Məlum olduğu kimi, Brüsseldə Avropa İttifaqı Şurasının iclası keçirilib. İclasda Avropa İttifaqının Ermənistan-Azərbaycan sərhədində iki ay ərzində fəaliyyət göstərən missiyası ilə bağlı qərar qəbul edilib. Burada təəssüf doğuran məqam odur ki, Azərbaycanın əvvəldən belə missiyanın göndərilməsinə qarşı olmasına baxmayaraq, Avroittifaq gələn il də sərhədə missiya göndərmək istəyir.
Məsələ ondadır ki, iclasın yekun sənədində bu missiya ilə bağlı deyilir: “Şura Avropa İttifaqının Ermənistanda dekabrın 19-da fəaliyyətini başa vuracaq monitorinq missiyasının potensialını nəzərdən keçirib. Ermənistan və Azərbaycan arasında dialoqda vasitəçi kimi Aİ-nin nüfuzunu qoruyub saxlamaq məqsədilə dekabrın 20-dən Ermənistana, razılaşma olarsa, 2023-cü ildə işə salınacaq mümkün mülki missiyanın planlaşdırılmasında iştirak etmək üçün qrup göndəriləcək”.
Qeyd edək ki, bu günlərdə Fransanın xarici işlər naziri Katrin Kolonna Ermənistandakı Aİ missiyasının mandatının uzadılmasına çağırıb. Nazir iddia edib ki, insidentlər yenə də baş verir, amma bu missiya eskalasiya risqini azaldıb və zərurət olduqda sərhəddəki situasiyaya nəzarət edir. O üzdən, missiyanın mandatı buna ehtiyac olduğu müddətdə uzadılmalıdır.
Görünən odur ki, mülki missiya adı altında Fransa Aİ vasitəsilə növbəti ermənipərəst siyasətini həyata keçirmək istəyir. Fransa Ermənistandakı mülki missiyanın mandatını uzatmaq və nəticədə onu daimi missiyaya çevirmək niyyəti güdür. Bu, Parislə İrəvan arasında əvvəlcədən razılaşdırılıb. Çünki Ermənistan bu mülki missiyaya çətir kimi baxır, onu daha çox hərbi missiya kimi qəbul edir.
“Narahatlığa əsas yoxdur və xüsusi missiyanın göndərilməsi praktiki olaraq nəyisə dəyişə bilməyəcək”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, narahatlığa elə bir əsas yoxdur. Partiya sədri bunu belə əsaslandırdı: “Ona görə narahatlığa əsas yoxdur ki, xüsusi missiyanın göndərilməsi praktiki olaraq nəyisə dəyişə bilməyəcək. Bəli, Fransa müxtəlif vasitələrlə ermənilərə yarınmaq istəyir, ancaq bütün bunlar real nəticə verməyəcək. Ermənilər ciddi şəkildə narahatdılar. Çünki əvvəlcə bayram edirdilər, sonra bu qərarın yanlış olduğunu anladılar. Bu ondan irəli gəlir ki, Avroittifaq xüsusi missiya göndərsə də, Azərbaycan Ordusu bir addım belə geri çəkilməyib. Oktyabrda göndərdikləri missiya nə edə bildi ki, gələn il gəlib nəsə etsinlər? Fransa belə bir təşəbbüslə çıxış etsə də, Ermənistan müxalifəti buna pessimist yanaşır. Açıq etiraf edirlər ki, bu kimi qərarlar nəyisə dəyişə bilməyəcək. Yəni mülki missiyanın imitasiya xarakterli olduğunu açıq etiraf edirlər. Fransa belə siyasətlə, əslində daha çox Ermənistana zərər vurur. Ona görə ki, Fransanın regionda möhkəmlənmək planları real görünmür”.
Partiya sədri onu da əlavə etdi ki, Azərbaycanı bu kimi siyasi oyunlarla nəyəsə məcbur edə bilməyəcəklər.
Vidadi ORDAHALLI
