Son dövrlər bəzi məmurların saxta diplom alması ilə bağlı iddialar çoxalıb. Xüsusən də ikinci ali təhsil diplomu alanlar barədə deyilir ki, filankəs vəzifəyə gələndən sonra bu diplomu alıb. Hətta Vasif Talıbovun da ikinci ali təhsil diplomunun saxta olduğu iddia edilir.
Dərslərə gəlmədiyi halda ona BDU-nun hüquq fakültəsinin diplomu verildiyi deyilir. Araşdırmalardan sonra məlum olub ki, Vasif Talıbov ali təhsillə bağlı ikinci diplomu 1998-ci ildə əldə edib. Həmin vaxt Vasif Talıbov Naxçıvan Ali Məclisinə rəhbərlik edibsə, necə dərsə gedib-gəlib? Hər halda, Azərbaycan elə də böyük ölkə deyil. Belə məsələlər tez nəzərə çarpır. Ən azından, kimsə ona dərs dediyi, kiminsə onunla eyni qrupda oxuduğu üzə çıxardı. Belə faktlar yoxdursa, deməli, Talıbov yalnız adını yazdırıb, BDU-dan saxta diplom əldə edib. Həmin vaxt sözügedən ali təhsil müəsissəsinə Misir Mərdanov rəhbərlik edib. O, bu məsələ ilə bağlı maraqlı açıqlama verib, hətta deyib ki, Vasif Talıbov adda “tələbənin” məzun olduğunu xatırlamır.
Qeyd edək ki, Azərbaycandakı məmurların belə müəmmalı ikinci ali təhsil diplomu yalnız Talıbovla bitmir. Belə hallar kifayət qədərdi. Əslində bu hadisə iri məmurların saxta diplom məsələsini bir daha gündəmə gətirir. Bu vəziyyətlə bağlı təhsillə əlaqəsi olan şəxslər nə düşünür?
Tarix elmləri doktoru, professor Məhərrəm Zülfüqarlı “Bakı-Xəbər”ə açıülamasında bildirdi ki, bu olduqca aktual məsələdi: “Belə hallar yalnız Azərbaycanda baş vermir. Post-sovet ölkələrinin əksəriyyətində belə hallar mövcuddur. Belə halların olması bütün sahələrə öz təsirini göstərir. Elmlər Akademiyasında belə neqativliyi araşdırmaq üçün bir komissiya yaradıldı. Tez də öz işini başa vurdu. Yəqin ki, yüksək vəzifədə olanların çoxunun saxta diplomları olduğu səbəbindən onların təzyiqi əsasında bu iş yarımçıq qaldı. Azərbaycan xalqının ictimai rəyi hər şeyi həll edir. Bizdə bu çox həssasdır. Kim öz gücünə oxumayıbsa, onun xalqın gözündə bir qəpiklik də olsun dəyəri qalmır. Hazırda universitütlərdə ikinci ali təhsil almaq imkanları var. Sovet dönəmində belə bir tendensiya vardı ki, qızlar tibbi, oğlanlar isə hüququ seçirdi. Hüququ da elm kimi seçmirdilər, qazançlı işlər olduğu səbəbindən seçirdilər. Yəni rüşvət alıb, yaxşı yaşamaq üçün ora gedirdilər. Mən ali məktəbdə oxuyanda, 1972-cil ildə Heydər Əliyev vəzifəli şəxslərin uşaqlarına hüquqa girməyi qadağan etmişdi. Müstəqillikdən sonra bu hallar daha da çoxalmağa başladı. Bir çox vəzifəli şəxslərin tərcümeyi-halına fikir versəniz görəcəksiniz ki, əksəriyyəti yaşlı vaxtında ikinci ali təhsil alıb. Vasif Talıbov ranqında adam təbii ki, gedib orda dərs keçməyib, yalnız adını yazdırıb diplom alıb. Bunun özü də saxtakarlıqdır. Tək onunla məsələ bitmir axı. Bu yaxınlarda birini nazir təyin etdilər. 40 ildən artıqdır müəllim işləyən adam kimi mən onun bitirdiyi ali məktəbin adını ilk dəfə idi eşidirdim. Belə faktlar araşdırılmalıdır. Elm və Təhsil Nazirliyi və Attestasiya Komissiyası çox yaxşı bir metoddan istifadə edir. Rusiyadan aldığı diplomu tanıtmaq üçün gələn adamı sorğu-sual edirlər. Məlum olur ki, həmin adam ümumiyyətlə rus dilini bilmir. Belə göstəricisi olan adam necə Risiyada ali məktəb bitirə bilər? Onun ölkəni tərk edib-etmədiyini yoxlayırlar, məlum olur ki, bu adam heç ölkəni tərk etməyib. Bunun nəticəsi ağır olur. Bir də görürsən ki, çox aşağı göstəriciləri olan adam gəlib böyük sahəyə rəhbərlik edir. Saxta diplomlu adam çalışır ki, əsl diplom almış savadlı adamları sıradan çıxarsın. Bu da dövlətin ümumi inkişafına ziyandır. Prezidentimizin imkanı var ki, akademik diplomu alsın, amma görürük ki, bunu etmir. Elə akademikimiz var ki, üzündən oxuya bilmir. Belə nazirlərimiz də var. Prezident hamının diplomuni bir-bir yoxlayan deyil ki. Bunun qarşısını aşağıdakı məmurlar almalıdır. Güclu bir komissiya yaranmalıdır. Heç kimə də güzəşt edilmədən bu məsələlər araşdırılmalıdlr”.
Məhəmmədəli QƏRİBLİ
