Azərbaycanın qeyri-hökumət təşkilatları (QHT) nümayəndələrinin Qarabağda Rusiya sülhməramlılarının müvəqqəti məsuliyyəti zonasında keçirdiyi etiraz aksiyası üç gündür ki, davam edir. Bu aksiya Ermənistan rəhbərliyini ciddi şəkildə narahat edir.
Ermənistanın Baş naziri Nikol Paşinyanın təcili olaraq Təhlükəsizlik Şurasının iclasını çağırması da onun sözügedən aksiyadan və onun nəticəsindən nə dərəcədə qorxduğunun göstəricisidir. Keçirilən iclasda Laçın yolundakı son situasiya, o cümlədən, regiondakı vəziyyət müzakirə olunub.
İclasda Təhlükəsizlik Şurasının daimi üzvləri ilə yanaşı, Prezident Vaaqn Xaçatryan, spiker Alen Simonyan, Baş nazirin aparat rəhbəri Araik Arutunyan və parlamentin "Vətəndaş Müqaviləsi" fraksiyasının rəhbəri Ayk Koncoryan iştirak edib.
Azərbaycanın qeyri-hökumət təşkilatlarının nümayəndələri Rusiya sülhməramlılarının Şuşa şəhəri yaxınlığındakı postu yanında keçirdikləri aksiyada azərbaycanlı mütəxəssislərin Azərbaycan yataqlarının qanunsuz istismarı ilə bağlı monitorinq aparmaq üçün əraziyə buraxılmamasına etiraz edirlər.
Xatırladaq ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə keçirilmiş müzakirələrin nəticəsi olaraq, dekabrın 10-da Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlar ilə bağlı ilkin monitorinqə başlamaq üçün Rusiya sülhməramlı kontingentinin müvəqqəti yerləşdiyi Azərbaycan Respublikası ərazilərinə yola düşüb.
Bu etiraz aksiyası dünyaya hansı mesajları verdi və nə kimi reaksiyalar doğurdu?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, aksiyanın ciddi rezonans doğurduğunu söyləyə bilərik: “Son üç gündə Azərbaycanın qeyri-hökümət təşkilatlarının, ictimai fəalların, blogerlərin, eyni zamanda mətbuat nümayəndələrinin də birgə iştirak etdikləri bu dinc aksiya ilk növbədə bütün dünyaya bir mesajdır. Azərbaycanı istəməyən, Azərbaycanın uğurlarına qısqanclıqla yanaşan, Azərbaycanın qələbəsini həzm etməyən, Ermənistanın işğalçılıq mövqeyini dəstəkləyən qüvvələrə də sərt bir ismarıcdır. Bu gün biz bütün dünyaya sübut edirik ki, Qarabağ, Xankəndi, Xocalı və digər ətraf ərazilər də Azərbaycanın süveren əraziləridir. Biz öz torpaqlarımıza getmək, burada Azərbaycanın təbii sərvətlərinə qarşı keçirilən terrorun qarşısını almaq üçün səfərbər olmuşuq və etirazımızı bildiririk. Bəzi dairlər, ermənipərəst qüvvələr, Ermənistanın özündə də müxtəlif dairələr hay-küy salıblar ki, guya Azərbaycan Laçın yolunu bağlayıb, Qarabağda, Xankəndidə yaşayan erməniləri blokadaya alıblar. Əsla bu belə deyil. Son günlərdə Azərbaycan tərəfindən səsləndirilən bəyanatları da təsdiqləyərək bir daha bildirmək istəyirik ki, Laçın yolunu burada müvəqqəti yerləşdirilən rus sülhməramlıları bağlayıb. Əgər bu gün Azərbaycan nümayəndələrini, Ekologiya və Təbii Sərvətlər Nazirliyini, digər qurumların nümayəndələrini bu ərazilərə monitorinq keçirmək üçün buraxmırlarsa, bu onun göstəricisidir ki, onlar bu yolu bağlayıblar. Əlbəttə ki, Azərbaycan ictimaiyyəti, Azərbaycan xalqı bu cür məsələlərlə barışmır, sərt mövqe nümayiş etdirir. Tələblər məlumdur. Rusiya sülhməramlıların komandanı əraziyə gəlməlidir və hesabat verməlidir. Bu istəyə nail olunmadıqca, tələblərin yerinə yetirilməsinə nail olunmadıqca, əlbəttə ki, Azərbaycan ictimaiyyəti sərt mövqeyini davam etdirəcək. Bu aksiyaları növbəti günlərdə də görəcəyik və istədiyimizə nail olacağıq. Son üç günün nəticələrinə baxıb demək olar ki, biz istəyimizə nail oluruq. Beynəlxalq təşkilatlar, xarici ölkələr tərəfindən kifayət qədər reaksiyalar var. Bu gün belə deyə bilərik ki, dünyanın diqqət mərkəzi Qarabağda, Azərbaycanın süveren ərazilərindədir. Laçın, Şuşa və Xankəndi yolu olan istiqamətdədir”.
Məhəmmədəli QƏRİBLİ
