Fransa Azərbaycan və Ermənistan arasında ədalətli sülhə töhfə vermək əvəzinə, qızışdırıcı və pozucu mövqeyini davam etdirir. Bir an belə təxribatçı və fitnəkar davranışına ara vermir.
Azərbaycan Xarici İşlər Nazirliyi oktyabrın 11-də Fransanın Avropa və xarici işlər naziri Katrin Kolonanın Fransa Senatında çıxışı zamanı Azərbaycanın ünvanına səsləndirdiyi iddiaları qətiyyətlə pisləyib.
Fransa Senatı qarşısında etdiyi çıxışda ölkənin baş diplomatı BMT Təhlükəsizlik Şurasında Qarabağı tərk etmiş ermənilərin qayıtması üçün şərait yaradılmasına dair qətnamə qəbul edilməsi ilə müşayiət olunacaq yeni diskussiya açılmasına təşəbbüs göstərdiyini elan edib.
Azərbaycan Xarici İşlər Nazirliyi Qarabağ ermənilərinin Qarabağdan kütləvi şəkildə getməsinin "Bakı tərəfindən planlaşdırılması" ilə bağlı Kolonanın iddiasını əsassız adlandırıb:
“Əslində ermənilər könüllü və heç bir təzyiq olmadan bölgəni tərk ediblər. Xanım Kolonanın fikirləri beynəlxalq təşkilatların, hətta Qarabağda mülki əhaliyə heç bir təhlükənin olmaması ilə bağlı Ermənistan Baş nazirinin 21 sentyabr tarixli bəyanatına ziddir”.
Kolonna bildirib ki, yaradılan şəraitə Qarabağda ermənilərin hüquqları üçün güclü təminatlar verilməsi və tarixi-mədəni abidələrin qorunması üçün yerdə daimi beynəlxalq mövcudluğun bərqərar olunması daxildir:
"Azərbaycan 100 mindən çox erməninin Dağlıq Qarabağdan çıxmasını planlaşdırıb və təşkil edib. Bu ağır cinayət cavabsız qala bilməz. Ermənistanla Azərbaycan arasında münaqişə danışıqlar yolu ilə həll olunmalıdır. Bakı başa düşməlidir ki, güc tətbiq etmək yolu ilə gedə bilməz".
Rəsmi Bakı isə Parisin bu cür mövqe sərgiləməsini onun Azərbaycana qarşı qərəzli siyasətini davam etdirməkdə maraqlı olması ilə əsaslandırıb:
“Fransa tərəfinə bir daha xatırladırıq ki, Azərbaycanla təhdid və təzyiq dili ilə danışmaq heç bir nəticə verə bilməz və bu kimi destruktiv əməllərə dərhal son qoyulmalıdır. Azərbaycanın suverenliyinə və ərazi bütövlüyünə qarşı bütün addımların qarşısı qətiyyətlə alınacaq”.
Azərbaycan dəfələrlə bəyan edib ki, Qarabağdan gedən ermənilər istənilən vaxt öz yerlərinə qayıda bilərlər və onların təhlükəsizliyinə dövlət olaraq zəmanət də verir. Belə olan təqdirdə, Fransa niyə BMT-də xüsusi qətnamənin qəbuluna maraq göstərir?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında xatırlatdı ki, rəsmi Bakı sentyabrın 19-da Azərbaycanın konstitusiya quruluşunun bərpa edilməsi və qanunsuz silahlı birləşmələrin sıradan çıxarılması üçün lokal antiterror tədbirlərinə başladığını bildirib: “Sentyabrın 20-də Qarabağ ermənilərinin nümayəndələri Azərbaycanın tələblərini qəbul etdikdən sonra hərbi əməliyyatlar dayandırılıb. Sentyabrın 28-də Azərbaycanın beynəlxalq ictimaiyyət tərəfindən tanınmış sərhədləri daxilində yerləşən tanınmamış “Dağlıq Qarabağ Respublikası” buraxılıb.
Bundan sonra Qarabağın erməni sakinləri kütləvi şəkildə Ermənistana köç edib. Ermənistanın rəsmi mənbələrinə əsasən, Qarabağdan Ermənistana gedən sakinlərin ümumi sayı 100 mindən artıqdır. Ancaq bu, məqsədli şəkildə şiçirdilmiş rəqəmdir. Çünki Qarabağda bu sayda erməninin olması qeyri-mümkündür. Ermənistan hökuməti baş verənləri Azərbaycanın "etnik təmizləmə" siyasəti aparması ilə əsaslandırmağa çalışır. Azərbaycan hökuməti isə öz növbəsində erməni sakinləri evlərini tərk etməməyə və Azərbaycanın çoxmillətli cəmiyyətinin bir hissəsi olmağa çağırıb, ölkədə qalmaq qərarı verənlərin hüquqlarına hörmət ediləcəyini vəd edib. Fransanın təşəbbüsü ilə bir qrup dövlətin 2023-cü il oktyabrın 11-də BMT-nin İnsan Hüquqları Şurasında Azərbaycan əleyhinə birgə bəyanat verməsi bunun ən bariz nümunəsidir. Bəyanatda Azərbaycanın Qarabağ bölgəsindən ermənilərin köçməsinin səbəblərinə dair səslənən böhtan xarakterli əsassız iddiaların arxasında, təbii ki, marionetkası olan Ermənistanın vəziyyəti yox, öz maraqları dayanır. Fransanın birdən-birə Ermənistana bu qədər “canıyananlıq” etməsi, halına acıması görüntüsü yaratması heç də zərurətlə üst-üstə düşmür. Bu, tamamilə rəsmi Parisin Cənubi Qafqazla bağlı planlarına söykənən ssenaridir. Bu, tamamilə rəsmi Parisin Cənubi Qafqazla bağlı planlarına söykənən ssenaridən başqa bir şey deyil”.
Məhəmmədəli QƏRİBLİ
