Azərbaycan xarici işlər naziri Ceyhun Bayramovla rusiyalı həmkarı Sergey Lavrov arasında görüş keçirilib.
Azərbaycan və Rusiyanın xarici işlər nazirləri 2023-cü ilin əvvəlində bir sıra məsələləri müzakirə edəcəklər. Trend-in məlumatına görə, bunu Moskvada səfərdə olan Azərbaycanın xarici işlər naziri Ceyhun Bayramov Rusiyanın xarici işlər naziri Sergey Lavrovla görüşü zamanı deyib.
“Biz digər məsələlərlə yanaşı, Azərbaycan-Rusiya münasibətlərinin geniş gündəliyini müzakirə etmək barədə razılığa gəldik. Amma hesab edirəm ki, bu həm də dekabrın 23-nə nəzərdə tutulan proqramın ikinci hissəsini başa çatdırmaq üçün yaxşı fürsətdir. Düşünürəm ki, bu gün yaxşı, səmərəli müzakirələrimiz olacaq, münasibətlərimizdə yubiley ilinin yekunlarını, həmçinin 2023-cü ilin əvvəli üçün bir sıra məsələləri müzakirə edə biləcəyik”, - deyə Bayramov qeyd edib.
"Sülh müqaviləsi ilə bağlı Azərbaycan və Ermənistanın mövqelərini yaxınlaşdırmaq üçün hər şeyi etmək lazımdır" – Lavrov Moskvada azərbaycanlı həmkarı Ceyhun Bayramovla görüşündə deyib.
O qeyd edib ki, Rusiya sülhməramlıları Laçın yolunda vəziyyətin nizamlanmasına çalışır.
“Biz təsdiq etdik ki, Rusiya sülhməramlıları vəziyyəti həll etmək üçün hər saat işləyirlər. Biz regionda filiz yataqlarının işlənməsinə dair fikir ayrılıqlarının tezliklə həllinin tərəfdarıyıq. Bu mövzunun gərginliyini mümkün qədər azaltmaq lazımdır. Biz hər kəsin üçtərəfli bəyanatda yer alan öhdəliklərə ciddi şəkildə əməl etməli olduğu mövqedən çıxış edirik”, - deyə Lavrov bildirib.
Lavrov onu da qeyd edib ki, ətraf mühitin monitorinqi haqqında saziş nə Azərbaycanın, nə də Rusiyanın təqsiri üzündən pozuldu.
Lavrov Ermənistanın Baş naziri Nikol Paşinyanın Rusiya sülhməramlılarına qarşı ittihamlarını da əsassız adlandırıb. Bildirib ki, Ermənistanın Moskvadakı görüşdə iştirakdan imtina etməsi ilə bağlı bizə məlumat verilməsi metodu sual doğurur.
Ceyhun Bayramov isə bildirib ki, Ermənistan daha çox prosesi imitasiya etmək üçün səy göstərir.
“Təəssüf ki, son vaxtlar biz münaqişədən sonrakı normallaşmanın müxtəlif mərhələlərində müşahidə etdik ki, səylər daha çox real prosesə deyil, bu prosesin imitasiyasına yönəldilir. Təəssüf ki, bu məsələdə Azərbaycan tərəfi üçün yeni heç nə yoxdur. Bu, Ermənistanın mövqeyidir. Real nəticəyönümlü fəaliyyətlə məşğul olmaqdan daha çox prosesin imitasiyasını yaradan Ermənistanın 30 ildən artıqdır ki, sadiq qaldığı mövqedir”, - deyə o bildirib.
C.Bayramov qeyd edib ki, həqiqətən də danışıqlar prosesinə, siyasi-diplomatik yolla həllə köklənəcək bir ölkə üçün 30 il ərzində hərbiləşdirməyə böyük vəsait sərf etmək mənasızdır.
Nazir deyib ki, Ermənistan böhran görüntüsü yaratmağa çalışır.
“Azərbaycanın Laçın yolunu blokadaya alması ilə bağlı məlumatlar həqiqətə uyğun deyil” – deyən Bayramov bildirib ki, bu məlumat çoxlu sayda faktlarla təkzib olunur. “Əvvəla, dekabrın 12-də mitinqə başlayan ictimai fəallar əlaqə vasitələrini bölüşərək Azərbaycanın təbii sərvətlərinin talanmasına, ekoterrora qarşı olduqlarını açıq şəkildə bildirdilər. Onların yük maşınlarının, təminat maşınlarının, nəqliyyat vasitələrinin və vətəndaşların keçidinə mane olmaq məqsədi yoxdur. Bütün bu günlərdə həm təcili yardım maşınlarının, həm də Beynəlxalq Qızıl Xaç Komitəsinin (BQXK) maşınlarının, hər iki istiqamətdə sülhməramlıların karvanlarının rahat şəkildə hərəkət etdiyinə dair çoxlu sayda fakt da var”, - nazir qeyd edib.
Ceyhun Bayramov deyib ki, Vardanyan Qarabağdan nə qədər tez getsə, hamı üçün bir o qədər yaxşıdır. Nazir bildirib ki, Azərbaycanın təbii sərvətlərinin talanması xeyli sürətlənib.
