Türkiyə Ermənistanla sərhəddə yerləşən Ağrı dağında modul tipli hərbi baza tikir. Türkiyə mətbuatının məlumatına görə, dəniz səviyyəsindən 2100 metr yüksəklikdə yerləşən hərbi baza müasir gecəgörmə kamera sistemləri və təyinatlı silahlarla təchiz olunacaq.
Qeyd olunur ki, Türkiyə “terrorla mübarizə aparmaq üçün” bu hərbi bazanı tikir. Görünən budur ki, Türkiyənin bu addımından daha çox narahat olan Ermənistandır.
Bazanın tikiləcəyi ərazı Türkiyənın Naxçıvanla olan sərhədinə də çox yaxındır. Buna eyni zamanda Naxçıvanın müdafiəsinin möhkəmləndirilməsi və təhlükəsizliyinə yönəlmiş bir addım kimi də baxmaq olar. Çünki hazırda Ermənistanda revanşizm pik həddədir. Bundan həm Azərbaycana, həm də Türkiyəyə qarşı istifadə etməyin tərəfdarı olan ermənilər kifayət qədərdi. Bunu yaxşı dərk edən erməni ekspertlər bu məlumat ətrafında ciddi spekulyasiyalara start veriblər. Bu bazanın əslində Rusiyanın Ermənistandakı 102-ci bazasına alternativ olduğu ilə bağlı rəy formalaşdırırlar. Bununla da Rusiya-Ermənistan münasibətlərinə xələl gətirmək istəyirlər. Hər nə olursa-olsun, Ermənistan bilməlidir ki, Türkiyə müstəqil bir ölkə kimi öz hüdudları çərçivəsində istənilən yerdə hərbi baza yaratmaq səlahiyyətinə sahibdir. Belə olan təqdirdə, Ermənistanın bu əndişəsini nə ilə izah etmək olar?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, hər bir dövlətin öz ərazi bütövlüyünü, təhlükəsizliyini qorumaq hüququ var:
“Xüsusilə də, son vaxtlar artan terror təhdidlərinin fonunda bunu etmək çox məqsədəuyğundur. Türkiyə belə təhdidlərdən daha çox əziyyət çəkən ölkədir. Uzun illərdir ki, həm ölkənin daxilində, həm də xaricdə terrorla mücadilə edir. Ermənilərin Türkiyəyə münasibəti bəllidir. Onlar qardaş ölkəyə qarşı açıq şəkildə ərazi iddiaları irəli sürürlər. Hətta dövlət rəmzlərində indi bazanın qurulduğu Arğı dağının şəklini əks etdirirlər. Sözügedən ərazinin olduqca böyük strateji önəmi var. XX əsrin əvvəllərində ermənilər orada kütləvi qırğınlar ediblər. Sonra qulağı kəsilən Andranikin rəhbərliyi ilə Azərbaycan ərazilərinə keçiblər. Türkiyə dövləti bilir ki, Ermənistanın ona qarşı olan fikirləri sərsəmdir. Ancaq buna baxmayaraq, öz ehtiyatını görür. Çünki bəzi böyük ölkələr Türkiyənin inkişafının qarşısını almaq üçün Ermənistandan bir layihə kimi istifadə edə bilərlər. Bu ölkəni elə belə məqsədlər üçün yaradıblar. Bir amili də nəzərə alaq ki, Arğı dağı həm də İrana yaxın ərazidir. Türkiyə özünə aid bütün həssas nöqtələrdə hərbi bazalar tikib və bu işi davam etdirir. Ağrıdakı addımı ilə o, həm də Naxçıvanın təhlükəsizliyinə ciddi qarant vermiş olur. Bu mesajdan çoxları özünə pay götürməlidir ki, gələcəkdə xam xəyallara düşməsinlər. Türkiyə hərbi cəhətdən çox güclənir. Artıq onun özü-özünü silahla təmin etmə əmsalı 20-dən 80 faizə qalxıb. Belə irəliləyişin fonunda, onun həssas bölgələrdə bazalar yaratmasına təbii baxmaq lazımdır. Türkiyə Qətərdə, Suriyada öz hərbi bazaları ilə mövcuddur. Türkiyə öz siyasətini mərdliklə aparır. Rusiya ilə Ukrayna müharibə edir, ancaq hər ikisi Türkiyə və Azərbaycandan razıdır. Türkiyə həm Rusiya ilə müttəfiqlik edir, həm də Ukraynaya “Bayraktar” satır. Bunu açıq şəkildə etdiyi üçün, Rusiya anlayışla qarşılayır. Demək istədiyim budur ki, bunlar ortada ola-ola, ermənilər Türkiyə öz ərazisində baza tikdiyinə görə Rusiya ilə onun münasibətlərinə xələl gətirə bilməzlər. Qardaş ölkənin bu addımı alqışa layiqdir”.
Məhəmmədəli QƏRİBLİ
