Xankəndidəki separatçıların və Ermənistanın yaratdığı mövcud şou, apardıqları şər-böhtan kampaniyasına təbii ki, beynəlxalq birlik elə də ciddi yanaşmır. Əlbəttə, Fransa kimi ermənidən çox erməni olan dövlət istisnadır.
Bütün dünya bilir ki, Fransada dövlət səviyyəsində erməni separatizmi dəstəklənir və fransızlar separatçıların şər, yalan kampaniyasına qoşulurlar. Məsələ burasındadır ki, Şuşa-Xankəndi yolunda azərbaycanlıların keçirdiyi dinc və haqlı aksiyadan Xankəndidə yaşayan ermənilər heç bir əziyyət çəkmirlər. Sadəcə onlar özləri və Ermənistan, Fransa kimi havadarları elə təqdim edirlər ki, guya bunlara burada nəsə edirlər.
Separatçılar elə hay-küy, cığır-bağır salıblar ki, öz yalanlarına, şər-böhtan kampaniyalarına Fransanın 200-ə yaxın aktyorunu, yazıçısını, rəssamını da qoşa biliblər, fransızlar Qarabağadakı ermənilərlə həmrəy olduqlarını bəyan ediblər. Adlarını sənət adamı, incəsənət, kino xadimi qoyan 200-ə yaxın fransız Fransanın “Le Figaro” qəzetində tamamilə qeyri-obyektiv, yalan dolu, ermənipərəst məqalə ilə çıxış ediblər. Onların bu nəşrdə çap olunan birgə qərəzli yazısında Azərbaycana qarşı əsassız ittihamlar irəli sürülüb. İddia edilib ki, guya Qarabağda 120.000 erməni var və onlar “etnik təmizləmə təhlükəsi” altındadır (?). Onlar da “buna görə” separatçılara dəstək nümayiş etdirdiklərini bildiriblər.
Ermənistanın Fransadakı səfirliyinin erməni mediasına verdiyi məlumatda bildirilib ki, anti-Azərbaycan məqaləsinin müəllifləri arasında fransız aktyorlarından Pyer Riçard, Jan Reno, Karol Buket, Vircinie Ledoyen, rejissorlar - Kosta-Qavras, Klod Leluş, məşhur yazıçılar Silvain Tesson, Aleksandr Jardin, Gilbert Sinue, Mark Dügen, filosof Brüsker, Mişel Onfret, fransız jurnalist Stefan Bern və başqaları var.
“…Pulla saxlanılan muzdlu insanlardır ki, lazım olanda onları danışdırırlar”
İSBAM sədri Samir Adıgözəlli “Bakı-Xəbər”ə şərhində bildirdi ki, Fransanın bir qrup sənət adamının anti-Azərbaycan mövqeyi tutması təəccüblü görsənmir, çünki onlar həmişə bu yolu tutublar. S.Adıgözəllinin sözlərinə görə, 44 günlük Vətən müharibəsində Azərbaycanın qazandığı qələbə Fransaya bəlkə də Ermənistandan da çox təsir edib. “Fransanın bəzi sənət, kino, ədəbiyyat adamlarının separatçılara dəstək nümayiş etdirməsi bizi təəccübləndirmir. Çünki bu gözlənilən haldır. Fransızlarla ermənilər bacıdırlar və onların bir-birinə dəstək verməsi gözləniləndir. O məqaləni yazıb çap etdirən fransalı sənət adamlarının çox heç Qarabağın harada yerləşdiyini bilmir, heç ermənilər barədə də doğru-dürüst məlumatları yoxdur. Sadəcə olaraq, o sənət adamları erməni lobbisi tərəfindən pulla saxlanılan muzdlu insanlardır ki, lazım olanda onları danışdırırlar. Bilirsiz ki, uzun illərdir dünyada mövcud olan erməni lobbisi müəyyən xarici sənət adamlarını da ələ keçiriblər. Bunların adları nə olsun ki, populyardır, amma erməni lobbisinin pulundan asılı vəziyyətdədirlər”.
S.Adıgözəlli qeyd etdi ki, ola bislin, o sənətçilər arasında erməni əsillilər də olsun. Ad, soyad və milliyyət əyuşdirmək kimi halların ermənilərə xas keyfiyyət olduğunu deyən S.Adıgözəlli hesab edir ki, Fransa da belələri yox deyil. “Bu sənətçilər arasında erməni əsillilər də olmamış olmaz. Ermənilər bir sıra hallarda çox asanlıqla buna gedirlər. Bu da ola bilər. Əsasən də bu sənətçilər Fransadakı erməni lobbisinin maliyələşdirdiyi adamlardır. Bu qrupu maliyə və yalan informasiyalar hesabına yaradırlar və onları anti-Azərbaycan mövqeyindən çıxış etməyə vadar edirlər. Əlbəttə, lobbi bilir ki, tanınmış bir sənətçinin Azərbaycan əleyhinə qərəzli çağırışlarına qulaq asanlar olacaq, ona görə də onları maliyələşdirirlər. Mən üzümü o fransız sənətçilərə tutub soruşmaq istəyirəm ki, onların Xocalı soyqırımından xəbərləri varmı? Elə obyektiv və həqiqətpərəstdirlərsə Xocalı soyqırımı barədə danışsınlar. Azərbaycan sərvətlərinin separatçılar tərəfindən qanunsuz istismar edildiyini, talandığını yazsınlar. Həqiqət axtarırlarsa biz onu onlara təqdim edək. Azərbaycanın guya ermənilərə qarşı “etnik təmizləmə” aparmaq “niyyəti” ilə bağlı uydurmalar quraşdırmaqdansa onlar ermənilərin azərbaycanlıları etnik təmizləməyə məruz qoyduqlarını dilə gətirsinlər.
Sözümün canı budur ki, bu növbəti kampaniyaçılıqdır və onlar pul müqabilində öz vicdanlarını erməni lobbisinə satıblar”-deyə S.Adıgözəlli qeyd etdi.
İradə SARIYEVA
