Azərbaycanın dövlət strukturlarında həyata keçirilən və günü-gündən dərinləşən, böyük məzmun ifadə edən islahatlar, dəyişikliklər ölkə ictimaiyyətinin maraqlarını tam şəkildə təmin edir. Görülən hər bir iş, atılan hər bir addım dövlət və ictimai maraqların təmin edilməsi baxımından çox müsbətdir.
Bildiyimiz kimi, hazırda ölkəmizdə bütün sahələrdə, bütün bölgələrdə ciddi islahatlar gedir və islahatların da əsas məqsədi vətəndaş məmnunluğunu təmin etməkdir. Ölkəmizdə həyata keçirilən islahatlar Naxçıvan Muxtar Respublikasını da əhatə edir. Tarixən Azərbaycan dövlətçiliyinin beşiklərindən olan Naxçıvanda yeni islahatlar dalğası başlayıb. Bir sıra fikirlərə görə, Muxtar Respublikada son baş verən proseslər bu sahədə mövcud olan ciddi problemlərin hamısı arxada qalacaq. O da vurğulanır ki, Naxçıvanda bütün sahələrdə yeni idarəçilik sistemi olacaq və əhalinin indiyə qədər üzləşdiyi bütün çətinliklər, problemlər həllini tapacaq. Bildiyiniz kimi, ölkəmizin bu diyarında yerli idarəçilərin öz işinə səhlənkar münasibəti nəticəsində çox ciddi problemlər mövcud olub. Bu da daim ictimaiyyət tərəfindən tənqid edilib, qınanılıb. Ona görə də, bu gün baş verənlərin köhnə “ənənələr”in üstündən xətt çəkilməsinə gətirib çıxaracağına inananlar çoxdur.
Prezidentin kadr islahatı və ictimai maraqların təmin olunması...
Dekabrın 22-də Prezident İlham Əliyev Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi haqqında fərman imzalayıb. Fərmanla Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi təsis edilib. Ölkə başçısının digər bir sərəncamı ilə isə Fuad Vahid oğlu Nəcəfli Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi təyin edilib. Heç şübhəsiz ki, Naxçıvanda kadr islahatları və səlahiyyətli nümayəndə modeli dövlətçilik maraqları ilə yanaşı həm də ictimai mənafe məsələsidir... Naxçıvanda baş verən prosesləri hər kəs ciddi şəkildə izləyir və Prezident İlham Əliyevin Naxçıvanla bağlı qəbul etdiyi qərarlar, ora öz səlahiyyətli nümayəndəsini təyin etməsi, burada aparılan kadr islahatları ictimaiyyətin ürəyincə olub. Bu məsələdə dövlətlə ictimaiyyətin, xalqın maraqlarının uzlaşması diqqətdən qaçmır. Əlbəttə, ölkə başçısının naxçıvanlıların ürəyindən xəbər verən addımı atacağı bəlli idi və bu da, bilindiyi kimi, özünü çox gözlətmədi.
Naxçıvanlıların özlərinin qeyd etdiyinə görə, Prezidentin məlum addımları onu göstərir ki, Azərbaycan dövlətçiliyinin beşiklərindən biri olan Naxçıvan Azərbaycanın ayrılmaz parçasıdır və ölkəmizi bürüyən islahatlar dalğası burada da hər bir sahədə aparılacaq.
“Bu idarəçilik institutunun Naxçıvanda yaradılması müsbət hadisədir”
İSBAM sədri Samir Adıgözəlli “Bakı-Xəbər”ə bildirdi ki, Naxçıvanla bağlı belə bir qərarın verilməsi, Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsinin təyin edilməsi tarixi hadisədir. “Prezident İlham Əliyev tərəfindən Naxçıvanla əlaqədar veriən qərarların geniş ictimai-siyasi, tarixi mənası var. Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsinin təyin edilməsi bir zərurət idi. Azərbaycanın idarəetmə sistemi yeni bir sistemdir. Azərbaycanın yeni idarəetmə sisteminin Naxçıvanda da olması çox vacib idi. Azərbaycan Respublikası Prezidentinin Səlahiyyətli Nümayəndəsi institutu bizdə xeyli müddətdir yaradılıb. Azad edilmiş rayonlarda biz bu idarəçilik modelini görürük. Bu gün bu institutun, bu idarəçilik metodunun Naxçıvanda da mövcud olması çox müsbət göstəricidir. Sözsüz ki, bu idarəçilik institutunun Naxçıvanda yaradılması müsbət hadisədir”.
“Bu məsələdə ictimai və dövlət maraqları üst-üstə düşür”
S.Adıgözəllinin sözlərinə görə, ölkədəki kadr islahatları, yeni idarəçilik modeli, innovativ dəyişikliklər və sair Naxçıvandan da yan keçə bilməzdi: “Bilirsiz ki, artıq bir neçə rayonumuza Prezidentin səlahiyyətli nümayəndələri təyin edilib. Zəngilanda, Şuşada və digər rayonlarımızda Prezident tərəfindən bu institut formalaşdırılır. Təbii ki, strateji baxımdan Naxçıvanda da bu idarəetmə sisteminin formalaşdırılması mühüm addımdır. Ölkə başçısının bu addımı təqdir. Baş verən yeniliklər Azərbaycan dövlətinin post-müharibə dövründə həyata keçirdiyi çağırışlardır. Hesab edirəm ki, bu institutun Naxçıvanda da yaradılmasında həm də ictimai çağırışlar nəzərə alınıb. Bu da xalqdan gələn bir ictimai sifariş məsələsidir ki, reallaşıb. Dövlət başçısı hər zaman ictimai çağırışları təhlil edib düzgün qərar qəbul edib. Bu baxımından, inanıram ki, Naxçıvanda yeni formalaşdırılan idarəçilik modeli özünü çox yüksək səviyyədə doğruldacaq. Naxçıvan bizim üçün strateji yerdir. Muxtar Respublika İranla, Ermənistanla, Türkiyə ilə həmsərhəddir. Bura çox mühüm strateji bir nöqtədir. Burada mərkəzi hakimiyyətdən idarə olunan və möhkəm dayağa sahib olan bir idarəetmə sisteminin olması çox vacibdir. Əminəm ki, biz bu işin uğurlu nəticələrini Naxçıvanda görəcəyik. Heç şübhəsiz ki, cənab Prezidentin bu təyinatı tam olaraq ictimaiyyətin maraqlarına cavab verir. Bu məsələdə ictimai və dövlət maraqları üst-üstə düşür”-deyə S.Adıgözəlli qeyd etdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
