“Sentyabr toqquşmaları bizi gələcəkdə böyük problemlərdən sığortalayacaq”. Bu barədə Prezident İlham Əliyev Qərbi Azərbaycandan olan bir qrup ziyalı ilə görüşündə bildirib.
Ölkə başçısının sözlərinə görə, il ərzində bir çox önəmli hadisələr baş verib: “Biz Azərbaycan-Ermənistan sərhədində məcburən hərbi əməliyyat keçirməli olduq. Bu hərbi əməliyyat nəticəsində bizim tarixi şəhərlərimiz bu gün artıq vizual müşahidə yolu ilə gözümüzün önündədir. Bu gün biz artıq Bala Göyçənin sahilindəyik. Bu gün biz Göyçə gölünü binoklsuz görürük. Birincisi, hesab edirəm ki, bu, ədalətlidir. İkincisi, sentyabr toqquşmaları bizi gələcəkdə böyük problemlərdən sığortalayacaq. Çünki Ermənistanda revanşist qüvvələr baş qaldırır. Onlar yenə də ümid edirlər ki, kimsə gələcək onların əvəzinə bizimlə müharibə aparacaq, onlar da hər zaman olduğu kimi, hansısa himayədarın arxasında gizlənərək yenə də bizə qarşı öz məkrli planlarını həyata keçirəcəklər. Bax, özümüzü bundan sığortalamaq üçün biz mütləq Azərbaycan-Ermənistan sərhədi istiqamətində daha əlverişli mövqelərə sahib olmalı idik və buna nail olduq. Bu gün yerləşdiyimiz yüksəkliklərdən hətta Naxçıvan dağları da görsənir”.
“Ermənistanın yaşayış məntəqələri, kommunikasiya və yol qovşaqları vizual nəzarətimiz altındadır”
Məsələyə münasibət bildirən hərbi ekspert İbrahim Rüstəmlinin fikrincə, Ali Baş Komandanın arqumentləri tamamilə reallığı əks etdirir: “Avqustda keçirilən “Qisas” əməliyyatı ermənilərə dərs olmadı. Hansı ki, həmin əməliyyatlar nəticəsində Qarabağ istiqamətində Sarıbaba, Buzluq və digər strateji əhəmiyyətli yüksəkliklər nəzarətə götürüldü. Məhz bu əməliyyatdan sonra Ermənistan Laçın şəhərini boşaltmağı tezləşdirdi. Avqustun 26-da Laçın şəhəri ordumuzun nəzarətinə keçdi. Güman olunurdu ki, Ermənistan təxribatlara son qoyacaq. Ancaq bunun tam əksinə olaraq Ermənistan Azərbaycanla sərhəd ərazilərdə, əsasən də Laçın və Kəlbəcər istiqamətində təxribatların miqyasını genişləndirdi. Belə olan halda sentyabrın 14-də ordumuz düşmənə çox güclü zərbələr endirdi. Olduqca vacib strateji yüksəkliklər nəzarətə götürüldü. Ermənistanın yaşayış məntəqələri, kommunikasiya və yol qovşaqları vizual nəzarətimiz altındadır. Sentyabr döyüşlərində 224 erməni əsgəri məhv edildi və bunu qarşı tərəf rəsmi səviyyədə təsdiq edib. Bütün bunlar o deməkdir ki, bundan sonra Ermənistan ərazilərimizi işğal etməyə cəsarət edə bilməz. Çünki strateji hərbi nöqteyi-nəzərdən bu, mümkün deyil. Ona görə ki, hakim yüksəkliklər ordumuzun nəzarətindədir. Bu, həm bizi gələcək hücumlardan sığortalayır, həm də işğal altında qalan Qazaxın 7 kəndinin qaytarılmasına zəmin yaradır. Ona görə də sentyabrda ordumuzun əldə etdiyi uğurların çox böyük hərbi və siyasi əhəmiyyəti var. Ümumilikdə bütün bunlar bizə bir sıra avantajlar vəd edir. Ermənistanın təcavüzkarlıq istəklərini cilovlamaq baxımından bütün bu uğurların müstəsna böyük əhəmiyyəti var. Ona görə də bu imkanlardan maksimum istifadə etməliyik”.
Vidadi ORDAHALLI
