Ölkəmizdə vətəndaş rifahının təminatı, həssas əhali qruplarının sosial müdafiəsinin gücləndirilməsi Prezident İlham Əliyevin rəhbərliyi ilə həyata keçirilən sosial siyasətin əsas istiqamətlərindən birini təşkil edir. Dövlət başçısının 2023-cü ilin ilk iş günündə imzaladığı “Əhalinin sosial rifahının yaxşılaşdırılması sahəsində əlavə tədbirlər haqqında” Sərəncam son illərdə bu istiqamətdə ardıcıl və geniş miqyas alan sosial islahatlar çərçivəsində atılmış növbəti addımdır.
Minimum əmək haqqının artması bütün sahələrə təsir edəcək. Bu möbzu ilə bağlı Əməkdar incəsənət xadimi, tanınmış şair Baba Vəziroğlu həmsöhbət olduq.
- Ötən həftə ölkə başçısı İlham Əliyev “Əhalinin sosial rifahının yaxşılaşdırılması sahəsində əlavə tədbirlər haqqında” sərəncam imzalayıb. Sərəncama əsasən minimum əmək haqqı artacaq. Bu artımı necə dəyərləndirirsiz?
- Minimum əmək haqqının artması, bütün sahələrdə olduğu kimi, mədəniyyət sahəsinə də təsir edəcək. Minimum əmək haqqının artımı ölkədə həm dövlət, həm özəl sektorda çalışanların ay ərzində əldə etdikləri maaşların ən aşağı səviyyəsini müəyyən edir. Yəni heç bir yerdə - nə dövlət, nə özəl sektorda - işəgötürənin işçiyə bundan aşağı əmək haqqı verməyə ixtiyarı yoxdur. Məlumdur ki, özəl şirkətlərdə vəziyyət başqa idi. Dövlət sahəsində qayda-qanun var idi, ancaq özəl sektorda vəziyyət fərqli idi.
- Özəl sektorda nə kimi problemlər var idi?
- Özəl şirkətlər öz işçilərinə minimum əmək haqqından aşağı məvacib verə bilməz. İndiyə qədər belə faktlar çox olub. Məsələn, şirkət kimisə işə götürürdü və həmin işçiyə 200 manat əmək haqqı verirdi. İşə ehtiyacı olan şəxs də çarəsizcə həmin məvacibi qəbul edirdi. Ancaq indi özəl şirkətlərin əsas vəzifə borcu o olacaq ki, dövlətin müəyyən etdiyi minimum əmək haqqından az məvacib verməsin. Şirkət işçiyə minimum əmək haqqından az maaş verərsə işçi həmin müəssisədən şikayət edə bilər. Bu kimi hadisələr mədəniyyət sahəsində də yaşanırdı. Artıq bu sahədə yaşanan problemlər öz həllini tapacaq.
- Minimum əmək haqqının artması mədəniyyət sahəsində çalışanların, ümumiyyətlə, əhalinin sosial vəziyyətinə necə təsir edəcək?
- İnsan amili, vətəndaşların sosial rifahının yüksəldilməsi dövlətin sosial siyasətinin prioritetlərindəndir. Azərbaycan xalqının rifah halının yüksəldilməsi üçün görülən işlər, atılan əməli addımlar qəbul olunmuş qərar və sərəncamlarda öz əksini tapır. Onu da xüsusilə qeyd etməliyik ki, cənab Prezident İlham Əliyev Azərbaycan xalqının xoşbəxtliyi, dövlətimizin inkişafı və beynəlxalq aləmdə tanınması üçün bütün gücü ilə çalışır. İmzalanan sosial sərəncamlar və həyata keçirilən mühüm layihələr bunun parlaq nümunəsidir. Ümumiyyətlə, bu sərəncam sosial təminata daha çox ehtiyacı olan vətəndaşlarımızın sosial müdafiəsinin gücləndirilməsi baxımdan vacibdir.
- Minimum əmək haqqı artımı prezident və digər təqaüdlərin artmasına da təsir edəcək…
- Bəli, yeni sərəncam sayəsində prezident və digər təqaüdlərin həcmi artacaq. Əməkdar mədəniyət işçiləri 120 manat, xalq artistləri isə 180 manat alırdı. Indi o məbləğlər də artacaq. Danılmaz faktdır ki, maaş və pensiya artımı insanların güzəranına müsbət təsir edir.
- Qeyd etdiniz ki, minimum əmək haqqı artımı insanların güzəranına yaxşı mənada təsir edəcək.
- Dövlət vətəndaşların rifahını düşünür və vətəndaşların rifahının daha da yüksəlməsi üçün davamlı olaraq müxtəlif addımlar atır. Əlbəttə ki, bu siyasət növbəti ildə də davam etdiriləcək. Dövlət bu sahəyə öz diqqətini və qayğısını hər il artıracaq.
Günel CƏLİLOVA
