“Zənglər ola bilər, hansısa bəyanatlar ola bilər, onlara əhəmiyyət vermək lazım deyil”. Bu barədə Prezident İlham Əliyev Qərbi Azərbaycandan olan bir qrup ziyalı ilə görüşündə bildirib.
Ölkə başçısının sözlərinə görə, Qarabağda qanunsuz fəaliyyətə etirazla bağlı kimsə bizi dayandıra bilməz: “Baxmalıdırlar orada hansı işlər baş verir və o qanunsuz fəaliyyət dayandırılmalıdır. Bizim haqlı tələbimiz bundan ibarətdir. Ancaq bu gün bu vəziyyət tamamilə təhrif edilmiş tərzdə təqdim olunur. Yenə yalan, yenə iftira, yenə böhtan, kim bunu edir, biz hamımız yaxşı bilirik. Ermənistan dövləti hazırda burada ilk sıralarda deyil. Amma bu, bizi heç nədən çəkindirməyəcək. Biz artıq bunu dəfələrlə sübut etmişik və İkinci Qarabağ müharibəsi bunu göstərdi, müharibədən keçən iki il bunu göstərdi. Heç kim bizə təsir göstərə bilməz. Zənglər ola bilər, hansısa bəyanatlar ola bilər, onlara əhəmiyyət vermək lazım deyil. Sadəcə olaraq, siyasi nəzakət naminə biz bu zənglərə cavab veririk. Ancaq bu, bizim mövqeyimizi zərrə qədər dəyişməyəcək”.
“Prosesi bu və ya digər amillər vasitəsilə ləngitməyə cəhd etmək olar, lakin onun qarşısını hüquqa söykənərək almaq mümkün deyil”
Məsələyə münasibət bildirən politoloq Elşən Manafovun fikrincə, bütün bunlar onu göstərir ki, təbii ehtiyatların qanunsuz istismarına Azərbaycan sona qədər etiraz edəcək: “Yəni, bu, o deməkdir ki, heç bir tərəf sözügedən məsələdə bizi güzəştə getməyə məcbur edə bilməz. Qarabağın Azərbaycan dövlətçiliyinə ərazi baxımdan bağlılığı beynəlxalq birlik tərəfindən qəbul və təsdiq edilib. Bu, hüquqi səciyyə təşkil edən faktdır. 1991-ci ilin Alma Ata bəyənnaməsi, habelə 1992-ci ildə BMT-yə qəbul olunmağımız bizlərin beynəlxalq aləmə inteqrasiya olunmağımız istiqamətində ilk addımlar olmaqla yanaşı, həm də ərazi bütövlüyümüzün təsdiqi baxımından ciddi əhəmiyyət kəsb edən hadisələrdir. 30 ildən yuxarı Qarabağ problemi ilə bağlı ATƏT-in Minsk Qrupunun vasitəçiliyi ilə aparılan danışıqlarda suveren hüquqlarımız müzakirə predmeti olmayıb. Daha dəqiq desək Azərbaycan buna imkan verməyib. Ermənistanla iki il əvvəl apardığımız müharibədə əldə etdiyimiz qələbədən sonra bizim Qarabağda suveren hüquqlarımızın de-fakto təmin edilməsi istiqamətində hüquqi zəmində addımlar atacağımız gözlənilən idi. Qarabağda bu istiqamətdə addımlar atacağımız 2020-ci ilin Moskva razılaşmasının şərtləri baxımından da gözlənilirdi. Sadəcə, bu bəyənatın razılaşdırıldığı dövrdən keçən müddət ərzində Ermənistanın qeyri-konstuktivliyi, habelə Rusiya sülhməramlılarının öz üzərlərinə götürdükləri öhdəliklərin icrası istiqamətində addımların atılmaması, bizim Qarabağda suveren hüquqlarımızın bərpası ilə bağlı proseslərdə əyləc mexanizmi olub. Hazırda Qarabağda Azərbaycan dövlətinə aid olan yataqların oradakı separatçı rejim tərəfindən qeyri-qanuni istismarı beynəlxalq hüquq normaları baxımından ciddi qanun pozuntusu olmaqla yanaşı, haqlı olaraq bizlərdə etiraz doğurur. Bu məsələyə aydınlığın gətirilməsi məqsədilə müvafiq dövlət strukturlarımızın monitorinq keçirmək niyyəti tamamilə qanunidir. Hesab edirəm ki, bunu Qarabağdakı separatçi rejim, habelə ona himayədarlıq edən bəlli dairələr də bilməmiş deyillər. Azərbaycanın bununla bağlı mövqeyi onun haqq işidir. Prosesi bu və ya digər amillər vasitəsilə ləngitməyə cəhd etmək olar, lakin onun qarşısını hüquqa söykənərək almaq mümkün deyil. Həm də unutmaq lazım deyil ki, tarix qalibləri mühakimə etmir”.
Bu baxımdan politoloq hesab edir ki, Azərbaycan sona qədər bunun üzərinə gedəcək.
Vidadi ORDAHALLI
