“Laçın yolu azərbaycanlı etirazçılar tərəfindən deyil, Rusiya Federasiyasının sülhməramlı kontingenti tərəfindən bağlanıb”. Bunu Prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Xarici İşlər Nazirliyinin diplomatik korpusun nümayəndələri üçün keçirdiyi brifinqdə deyib.
Onun sözlərinə görə, Azərbaycan vətəndaş cəmiyyəti nümayəndələri talan edilmiş təbii sərvətlərin qanunsuz daşınmasının qarşısını almağa çalışır, mülki təyinatlı digər nəqliyyat vasitələrinin hərəkəti məsələlərinə isə qarışmırlar.
Ermənilər hətta yalandan deyir ki, güya Xankəndiyə verilən qazı da biz kəsmişik.
Ermənilərlə rusların birgə oynunu ifşa etmək baxımından bu açıqlamanı necə dəyərləndirə bilərik?
Politoloq Yeganə Hacıyeva “Bakı-Xəbər”ə açıqlamasında bildirdi ki, Qarabağa gələn gündən Rusiya sülhməramlıları öz mandatlarına uyğun fəaliyyət göstərmirlər: “Bölgənin demoqrafik vəziyyətilə bağlı dezinformasiyalar buraxdılar. Ardınca erməni əhalini Qarabağda yerləşdirdilər. Çirkli daşımalara start verdilər. Qarabağ və ətraf rayonların talanmasında iştirak edən erməni iş adamı Vardanyana fəaliyyət üçün şərait yaratdılar. Hazırda da Vardanyan digər rus iş adamları ilə birlikdə Qarabağın resurslarının talanmasında iştirak edir. Faktiki olaraq, qanunsuz fəaliyyətlə məşğuldurlar. Azərbaycan tərəfinə aydın olub ki, ermənilər qızıl və digər yataqlarını istismar edirlər. Bununla da ekoloji terror etmiş olurlar. Rusiya sülhməramlıları ermənilərlə birlikdə yolu bağlamaqla, faktiki olaraq, gedən proseslərə kölgə salmaq istəyir. Yolu biz yox, onlar bağlayıblar. Bununla prosesə başqa don geydirməyə çalışırlar. Təqdimat etmək istəyirlər ki, güya bizim addımlarımız dinc əhaliyə qarşı yönəlib. Prezidentin köməkçisi orada fəaliyyət göstərən şirkətlərin adını çəkdi və bildirdi ki, onlar Azərbaycan ərazilərini yağmalayırlar. Biz ekoloji mübarizəni həssaslıqla, dinc yolla aparırıq. Hətta SSRİ vaxtında Sumqayıtda zərərli zavodların açılmasına ilk olaraq etiraz etmişik. Bu addımlarımızı ermənilər başqa istiqamətə yönəldə bilməz. Bizim hüquq müdafiəçisi açıq efirdə öz telefon nömrəsini verdi ki, humanitar məsələlərlə bağlı ermənilər istənilən müraciəti edə bilərlər. Bir nəfər də olsun erməni bununla bağlı müraciət etmədi. Hesab edirəm ki, Prezidentin köməkçisi diplomatik korpus nümayəndələrinin təmsilçiləri ilə görüşdə ermənilərin bu məkrli niyyətinin üstünü tam açmış oldu”.
Vəziyyətlə əlaqədar Azərbaycan Respublikası Xarici İşlər Nazirliyi Rusiya tərəfinə müvafiq nota təqdim edib. Azərbaycan XİN-dən deyilib ki, Bakı notada əldə olunmuş razılığa uyğun olaraq, Azərbaycan nümayəndələrinin qeyd edilən yataqlara maneəsiz girişinin təmin edilməsinə bir daha çağırış edib. Belə səfərə maneçilik törədilməsinin və ya hər hansı bir şərt irəli sürülməsinin qəbuledilməz olduğunu vurğulayıb.
XİN-in nümayəndəsi qeyd edib ki, Azərbaycan tərəfindən əldə edilmiş məlumata əsasən, xüsusilə “Qızılbulaq” qızıl və “Dəmirli” mis-molibden yataqlarında təbii sərvətlərin qeyri-qanuni istismarı və talanmasında aktivləşmə, o cümlədən ekoloji durumun pisləşməsi müşahidə olunur.
Məhəmmədəli QƏRİBLİ
