Amerika Birləşmiş Ştatlarının (ABŞ) dövlət katibi Entoni Blinken amerikalı qanunvericilərə Azərbaycanın Ermənistana hücum ehtimalı barədə açıqlama verməyib, bu doğru deyil və heç də reallığı əks etdirmir. Bu barədə ABŞ-ın Bakıdakı səfirliyindən məlumat verilib.
Dövlət Departamentinin rəsmi nümayəndəsinə istinadən verilən məlumatda deyilir:
“Bu məqalədəki (“Politico”dakı məqalə) ifadələr qeyri-dəqiqdir və dövlət katibi Blinkenin amerikalı qanunvericilərə dediklərini heç bir şəkildə əks etdirmir”.
Qeyd edək ki, Avropanın “Politico” nəşri Amerika diplomatiyasının rəhbərinin konqresmenlərlə görüşündə guya Azərbaycanın Ermənistana mümkün hücumu barədə xəbərdarlıq etdiyi barədə məqalə dərc edib. Bunu da “mütləq həqiqət” kimi əsas tirajlayan erməni mediası olub. Hətta Ermənistanın rəsmi media quruluşları, vəzifəli şəxsləri bu mövzuya dair şərhlər veriblər. Maraqlıdır ki, ABŞ-ın rəsmi təkzibi belə onları doğru yol tutmağa vadar etməyib. Onlar verilən təkzibi də kontekstdən çıxararaq, əvvəlki mətnə uyğun şəkildə təqdim ediblər. Bütün bunlar ABŞ-ın nüfuzuna ciddi xələl gətirsə də, nədənsə, yaranmış vəziyyətlə bağlı Ermənistana sərt etiraz ifadə olunmur. Görəsən niyə?
Media eksperti, əməkdar jurnalist Azər Həsrət “Bakı-Xəbər”ə açıqlamasında bildirdi ki, doğrudur, “Politiko” nəşrində Blinkenin adından belə bir məlumat yayılmışdı: “ Amma təbii ki, Ermənistan mediası, erməni təbliğat maşını bunu daha geniş yaymışdı. Ardından da ABŞ Dövlət Departamentinin sözcüsü Miller açıqlama yaydı ki, dövlət katibi belə ifadə işlətməyib. Yəni təkzib verildi. Erməni mediası təkzibi də öz istədikləri formada dərc elədi. Amma yenə də öz bildiklərindən əl çəkmədilər. Azərbaycanı bunun üzərindən ittihama davam etdilər və hələ də edirlər. Təbiidir ki, belə bir şəraitdə ABŞ ən yüksək səviyyədə Ermənistan mediasına çağırış etməli, yaxud qınama ilə bağlı açıqlama yaymalı idi. Çünki yalan məlumat yayılıb, tirajlanıb. Çox ciddi, əsassız bir məlumat hesab olunur. Belə olan vəziyyətdə narahatlıq, xəbərdarlıq olmalı idi. Amma təəssüflər olsun ki, ABŞ - dan biz bunu görmədik. Bu da təsadüfi deyil. Onlar adətən ermənilər və Ermənistanla bağlı olan məsələlərdə nisbətən yumşaq davranmalara üstünlük verirlər. Bir tərəfdən xristian həmrəyliyi var, digər tərəfdən ABŞ - da olan erməni lobbisinin təsir imkanları var. Üçüncü bir tərəfdən də, onlara görə, Ermənistan özü də, mediası da hər cür cığallıq edə bilər. Onlar bunu demokratiyanın, ifadə azadlığının təzahürü kimi qiymətləndirirlər. Halbuki, Azərbaycanda belə bir şey olsa idi, yəqin yer yerindən oynayardı. İkili standartdır, tərəf tutulmadır. Amma bu bizi narahat etmir. Çünki nə olsa da, sonda qalib yenə biz oluruq”.
Hər halda, bu vəziyyət bizim mediamız və informasiya məkanımız üçün təcrübə baxımından əhəmiyyətlidir. Erməni lobbisi gərginlik yaratmaq üçün özlərinə lazım olan hansısa məlumatı Avropada öz nəzarətləri altında olan media quruluşuna verir, sonra isə həmin xəbəri öz medialarında geniş tirajlayırlar. Biz də öz növbəmizdə ayıq olmalıyıq ki, belə tələlərə düşməyək.
Məhəmmədəli QƏRİBLİ
