Avropa təsisatlarının Azərbaycanla bağlı qərəzli müzakirələri səngimək bilmir. Avropa Parlamenti bu həftə Strasburqda keçirilən plenar iclasında Qarabağda son vəziyyəti müzakirə edəcək. Çərşənbə axşamı baş tutacaq müzakirələrdə Avropa Komissiyası və Avropa İttifaqı Şurasının rəsmilərinin iştirakı və çıxışı gözlənilir.
Cümə axşamı isə məsələ ilə bağlı qətnamə layihəsi səsverməyə çıxarılacaq: “Çərşənbə axşamı parlament Azərbaycanın son hərbi hücumundan sonra Dağlıq Qarabağdakı fəlakətli vəziyyəti müzakirə edəcək”.
Zatən Azərbaycanın Qarabağda lokal xarakterli antiterror tədbirlərinə başladığı 19 sentyabr tarixində Avropa Parlamentinin Xarici İşlər Komitəsinin sədri Devid Mak-Allister, Cənubi Qafqaz üzrə nümayəndə heyətinin rəhbəri Marina Kalyurand və Parlamentin Azərbaycan və Ermənistan üzrə məruzəçiləri Jelyana Zovko və Andrey Kovaçev birgə bəyanat yayaraq bunu pisləyib və atəşkəsin bərpa edilməsinə çağırıb. Ancaq görünür, bununla kifayətlənmək istəmirlər.
Maraqlıdır, hansı fəlakətdən söhbət gedir? Vacibdirmi tərəflər arasında təmasların artdığı bir zamanda qətnamə qəbul olunsun?
“Avropa Parlamentində Azərbaycanla bağlı hər hansı məsələnin müzakirəsi absurddur”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyevin fikrincə, Aroparlamentin yanaşması qərəzlidir: “2020-ci ildə imzalanan üçtərəfli bəyannamədən sonra Avropa İttifaqı rəhbərliyi sülh danışıqları prosesinə ev sahibliyi etməyə başladı, görüşlər təşkil etdi. Bununla da Aİ sülh danışıqları prosesində hər hansı formada rol oynamış oldu. Son dönəmdə Aİ-nin danışıqlar prosesində tərəf kimi çıxış etməsini nəzərə alsaq, Avropa Parlamentində Azərbaycanla bağlı hər hansı məsələnin müzakirəsi absurddur. Çünki Aİ-nin rəhbəri Şarl Mişel antiterror tədbirlərinin həyata keçirilməsi ilə bağlı öz münasibətini bildirərək, Azərbaycanın heç bir qanun pozuntusuna yol vermədiyini bildirib. Bu isə elə Avropanın münasibəti deməkdir. Avropa Parlamenti isə dəfələrlə qərəzli mövqe tutub. İndi də Qarabağla bağlı hər hansı məsələnin müzakirəyə çıxarılması erməni diasporasının fəaliyyətinin nəticəsidir. Bu məsələnin bu gün hər hansı beynəlxalq təşkilatın müzakirə obyektinə çevrilməsi yenə də xristian “klubunun” və erməni diasporunun birgə olduğunu göstərir. Bu fəaliyyət isə Azərbaycanla Ermənistan arasında olan sülh danışıqlarına mane olur. Üçtərəfli bəyannamədən sonra Azərbaycan sülh üçün əlini uzadaraq, məsələnin həllini istəyir. Amma hadisələr göstərir ki, Ermənistanın və onun havadarlarının məqsədi münaqişənin həlli deyil. Çərşənbə axşamı Avropa Parlamentində Dağlıq Qarabağdakı “fəlakətli” vəziyyətin müzakirə ediləcəyi ilə bağlı verilən məlumatda isə hansı fəlakətdən söhbət getdiyi sual altındadır. Belə ki, Qarabağda hazırda heç bir fəlakətdən söhbət gedə bilməz. Fəlakət 1990-cı illərdə Azərbaycan xalqının öz ərazilərini Xocalı soyqırımı kimi faciələr nəticəsində tərk etməsi idi. Bu gün isə Azərbaycan ermənilərin qarşısına seçim qoyub. Onlar ya Azərbaycan vətəndaşlığını qəbul edərək, digər etniklər kimi firəvan həyat sürə bilər, ya da ölkə vətəndaşlığını qəbul etməyən ermənilər ərazilərimizi tərk etməlidir. Bütün bunlar isə artıq Azərbaycanın öz şəxsi işidir, heç bir dövlət bu məsələlərə müdaxilə edə bilməz. Ərazilərimizdə separatçı və terror əməlləri ilə məşğul olanlar isə Azərbaycan qanunvericiliyi ilə cəzalandırılacaqlar. Burada da heç bir faciə yoxdur”.
Vidadi ORDAHALLI
