İsrail Knessetinin 30 deputatı Azərbaycan Milli Məclisinə müraciət edib. Sənədi imzalayanlar arasında Netanyahu hökumətinin 9 naziri və 2 nazir müavini var. Sənədi Knessetin 8 partiyasının deputatları imzalayıb. Diqqəti çəkən odur ki, indiyə qədər bütün əsas siyasi qüvvələrin Azərbaycana birmənalı dəstək göstərməsi qeydə alınmayıb.
Müraciətdə deyilir ki, Azərbaycanla tərəfdaşlıq İsrailin regional təhlükəsizlik sisteminin əsasını təşkil edir: “Bizim ümumi təhlükəli düşmənimiz var – hər iki xalqımızı məhv etmək təhlükəsi ilə üzləşən İran diktaturası. Bu tərəfdaşlıq İsrailin regional təhlükəsizlik sisteminin əsasını təşkil edir”.
Knesset deputatları və hökumət rəsmiləri də Fransa Senatının noyabrın 15-də Azərbaycana qarşı sanksiyaların tətbiq edilməsini və Avropa İttifaqının bu ölkədən qaz və neft alışına embarqo qoyulmasını tələb edən qətnaməsindən xoşagəlməz şəkildə təəccübləndiklərini qeyd ediblər: “Bu qərar Azərbaycanı zəiflətməkdə maraqlı olan, İsrail və Qərb dünyası ilə sıx əlaqələr saxlayan İrana sərf edir. Ümid edirik ki, Senat bu qərarı yenidən nəzərdən keçirəcək”.
Diqqəti çəkən odur ki, İsrail tərəfi Fransanın Azərbaycanla bağlı ədalətsiz siyasətini qəbul etmir. Bir növ, bununla Fransanın Azərbaycan siyasətini kəskin tənqid edirlər. Bu gün Azərbaycana münasibətdə Fransanı İranla eyniləşdirirlər. Bu çox düzgün yanaşmadır. Ona görə ki, hər iki dövlət bu gün Azərbaycana qarşı açıq-aşkar düşmənçilik siyasəti aparır.
“Nəzərə alsaq ki, yəhudi lobbisi Avropada da güclü təsir imkanlarına malikdir, bu baxımdan ortaya qoyulan belə mövqe təsirsiz ötüşməyəcək”
Sözügedən məsələ ilə bağlı fikirlərini “Bakı-Xəbər”lə bölüşən Yeni Yol Partiyasının sədri Ramil Hüseynov hesab edir ki, İsrail Azərbaycanla münasibətlərə xüsusi önəm verir: “Bu, Azərbaycan müstəqillik əldə edəndən bəri belədir. Çüni iki ölkə arasında dostluq əlaqələri tarixi ənənələrə söykənir. İsrail hər zaman Azərbaycan dövlətini dəstəkləyib. Dünyadakı yəhudi lobbisi ölkəmizin maraqlarının təmin olunmasına xüsusi diqqət göstərib. Son illərdə isə Azərbaycan-İsrail münasibətləri keyfiyyətcə yeni mərhələyə daxil olub. İsrail dövləti açıq formada Azərbaycanı dəstəkləyir. 44 günlük Vətən müharibəsi dönəmində erməni lobbisi bütün vasitələri işə saldı ki, İsrail Azərbaycana müasir silahların satışını dayandırsın. Ancaq Ermənistan buna nail ola bilmədi. Üstəlik, İsrail Azərbaycanla olan münasibətləri nəzərə alaraq, bizə satdığı silahları Ermənistana satmadı. İsraildəki siyasi qüvvələrin Azərbaycan məsələsində belə həmrəylik göstərməsi həm də rəsmi Bakının orada səfirlik açmaq barədə verdiyi qərarla bağlıdır. Bununla İsrail Fransaya mesaj verir ki, Azərbaycan tək deyil. Bu həm də o deməkdir ki, Makron hakimiyyətinin Azərbaycanla bağlı siyasəti yanlışdır. Yəni bu təkcə Azərbaycana qarşı yox, İsrailin maraqlarına qarşı yönəlmiş bir siyasətdir. Nəzərə alsaq ki, yəhudi lobbisi Avropada da güclü təsir imkanlarına malikdir, bu baxımdan ortaya qoyulan belə mövqe təsirsiz ötüşməyəcək. Əminəm ki, yəhudi lobbisinin göstərəcəyi fəallıq Fransanın Azərbaycanla bağlı məkrli siyasi oyunlarının qarşısının alınmasında mühüm rol oynayacaq. Knesset deputatlarının məlum müraciəti bu baxımdan xəbərdarlıq xarakterlidir”.
Vidadi ORDAHALLI
