Ermənistanın hakim “Vətəndaş müqaviləsi” fraksiyasının deputatı Qaqik Melkonyan erməni mediasına müsahibəsində Laçın yolundan faktiki imtina edib: “Biz bu məsələyə qarışa bilmərik, Laçın yolu bizim işimiz deyil”.
O, “yolu bağlasalar, Ermənistan sərhədçiləri işə qarışacaqmı” sualına belə cavab verib: “Biz bu məsələyə qarışa bilmərik. Laçın yolu bizim məsələmiz deyil. Sülhməramlılar Qarabağ “xalqı”nın təhlükəsizliyinin təminatçısıdır, qoy onlar da qorusunlar. Rusiya səfirliyinə gedin, deyin ki, siz zəmanət verirsiniz, niyə belə oldu?”.
Eyni zamanda, onun fikrincə, indiki mərhələdə genişmiqyaslı hərbi əməliyyatların bərpası ehtimalı azdır. Onu həmkarı Ovik Ağazaryan dəstəkləyib. "Qarabağ erməniləri Ermənistan hökumətindən nə istəyir? Azərbaycana müharibə elan etməliyik?" - deyə deputat hiddətlənib. Bu da o anlama gəlir ki, Nikol Paşinyan üçün Qarabağ məsələsi yoxdur və daha çox diqqət Ermənistanın daxilinədir. Ölkənin yığılıb qalan problemlərinin həllindən keçir onun hakimiyyətdə qalması. Bu da o deməkdir ki, Ermənistan yenə Qarabağdakı erməniləru tək buraxdı. Onlar isə anlamalıdırlar ki, nicatları Azərbaycanın qanunları qəbul edib, digər xalqlar kimi bu torpaqda yaşamaqdadır.
Məlum olduğu kimi, Qarabağda Rusiya sülhməramlılarının müvəqqəti məsuliyyət zonasında Azərbaycan qeyri-hökumət təşkilatlarının nümayəndələrinin etiraz aksiyası üçüncü gündür ki, davam edir. Tələb də budur ki, Şuşa şəhəri yaxınlığında, Rusiya sülhməramlılarının postunun yaxınlığında Azərbaycan yataqlarının qanunsuz istismarı vəziyyəti ilə bağlı monitorinq aparmaq üçün azərbaycanlı mütəxəssislər əraziyə buraxılsın. Lakin bu tələb və sülhməramlılarının komandanının əraziyə gəlməsi tələbi yerinə yetirilmir.
“Bu minvalla Paşinyan həm sosial dayaqlarını gücləndirir, həm də müxalifətin təzyiqlərini minimuma endirməyə çalışır”
Məsələyə münasibət bildirən AMİP sədri Arzuxan Əlizadənin fikrincə, Ermənistan hakim partiyası deputatının belə açıqlama verməsi hiyləgər siyasi oyundur: “Əvvəla, bu o demək deyil ki, Ermənistan Qarabağdan imtina edir. Onlar həqiqətən bu fikirdə olsaydılar, müharibədən sonra götürdükləri öhtəliklərə əməl edərdilər. Qarabağdakı separatçılara Ermənistan büdcəsindən böyük məbləğdə dotasiya ayırmazdılar və s. Məsələ ondadır ki, hakim partiya təmsilçisi belə deməklə topu Rusiyaya atır. Bu, birbaşa Paşinyanın təlimatı əsasında verilən açıqlamadır. Paşinyanın Rusiyaya yaxın olmayan bir siyasi fiqur olması və Sorosun layihəsi əsasında hakimiyyətə gəlməsi hər kəsə bəllidir. O da bəllidir ki, Vətən müharibəsində Azərbaycanın qələbəsindən sonra Ermənistanda Rusiyaya nifrət artıb. Erməni deputatlar belə açıqlama verməklə ictimai rəydə Rusiyaya qarşı ovqatı daha da körükləyirlər. Bu minvalla Paşinyan həm sosial dayaqlarını gücləndirir, həm də müxalifətin təzyiqlərini minimuma endirməyə çalışır. Məsələnin kökündə dayanan amil əsasən bununla bağlıdır”.
Vidadi ORDAHALLI
