Məlum olduğu kimi, Heydər Əliyevin 100 illiyi ilə bağlı 2023-cü il Prezident İlham Əliyevin imzaladığı sərəncama əsasən Heydər Əliyev ili elan olunub.
Bu məqsədlə həm ölkə daxilində, həm də xaricdə tədbirlərin keçirilməsi - bir sıra tanıtım çarxlarının, filmlərin, sərgilərin təqdimatının keçirilməsi, kitabların yazılması planlaşdırılır. Heydər Əliyev təkcə Azərbaycanda deyil, eyni zamanda onun hüdudlarından kənarda kifayət qədər tanınan adamdır. Bütün bunlar həm də o deməkdir ki, sözügedən tədbirlər Azərbaycanın tanıdılmasına xidmət edəcək.
O baxımdan, 2023-cü ilin Heydər Əliyev ili elan edilməsi dünya xalqlarının Azərbaycan barədə məlumat bazasının zənginləşməsinə necə təsir edəcək?
“Bu da imkan verəcək ki, dünya dövlətləri, orada yaşayan insanlar Azərbaycan barədə daha çox məlumat əldə etsinlər”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, Heydər Əliyev ili çərçivəsində keçirilən tədbirlər Azərbaycan barəsində məlumatların dünyada daha çox yayılmasına xidmət edəcək: “Bəli, bu il Heydər Əliyevin 100 illiyi qeyd olunacaq. Bununla bağlı ölkədə Heydər Əliyev ili elan olunub və bu çərçivədə bir sıra işlər görülür. Dərs dediyim Universitetdə bununla bağlı yaradılan təşkilat komitəsinə biləvasitə rəhbərlik edirəm. Hər halda bu tədbirlər çərçivəsində Heydər Əliyev irsi daha geniş və obyektiv tədqiq ediləcək. Bu o deməkdir ki, sözügedən məsələlərlə bağlı görülən işlər müxtəlif dillərdə təqdim olunacaq. Bu da imkan verəcək ki, dünya dövlətləri, orada yaşayan insanlar Azərbaycan barədə daha çox məlumat əldə etsinlər. Azərbaycanın tarixən şəxsiyyətləri, liderləri olub. XX əsr liderləri içində Heydər Əliyev xüsusilə fərqlənir. 2021-ci ildə imzalanan Şuşa bəyannaməsinə fikir versək görərik ki, orada bir sıra məsələlər öz əksini tapıb. Artıq dünyada geniş yayılıb ki, Azərbaycanın dövlətçiliklə bağlı böyük bir şəxsiyyəti var. Ona görə də, biz Heydər Əliyev şəxsiyyətini dünya miqyasında təbliğ etməklə, həm də Azərbaycanı təbliğ etmiş oluruq. Bu hansı şəkildə olacaq? Müxtəlif kitabların nəşr edilməsi və tərcümə olunmaqla yayılması. Saytların yaradılması, onlayn sistemdən istifadə etməklə sosial şəbəkələrdə məlumatların yayılması bu baxımdan mühüm əhəmiyyət kəsb edir. O baxımdan, sözügedən məsələdə diasporanın, səfirliklərin üzərinə böyük iş düşəcək. Bu yöndə görüləcək işlər dövlətçiliyimiz üçün mühüm əhəmiyyət kəsb edir. Çünki bu çərçivədə həm də Azərbaycan dünya müstəvisində təbliğ olunacaq. Nəzərə almaq lazımdır ki, dövləti şəxsiyyətlərinə görə dünyada tanıyırlar. Böyük şəxsiyyəti olan dövlətlər də sayılan dövlətlərdir. Azərbaycan böyük şəxsiyyətləri olan bir xalq kimi dünyada imic qazanıb. Üstəlik, 44 günlük Vətən müharibəsindən sonra dünya Azərbaycanın yeni liderini daha yaxşı tanıdı. Bu da Azərbaycan xalqının böyüklüyünü göstərir”.
Vidadi ORDAHALLI
