Ermənistanın Gümrü şəhərində Rusiya əleyhinə keçirilən aksiyada 65 nəfər saxlanılıb. Bu barədə Ermənistan Polisinin mətbuat xidmətinin rəsmisi Zarzand Qabrielyan məlumat verib.
102-ci Rusiya hərbi bazasının qarşısında keçirilən aksiyada polislə etirazçılar arasında qarşıdurma yaşanıb. Aksiyaçılar Rusiya əleyhinə, eləcə də KTMT-ni pisləyən: “Rusiya Türkiyə və Azərbaycanın müttəfiqidir!”, “Ar olsun belə müttəfiqə!”, “KTMT-yə yox!” və s. şüarlar səsləndiriblər.
Ermənilərin məhz indiki məqamda Rusiya hərbçilərinə qarşı nümayiş etdirdiyi taktika nədən qaynaqlana bilər?
Politoloq Əhəd Məmmədli “Bakı-Xəbər”ə açıqlamasında bildirdi ki, tarixə nəzər yetirdikdə görərik ki, son iki yüz ildə ermənilərin bu torpaqlarda yerləşdirilmısi rysların hesabına olub: “ Rusiya olmasaydı, ermənilərin bu çoğrafiyaya yerləşməsi də baş verməyəcəydi. Ancaq ermənilər çox unutqan millətdi. Onlar hesab edir ki, KTMT üzvü olduqları üçün Rusiya Azərbaycana qarşı vuruşmalıdır. Hətta ermənilər istəyirlər ki, bütün xristian dünyası onlara görə Azərbaycan və Türkiyə ilə vuruşsun. Əslində Ermənistanda yaranan bu anti-rus daığası Azərbaycanın marağına xidmət edir. Azərbaycan bu vəziyyətdən maksimum yararlanmağı bacarmalıdır. Erməni lobbisinin güclü olduğu Qərb və ABŞ istəyir ki, nəyin bahasına olursa-olsun, Ermənistanı Rusiyanın caynağından çıxarsın. Paşinyan da istəyir ki, Rusiya oranı tərk etsin. Bunu açıq şəkildə edə bilmir ki, əlavə ərazi itkilərinə məruz qalmasın. Qarabağ müharibəsindəki məğlubiyyət Ermənistanın gözünü bir az da qorxudub”.
Politoloqun sözlərinə görə, dünyada gedən proseslər fonunda Rusiyanın Cənubi Qafqazdan vurulub çıxarılması və onu burada NATO ilə əvəzləməsinə çalışılır:
“Rusiya qoşunları 2049-cu ilə qədər Gümrüdə qalmaq üçün mandat alıblar. Nəzəri baxımdan mümkündür ki, bu tarixdə aşağı-yuxarı hər hansı dəyişikliklər olsun. Bölgədə baş verəcək ciddi dəyişikliklərin fonunda ola bilsin Rusiya qoşunları Ermənistandan daha tez çıxsınlar. Bunu isə biz yaxın illərdə daha aydın və açıq şəkildə görə və hiss edə bilərik”.
Erməni siyasilər də Paşinyanın bu missiyanı yerinə yetirdiyini söyləyirlər. Ermənistan Respublikaçılar Partiyasının idarə heyətinin üzvü Eduard Şarmazanov erməni mediasına deyib ki, Qərbin Nikol Paşinyanı Ermənistan hakimiyyətinə gətirmə səbəbi bu ölkəni Rusiyanın kurasiyasından çıxarmaq olub:
"Paşinyanın qarşısında duran əsas missiya Rusiyanı Cənubi Qafqaz regionundan çıxarmaq, bu ölkənin hərbi bazalarının bağlanmasına nail olmaqdır. Sonradan Qərb Ermənistana Qarabağ məsələsi üzrə də müəyyən tələblər irəli sürüb. Qarabağ tam olaraq, Xankəndi də daxil olmaqla, Bakınin nəzarətinə veriləcək. Bir dənə güllə atılmadan. Paşinyan Qərbin dediklərinə heç nə edə bilməz - istəsə belə. Bunu da demək vacib olardı ki, bu gün İrəvan hakimiyyətinin üz döndərdiyi Rusiya olmasa idi, Ermənistan adlanan dövlət də olmazdı. Əgər bizim hazırda əlimizdə nəsə varsa, Kremlin sayəsindədir".
Hər halda görünən budur ki, Rusiyanın Ermənistanda sıxışdırılması İrəvana yaxşı nəsə vəd etmir. Bizə isə bu vəziyyət sərf edir.
Məhəmmədəli QƏRİBLİ
