Vüqar Bayramov: “Bu, qeyri-neft sektorunda istehsal edilən məhsulların ixrac imkanları baxımından vacibdir”
Prezident İlham Əliyev mətbuata bəyanatında Qvineya-Bisau Respublikası ilə müəyyən sahələrdə əməkdaşlığın perspektivlərini belə dəyərləndirib:
“Biz iqtisadi sahədə belə bir razılığa gəldik ki, konkret layihələr, investisiya imkanları müəyyən edilsin. Əminəm ki, beləliklə, biz ümumi məxrəcə gəlib çıxacağıq. Çünki biz artıq bir çox ölkələrə sərmayələr yatırırıq. Əlbəttə, biz məmnun olardıq ki, konkret layihələr fürsətlərini nəzərdən keçirək. Biz, həmçinin hesab edirik ki, bu, müdafiə və müdafiə sənayesi sahəsində əməkdaşlıq etmək üçün fürsət yaradır. Cənab Prezident Azərbaycanın hərbi hissələrinin birində olacaq və ona, o cümlədən müdafiə sənayesi haqqında təqdimat ediləcək”.
Ümumən, iki ölkə arasında əməkdaşlığın iqtisadi perspektivlərini ekspertlər necə dəyərləndirir?
“Yeni bazarlar olmalıdır ki, Azərbaycan istehsal etdiyi məhsulları həmin ölkələrə ixrac edə bilsin”
Sözügedən məsələyə aydınlıq gətirən millət vəkili Vüqar Bayramov “Bakı-Xəbər”ə açıqlamasında bununla bağlı bir sıra məqamlara toxundu: “Azərbaycan fərqli qitələrdə yerləşən ölkələrlə əməkdaşlığı gücləndirir. O baxımdan nəzərə almaq lazımdır ki, Azərbaycanın geniş sərmayə qoymaq potensialı var. Bu da bir sıra ölkələrin diqqətini cəlb edir. Həmin ölkələr maraqlıdılar ki, Azərbaycanla əlaqələri genişləndirsinlər, sərmayə cəlb etsinlər. Ona görə də əlaqələrin gücləndirilməsi, əməkdaşlığın genişləndirilməsi Azərbaycanın Qvineya-Bisau Respublikasına sərmayə qoyuluşunu stimullaşdıra bilər. Eyni zamanda bu ölkə ilə müdafiə sənayesi sahəsində əməkdaşlıq imkanları kifayət qədər genişdir. Nəzərə almaq lazımdır ki, Azərbaycan artıq müdafiə sənayesi məhsullarını ixrac edən ölkəyə çevrilib. Ona görə də Azərbaycanın müdafiə sənayesi məhsullarının yeni ölkələrə çıxarılması bütövlükdə bu sənayenin inkişaf perspektivləri aspektindən vacibdir. Ona görə ki, iki ölkə arasında əməkdaşlıq imkanları kifayət qədər geniş və çoxşaxəlidir. Qvineya-Bisau Respublikası prezidentinin Bakıya son səfərində iqtisadi məsələlər üzrə razılığın əldə edilməsi ondan xəbər verir ki, biz növbəti mərhələdə ölkələr arasında iqtisadi əlaqələrin inkişafını və dərinləşməsini müşahidə edəcəyik. Ümumilikdə bu, Azərbaycan üçün sərfəlidir. Xüsusən də qeyri-neft sektorunda istehsal edilən məhsulların ixrac imkanları baxımından vacibdir. Çünki yeni bazarlara çıxış yeni imkanlar deməkdir. Ona görə də bu imkanlardan maksimum faydalanmalıyıq. Yeni bazarlar olmalıdır ki, Azərbaycan istehsal etdiyi məhsulları həmin ölkələrə ixrac edə bilsin. Bütün bunlar ümumilikdə Azərbaycanda qeyri-neft sektorunun inkişafına müsbət təsir göstərəcək”.
Vidadi ORDAHALLI
