Mətin Məmmədli: “Ermənilər döyüş üçün yaxın Şərq ölkələrindən, Suriya və Livandan muzdlu əsgərlər gətirib”
Ermənistanın hərbi təcavüzü nəticəsində müharibə cinayətləri, təcavüzkar müharibənin hazırlanması, aparılması, müharibə qanunlarını və adətlərini və digər çoxsaylı cinayətlər törətməkdə təqsirləndirilənlərin məhkəmə prosesi davam edir.
Təqsirləndirilən şəxs Arkadi Qukasyan məhkəmədə ifadəsində qeyd edib ki, Qarabağ ərazisində heç bir muzdlu olmayıb: “Müdafiə Nazirliyi və Ermənistan ordusu olub, hansı ki, Ermənistan Respublikası tərəfindən maliyyələşdirilirdi”.
Qukasyan deyir ki, guya Qarabağda muzdlu olmayıb. Ancaq hər kəsə bəllidir ki, Ermənistanda Suriya, Livandan gətirilən muzdlu döyüşçülərə dair faktlar var.
“Qukasyanın məlum fikirləri ciddi qəbul edilə bilməz, muzdlu əsgərlər ölkəmizə qarşı döyüşlərdə iştirak edib”
Siyasi şərhçi Mətin Məmmədli “Bakı-Xəbər”ə şərhində bildirdi ki, Bakıda keçmiş qondarma rejimin liderlərinin məhkəməsində diqqəti cəlb edən əsas məqamlardan biri onların məsələləri təhrif etməyə, olmuş faktları gizlətməyə çalışmalarıdır: “Ermənistan Azərbaycan torpaqlarını işğal edən zaman onlar 30 il ərzində Qarabağda yerləşdilər. Eyni zamanda, ermənilər döyüş üçün yaxın Şərq ölkələrindən, Suriya və Livandan muzdlu əsgərlər gətirib. Onlar da ölkəmizə qarşı döyüşlərdə iştirak edib. Bu hal Birinci və İkinci Qarabağ müharibələri dövründə yaşanıb. Bununla bağlı kifayət qədər faktlar var və təsdiq də olunub. Belə bir vəziyyətdə Qukasyanın məlum fikirləri ciddi qəbul edilə bilməz. Muzdlu əsgərlər ölkəmizə qarşı döyüşlərdə iştirak edib. Məlumat üçün deyim ki, beynəlxalq hüquqda döyüşlərdə muzdlu əsgərlərdən istifadə etmək ağır cinayət hesab olunur. Təqsirləndirilən şəxslər kifayət qədər cinanət törədiblər. Qukasyan və digərləri həm daxili, həm də beynəlxalq qanunvericiliyin tələblərini pozublar. Qukasyanın Qarabağ ərazisində heç bir muzdlu olmayıb fikri ciddi qəbul edilə bilməz. Çünki faktlar göz qabağındadər. Məhkəmə baş vermis bütün faktları nəzərə alacaq”.
Günel CƏLİLOVA
