Dekabrın 23-də “Müdafiə Xətti” hüquq müdafiə təşkilatının çağırışı ilə çoxsaylı "fəallar" hazırda həbsdə olan ictimai fəal Bəxtiyar Hacıyevin müdafiəsinə həsr olunmuş etiraz aksiyası keçirməyə cəhd etsələr də, Bakı Şəhər İcra Hakimiyyəti icazə vermədiyindən polis tərəfindən aksiyanın qarşısı alınıb.
Bəxtiyar Hacıyev ölkəmizdə hökumətin və hüquq-mühafizə orqanlarının fəaliyyəti ilə bağlı sərt tənqidləri ilə hər zaman "gündəm"də olub. Hətta bu şəxs zaman-zaman bəzi məmurlarımızın həbsini də dövlətdən sərt şəkildə tələb edib. Dövlətinə, xalqına qarşı çıxan bu cür aqressiv şəxslər hər zaman başqalarının həbsini arzulasalar da, həyat elə gətirib ki, özləri həbsxana həyatına məhkum olublar. Əlbəttə ki, biz o şəxsin həbsdə olmasına qətiyyən sevinmirik. Allah qapısını açsın. Lakin, öz mənfəəti xatirinə dövlətinə, xalqına qarşı çıxanlar, sonda birmənalı olaraq bu cür ağrılı vəziyyətlə qarşılaşırlar.
ABŞ Dövlət Departamenti də bu məsələyə qarışaraq Azərbaycan hakimiyyətini B.Hacıyevi operativ qaydada azad etməyə çağırıb. Onlara deyən yoxdur ki, "siz bizim xalqı bizdən çoxmu düşünürsünüz? Və ya bizim xalqımıza canınız bizdən çoxmu yanır?" Dövlətimizin istənilən işinə, ələlxüsus da hüquq işlərinə kənardan müdaxilə eliyən dünya ölkələri bu işdə öz mənfəətlərini güdürlər. Onların niyyətləri bu cür məsələlərə münasibət bildirərək, özlərini dünyaya "hüquq müdafiəçisi" kimi göstərməkdir. Yəni onlar nəticədə B.Hacıyevi deyil, özlərini, öz məfəətlərini düşünürlər.
Dünən məlum şəxsin azadlığını tələb etmək üçün Bakıda aksiya keçirməyə cəhd edən "fəallar"dan da danışaq. Hansı ki, o "fəallar" bu dövlətin bir işində yaralı barmağa yod çəkməyiblər. İşləri ancaq dövləti, hökuməti, xalqı pisləmək olub. Vətənin çörəyini yeyib Vətəni bəyənməyən "fəallar"!
Günlərdir Azərbaycanın milli maraqları uğrunda şaxtada, soyuqda, qarlı günlərdə yuxusuz qalıb Laçın-Xankəndi yolunda QHT və media nümayəndələri, könüllülər aksiya keçirərkən buna müxtəlif don geydirənlər, ağız büzənlər, keçirilən aksiyanın birmənalı məqsədini min yerə yozanlar indi hansısa şəxslərə görə özlərini Bakı küçələrinə "atıb" aksiyalar keçirməyə çalışırlar. Onlar anlamalıdır ki, bu dövlətdə aksiyalar yalnız milli maraqlar naminə təşkil oluna bilər. Necə ki, Laçın-Xankəndi yolunda keçirilən aksiya 30 ilə yaxın bir dövr ərzində qanunsuz şəkildə talanan təbii sərvətlərimizlə bağlı hazırkı vəziyyətin öyrənilməsi və buna uyğun olaraq təxirəsalınmaz tədbirlərin görülməsinin təmin edilməsi məqsədilə keçirilir.
Onsuz da iki əsrdir ən böyük düşmənimiz olan erməni və onun havadarları ilə savaşırıq. Ancaq bu bizi heç vaxt qorxutmayıb. Öz içimizdə, Vətənimizin çörəyini yeyib Vətənə savaş açanlarla savaşmaq deyəsən ondan daha qorxuludur. Biz heç zaman imkan vermərik ki, bu cür adamlar dövlətçiliyi, milli dəyərləri dağıtsınlar. Bunun qarşısını almaq üçün bundan sonra da əlimizdən gələn hər şeyi edəcəyik.
Lamiyə İsazadə,
"Kimsəsiz Uşaqların Sosial Müdafiəsi" İB-nin sədri
