Məlum olduğu kimi, fevralın 27-də PKK terror təşkilatının həbsdəki lideri Abdullah Öcalan tərəfdarlarına çağırış edib. Öcalanın adından yayılan yazılı müraciətdə “silahı buraxın” çağırışı yer alıb.
“Bütün qruplar tərksilah olunmalı və PKK ləğv olunmalıdır. Mən silahı yerə qoymağa çağırıram və bu çağırışa görə tarixi məsuliyyəti öz üzərimə götürürəm”, - Öcalanın müraciətində deyilir.
Məlumat üçün qeyd edək ki, DEM Partiyasının rəhbərliyi fevralın 27-də İmralı adasında Öcalanla danışıqlar aparıb. Danışıqların nəticəsində PKK liderinin müraciətinin yayımlanması qərara alınıb. Danışıqlardan sonra İstanbulda təşkil olunan mətbuat konfransında Öcalanın müraciətini DEM Partiyanın rəhbərliyində təmsil olunan Ahmet Türk kürdcə, Pervin Buldan isə türk dilində oxuyub.
Qeyd edək ki, PKK lideri Abdullah Öcalan 26 ildir İmralı həbsxanasında saxlanılır. O, 1999-cu il fevralında Milli Kəşfiyyat Təşkilatının əməliyyatı nəticəsində Keniyada saxlanılıb və Türkiyəyə gətirilib. O, ölüm cəzasına məhkum edilsə də, hökm sonradan ömürlük həbs cəzası ilə əvəzlənib.
Maraqlıdır, Öcalanın bu çağırışından sonra PKK silahı yerə qoyub təslim olacaqmı? Doğrudanmı terror təşkilatı tərkisilah olacaq və onlar Ocalanın çağırışına qulaq asacaqlar?
Ceyhun Məmmədov: “PKK üzvlərinin əksəriyyəti bu çağırışa riayət edəcək və silahı yerə qoyacaq”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, bu, tarixi bir hadisə və qərardır: “Qardaş ölkə olan Türkiyə uzun illər terrordan əziyyət çəkib. Bəzi dövlətlər, müəyyən xarici dairələr Türkiyəni zəiflətməkdən ötrü PKK terror təşkilatından bir vasitə kimi istifadə ediblər. Çünki istəmirdilər ki, Türkiyə regionda və dünyada lider dövlət olsun. Onlar istəyirdilər ki, Türkiyənin başı daxilə qarışsın. Ancaq Türkiyə qüdrətli dövlət olduğu üçün bu planları pozdu. Şükürlər olsun ki, belə bir hadisə baş verdi, Öcalan belə bir çağırışla çıxış etdi. Artıq kürd xalqı, PKK rəhbərliyi də başa düşdü ki, bu yol uğurlu bir yol deyil. Terrorun qalması xalqlar arasında birliyə zərər vurur. O üzdən, belə bir addımı atdılar. Fikrimcə, bu, Türkiyə tarixində olduqca önəmli bir hadisədir və Ankaranın böyük uğurudur. Həm də bu, bir sıra dövlətləri narahat edən məsələdir. Çünki bəzi region və dünya dövlətləri PKK-dan Türkiyəni zəiflətmək üçün istifadə ediblər. Bu gün yeni bir reallıq yarandığı üçün artıq həmin imkan yoxdur. Fikrimcə, PKK üzvlərinin əksəriyyəti bu çağırışa riayət edəcək və silahı yerə qoyacaq. Ola bilsin, bəzi siyasi qüvvələr buna mane olmağa çalışsınlar. Ancaq ümumilikdə bu, öz nəticəsini verəcək və önəmli tarixi hadisə kimi yadda qalacaq”.
Turan Rzayev: “Eyforiyaya qapılmamaq lazımdır, çünki bu müraciətin effektliyi sual altındadır”
Politoloq Turan Rzayev isə sözügedən məsələyə bir qədər fərqli prizmadan yanaşır. Onun fikrincə, eyforiyaya qapılmamaq lazımdır: “Şübhəsiz ki, Abdullah Öcalanın müraciəti tarixi əhəmiyyət daşıyır. Bu, Türkiyə üçün müsbət hadisədir. Bununla belə eyforiyaya qapılmamaq lazımdır. Çünki bu müraciətinin effektliyi sual altındadır. Mən elə düşünürəm ki, A.Öcalan sadəcə bir piondur. PKK-nın üzdə görünən simasıdır. Onun müraciətinə şübhəsiz cavab verənlər olacaq. Lakin PKK terrorçu fəaliyyətinə yenə də davam edəcək. Ümumiyyətlə, Öcalanın PKK üzərində təsir gücü elə də çox deyil. Həqiqətən bu belə olsaydı 1999-cu ildə Türkiyə Milli Kəşfiyyat Xidmətinin keçirdiyi xüsusi əməliyyatla ölkəyə gətirilməsindən sonra PKK məğlub olub bitərdi. A.Öcalan nə az, nə çox, 20 ildən çoxdur ki, İmralı adasında həbsxanadadır. Lakin buna baxmayaraq PKK terror təşkilatı fəaliyyətini davam etdirdi. Hətta Suriya və İraq da bu illərdə daha da qol-budaq açdı. Düzdür, Türkiyə Suriya və İraqın şimalında, həmçinin ölkə daxilində keçirdiyi ardıcıl antiterror əməliyyatlar ilə terror təşkilatına ciddi zərər vurmağı da bacardı. Bu əməliyyatlar PKK-ya ağır zərbə olsa da, terror təşkilatı bugünə qədər bu və ya başqa formada varlığını davam etdirməyi bacardı. Özü də bunu Öcalan olmadan etdilər. PKK-nın A.Öcalanın müraciəti ilə silahı yerə qoyacağını düşünmək sadəlövhlükdür. PKK ilə daha köklü mübarizə aparmaq lazımdır”.
Vidadi ORDAHALLI
