“Wildberries” onlayn satış şirkətinin təsisçisi Tatyana Kimin sözlərinə görə, 22 iyul gecəsi Ukrayna dronları şirkətin Krasnodar və Nevinnomısskdakı logistika mərkəzlərinə hücum edib. O bildirib ki, dron hücumundan əvvəl işçilər təxliyə edilib, lakin buna baxmayaraq hücum nəticəsində xəsarət alanlar var.
O, həmçinin “Wildberries” tərəfdaşlarına müraciət edərək, vəziyyətlə bağlı bütün yenilənmiş məlumatların satıcının portalında yerləşdiriləcəyini qeyd edib. Bazarın baş direktoru "Yalnız rəsmi mənbələrə etibar edin" deyə çağırıb.
Krasnodar diyarı təcili yardım mərkəzi Krasnodarda anbara edilən hücum nəticəsində üç nəfərin yaralandığını təsdiqləyib. Yerli sakinlər ərazidə bir neçə ayrı yanğını göstərən görüntülər paylaşdılar. Şahidlər həmçinin 20-30 partlayış səsi eşitdiklərini bildiriblər. Onlar hava hücumu barədə xəbərdarlıq sireninin yalnız hadisədən sonra səsləndiyini, təxminən iki dəqiqə ərzində səs-küy saldıqdan sonra söndürüldüyünü bildiriblər.
Stavropol diyarının qubernatoru Vladimir Vladimirovun sözlərinə görə, Nevinnomıssk şəhərindəki anbar kompleksinə dron hücumu nəticəsində beş işçi yaralanıb.
Şəhər administrasiyasının məlumatına görə, dünən gecə Armavirdəki neft anbarına da dronlar hücum edərək 800 kvadrat metr ərazini bürüyən yanğına səbəb olub. Hadisə yerində 40-dan çox təcili yardım işçisi işləyir. Bundan əlavə, vurulan dronların parçaları Krasnodarda iki çoxmənzilli binaya ziyan vurub. İlkin məlumatlara görə, itki olmayıb.
Hücuma məruz qalan “Wildberries” anbarları şirkətin ən böyük anbarları arasındadır. Sahəsi 150.000 kvadratmetr olan Krasnodar obyekti bazarın anbarları arasında dördüncü, sahəsi 120.000 kvadratmetr olan Nevinnomyssk mərkəzi isə altıncı yerdədir.
Bundan əvvəl Ukrayna dronları Moskva yaxınlığındakı Elektrostal və Tambov vilayətindəki Kotovskdakı “Wildberries” logistika mərkəzlərinə hücum etmişdi. Kotovskda yeddi nəfər həlak olmuş, 24 nəfər yaralanmışdı. Elektrostalda bir işçi həlak olmuş, 50-dən çox insan yaralanmışdı. Hücum bazarın ümumi logistika tutumunun təxminən 9%-ni sıradan çıxarmışdı.
Data Insight şirkətinin aparıcı analitiki Sergey Semkonun sözlərinə görə, təxminən 30 milyard rubl dəyərində olan iki mərkəzdən əlavə, yanğınlar orada saxlanılan ən azı 150 milyard rubl dəyərində malları da məhv edib. O, həmçinin yanmış inventarın dəyərinin 170-230 milyard rubla çata biləcəyini təxmin edir.
“Wildberries” şirkətinin təsisçisi Kim əvvəllər şirkətin mallarını itirən satıcılara kompensasiya ödəmək imkanlarını araşdırdıqlarını bildirmişdi. Lakin, “Forbes” qeyd edir ki, bunun üçün bazarın bütün illik mənfəətinə bərabər məbləğ tələb olunacaq. Həmçinin, 7 iyulda “Wildberries”in dron hücumları, raketlər və digər sursatlar nəticəsində yaranan məhsul itkilərinə görə məsuliyyətdən imtina edən yenilənmiş təklifi qüvvəyə minmişdi.
Tahir TAĞIYEV
