“Qarabağ ərazisində qanunsuz istismar və talan olunan təbii sərvətlərimizi qorumaq üçün burdayıq”
Dekabrın 12-də səhər saatlarından etibarən bir qrup qeyri-hökumət təşkilatı nümayəndəsi, media təmsilçisi və ictimai fəal Rusiya sülhməramlılarının müvəqqəti nəzarətində olan Şuşa-Xankəndi yolunu bağlayıb. Aksiya iştirakçıları Azərbaycanın faydalı qazıntı yataqları, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz etdiklərini söyləyərək
Xocalı və Xankəndi tərəfə keçmək istəsələr də, sülhməramlı kontingent onlara imkan verməyib.
Sözügedən aksiya 12 gündür ki, davam edir. Qeyd edək ki, aksiya iştirakçıları arasında gənclər üstünlük təşkil edir. Gənclər, universitet tələbələri könüllü şəkildə aksiyaya qoşulublar.
Belə gənclərdən biri də Bakı Dövlət Universitetinin 3-cu kurs tələbəsi Aminə Nəzərovadır. Aksiya barəsində Aminə Nəzərova ilə həmsöhbət olduq.
- Aksiya iştirakçıları arasında gənclər üstünlük təşkil edir. Bir gənc kimi bu aksiyada iştirak etmək sizə necə təsir edir?
- Azərbaycanın qeyri-hökumət təşkilatlarını (QHT) təmsil edən bir qrup şəxs və ictimai fəalların Şuşa-Xankəndi yolunda başlatdıqları etiraz aksiyasında gənclər üstünlük təşkil edir. Çox qürurverici hissdir ki, mən də Azərbaycanın ərazi bütövlüyünün müdafiəsi, ölkəmizin təbii sərvətlərinin qanunsuz istismarına qarşı şüarlar səsləndirirəm. Ekoaktivistlər və gənc könüllülər “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!” kimi şüarlar səsləndirir.
- Etiraz aksiyasına necə gündür qoşulmusuz?
- Aksiyaya dekabrın 20-dən qoşulmuşam. Hələ bir neçə gün də burda qalıb aksiya iştirakçılarına dəstək olmağa çalışacam. Məlumat üçün deyim ki, aksiyaya Bakı Dövlət Universitetinin Könüllüləri sırasında qoşulmuşam.
- Hazırda aksiya iştirakçılarının əhval-ruhiyyəsi necədir?
- Aksiya iştirakçılarının əhval-ruhiyyəsi yüksək səviyyədədir. Yorulmadan, soyuq-qış demədən öz tələblərimizi irəli sürürük. Qarabağ ərazisində qanunsuz istismar və talan olunan təbii sərvətlərimizi qorumaq üçün burdayıq. Dinc aksiyaya qoşulan ekofəallar hazırda yüksək əhval-ruhiyyədədirlər. Bu dəqiqələrdə etirazçılar yolun Laçın və Xankəndi istiqamətlərində hərəkətə maneə törətmədən vətənpərvərlik ruhunda müxtəlif şüarlar səsləndirirlər. 44 günlük müharibədə birləşdiyimiz kimi bu aksiyada da birləşmişik. Hər kəs sevgi ilə aksiyada iştirak edir. Havaların soyuq olmasına baxmayaraq, heç kəs getmək istəmir. Təminatımız da yüksək səviyyədədir. 30 ildən sonra işğaldan azad olunmuş bu torpaqların üzərində dayanmaq bizlər üçün qürurdur.
- Dediniz ki, gənc aktivistlər Azərbaycan, rus və ingilis dillərində dayanmadan şüarlar səsləndirir. Sülhməramlılar xarici dillərdə səslənən şüarlara necə reaksiya verir?
- Bəli, biz tələblərimiz doğma azərbaycan dili ilə yanaşı, xarici dillərdə də səsləndiririk. Şüarlar azərbaycan dilində səslənən zaman sülhməramlılar heç bir reaksiya vermirdilər. Ancaq rus və ingilis dilində şüarlar səslənən zaman sülhməramlıların üzündəki mimika dəyişir və bu açıq şəkildə hiss olunur. Hətta dünən gecə sülhməramlılar aksiya iştirakçılarını qıcıqlandırmaq üçün üzərimizə lazer işığı salırdılar. Ancaq ekoaktivistlər buna heç bir reaksiya vermədi. Biz dinc aksiyamızı həyata keçirtməkdə davam edirik.
- Qeyd etdiniz ki, sülhməramlılar aksiya iştirakçılarını qıcıqlandırmaq istəyir. Onların davranışlarında xoşagəlməz hallar müşahidə olunurmu?
- Hazırda sülhməramlıların davranışında hər hansı bir hərəkət hiss olunmur. İştirakçılar vətənpərvərlik ruhunda mahnılar, həmçinin "Qarabağ", "Xudayar" təsnifləri və digər musiqilər ifa edirlər. Sülhməramlılar isə bizləri izləyir.
- Məlum, hava soyuqdur və Bakı ilə müqayisədə Şuşa-Xankəndi yolunda qış daha sərtdir. İsti geyim və qida ilə bağlı təminat hansı səviyyədədir?
- Aksiya iştirakçılarının geyim və isti qida ilə bağlı heç bir problemi yoxdur. Hər iki saatdan bir isti qida, çay, kofe verilir. Qida barəsində çətinlik yoxdur. Onu da deyim ki, hər bir aksiya iştirakçısına tibbi yardım edilir. Indi hava soyuqdur və dayanmadan şüarlar səsləndirdiyimiz üçün səs tez batır. Buna görə tibbi heyət bizə müxtəlif dərman preparatları verir, immunitetin düşməməsi üçün vitaminlər də verilir.
- Ermənistan mətbuatı yolun sırf azərbaycanlı ekoaktivistlər tərəfindən bağlandığını qeyd edir. Bu məlumatlar barədə nə deyə bilərsiz?
- Ermənilər ilk günlərdə həyasızcasına iddia edirdi ki, guya azərbaycanlılar Laçın yolunu bağlayıb, amma bu belə deyildi, indi özləri də etiraf edir. Ona görə də bəzi qərəzli təşkilatların, ölkələrin azərbaycanlıların erməniləri blokadada saxlaması haqda dedikləri heyrət doğurur. Onlar fərqinə varmalıdır ki, bu dinc aksiya ən humanist variantdır. Ümumiyyətlə, Ermənistan mətbuatı aksiya ilə bağlı çoxlu sayda həqiqəti əks etdirməyən məlumatlar yayır. Halbuki, 22 dekabr tarixində 5 yük maşını ərazidən keçdi. Biz həmin nəqliyyat vasitələrinin ərazidən keçməsinə şərait yaratdıq. Aksiya iştirakçıları həmin yük maşınlarına heç bir maneçilik törətmədi.
Günel CƏLİLOVA
