Rusiyadan qaçaraq, Qarabağa sığınmış milyarder Ruben Vardanyan Xankəndidə təşkil edilən aksiyada çıxış edib.
Rusiyada topladığı çirkli vəsaitləri Qarabağda yumaqla və burda da qanunsuz yollarla pul qazanmaqla məşğul olan Vardanyan indi də siyasi separatizmlə məşğul olduğunu gizlətməyib.
O deyib ki, ermənilərin “bu situasiyanı qəbul edib, döyüşə hazır olmasından” qürur duyur. Vardanyan onların 3 yolu olduğunu bildirib:
“Birincisi – Azərbaycana inteqrasiya olunuruq, ikincisi, burdan köçüb gedirik, üçüncüsü, savaşırıq. Mən 2 sentyabrda qərar vermişəm ki, Azərbaycana tabe olmayacam, burdan getməyəcəm, mübarizə aparacam. Hər şeyimi müstəqilliyə qurban verəcəm. Möcüzə gözləməyin, möcüzə olmayacaq, qarşıda bizi olduqca çətin yol gözləyir”.
Vardanyanın separatizmi dəstəkləyən bu açıq çıxışı barədə ekspertlər nə düşünür?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, erməni əsilli milyarderin missiyasının əsl mahiyyəti yavaş-yavaş üzə çıxır: “ Ruben Vardanyan Moskvadan təkcə Qarabağa rəhbərlik etmək üçün göndərilməyib. Həm də yalnız Rusiyanın Qarabağla bağlı planlarını icra etmək üçün göndərilməyib. Eyni zamanda əsas hədəf Ermənistanda hakimiyyəti ələ keçirməkdir. Rusiyanın bundan əvvəl istifadə etdiyi Köçəryan və Sarkisyan artıq canlı meyit hesab olunur. Və onlardan nəsə gözləmək qeyri mümkündür. Vardanyanın Qarabağa göndərilməsinin əsas məqsədi də məhz Ermənistanda hakimiyyətə Rusiyanın yaxın bir kadrını gətirməkdir. Vardanyanın bəyanatı onun nə qədər reallıqdan uzaq, ağılsız biri olduğunu göstərir. Azərbaycanla müharibə etmək, Azərbaycana güc göstərmək hətta Rusiyanın ciddi dəsyək verəcəyi halda belə qeyri mümkündür. Qarabağdakı ermənilər Azərbaycanın qarşısında zor gücünə dayana bilməz”.
Partiya sədri hesab edir ki, Ermənistan artıq yaxasını kənara çəkmək barədə qərar verib və addım - addım bu istiqamətdə irəliləyir: “Bu səbəbdən Vardanyanın bu avanturizmi təbiidir ki, ilk növbədə Qarabağ ermənilərinə çox ciddi problemlər yarada bilər. Bu mətni ona Rusiyadan ötürdüklərini güman etmirəm. Rusiyadan təbii ki, təlimatlandırıb göndəriblər. Ancaq özfəaliyyət də hiss olunur. Həmçinin hiss olunur ki, Ruben Vardanyan siyasi cəhətdən tam hazırlıqsız, avantürizmə meylli, o qədə dərin ağlı olmayan bir adamdır. Onun səviyyəsində olan adamlar ermənilərə kifayət qədər faciələr yaşatdılar. Görünür indi növbə bu avantüristə çatıb. Bir şey aydındır ki, Azərbaycanı qarşıda kifayət qədər ciddi mübarizə gözləyir və hamımız bu mübarizədə əlimizdəm gələni etməyə çalışmalıyıq”.
Əslində, Vardanyanın Qarabağa hansı məqsədlə göndərildiyinə dair ən dəqiq izahı bir müddət əvvəl cənab Prezident dəqiq vermişdi.
Qarabağda qalan ermənilərin taleyinin müəyyənləşdirdiyi yeganə tərəfin Azərbaycan olacağı bu gün Ermənistanın özündə, erməni dairələrində açıq etiraf olunur. Bu hal Qarabağdakı separatçı rejimin “dövlət naziri” elan edilən Ruben Vardanyanla bağlı məsələdə belə özünü qabarıq şəkildə büruzə verir.
Prezident İlham Əliyevin "Qarabağda yaşayan ermənilərlə danışmağa hazırıq, amma Moskvanın göndərdiyi, ciblərində rus xalqından oğurladığı milyardlarla pula sahib Vardanyan kimi insanlarla yox. O, Moskvadan oraya çox aydın gündəliklə göndərilib" açıqlaması geniş müzakirə mövzusu olmaqla yanaşı, Vardanyanın lağ predmetinə çevrilməsi fonunda da özünü göstərdi. Yəni Azərbaycan tərəfi Vardanyanın əsl mahiyyətini çoxdan çozüb.
Məhəmmədəli QƏRİBLİ
