniləri müşahidə etməmişdiniz. Niyə Xocalı, Ağdaban, Qaradağlı faciələrində əlinizə binokl alıb baxmırdınız? Yəni Azərbaycan prezidentinin də dediklərindən əsas anlaşılan odur ki, gəlin, siyasi missiyanı siyasi missiya kimi həyata keçirin. Yəni “binokl diplomatiyası” nəyə lazım? Siz hansı dövrdə yaşayırsınız, ya Azərbaycanı nə hesab edirsiniz? Binokl siyasəti ilə siz nəyə nail olacaqsınız?”
İ.Rüstəmli hesab edir ki, indiki həssas durumda Aİ missiyasının üzvlərinin sərhədlərdə görsənməsi təhlükəli tendensiyadır və məqsəd növbəti təxribata nail olmaqdır. “Aİ-nin “mülki missiyasının” sərhəddə görünməsi və binoklla müşahidə aparması qəbuledilməzdir, təxribat xarakterlidir. Təbii, bu elə bir məsələdir ki, heç bir əndazəyə sığmır və bu baxımdan ona nə siyasi, nə hüquqi baxımdan şərh vermək olmur. Onlar burda özlərinə aid olmayan məsələlərlə məşğul olurlar. Aİ missiyasının məqsədi Ermənistanı Azərbaycana qarşı növbəti təxribata sövq etmək, sülh prosesini pozmaqdır. Bütün dünya yaxşı bilir ki, Azərbaycan Ermənistanla sülh sazişini imzalamaqda maraqlıdır. Biz artıq 12-ci sülh sazişi paketini Ermənistana təqdim etmişik. Lakin hələ bu paketə adekvat cavab verilmir, konstruktiv mövqe nümayiş olunmur. Belə bir vəziyyətdə Aİ nümayəndələrinin sərhəddə binoklla müşahidə aparması ümümi işimizin xeyrinə deyil. Bütün bunlar Azərbaycanla Ermənistan arasında sülh sazişinin imzalanması prosesinə maneçilik törətmək anlamına da gələ bilər. Bu da mümkündür. Burda bir təxribat məqsədi də var. Azərbaycanın mövqeyi ortadadır və bunu bəyan edib. Bütün bunların müqabilində Aİ missiyasının bu davranışı nə siyasi etikaya sığır, nə də hüquqi normalara. İndiki həssas məqamda Aİ nümayəndələrinin daha konstruktiv mövqe tutması böyük önəm daşıyır” - deyə İ.Rüstəmli qeyd etdi.
İradə SARIYEVA
