Naxçıvan MR Ali Məclisinin sədri Vasif Talıbovun Bakıya gəldiyi bildirilir. Milli.az saytı xəbər verir ki, V.Talıbovun Bakıya gəlişi Naxçıvandakı "fırtına" ilə bağlıdır: “Onun Naxçıvanla bağlı qəbul olunmuş qərarlarla bağlı məlumatlandırılacağı bildirilir”.
Ali Məclis sədrinin Bakıya gəlişinin onun şəxsi təşəbbüsü ilə baş tutduğu deyilir. "Xan" bağışlanılması üçün Bakıya minnətçi düşəcək.
Bildirilir ki, V.Talıbov özünün və yaxın ətrafının uzun illər ərzində qeyri-qanuni yollarla dövlət büdcəsindən mənimsədiyi və həcmi milyardlarla dollarla ölçülən vəsaiti geri qaytarmağa hazırdır. Bunun müqabilində isə özünün və yaxın ətrafının təhlükəsizliyinə təminat istəyir. Naxçıvandakı məlumatlı şəxs V.Talıbovun "fırtına" səngiyəndən sonra vəzifədən könüllü getməyə hazır olduğunu da bildirib”.
Vasif Talıbovla bağlı səslənən iddiaları nə dərəcədə əsaslı saymaq olar?
Əslən Naxçıvandan olan Cümhuriyyət Xalq Partiyasının sədri Bədrəddin Quliyev “Bakı-Xəbər”ə bildirdi ki, Naxçıvanda baş verən proseslər həm də Qarabağla bağlıdır: “Məsələyə yalnız korrupsiya baxımından deyil, həm də dövlət idarəçiliyinin təkmilləşdirilməsi nöqteyi-nəzərindən baxmaq lazımdır. Neçə illərdi ki, Naxçıvandakı məmurlar Azərbaycan qanunlarının orada işləməsinə maneçilik törədirlər. Hətta vətəndaşların qeydiyyatdan çıxıb-qeydiyyata düşmələri ilə bağlı baza məlumatlar da mərkəzə inteqrasiya olunmurdu. Faktiki olaraq, büdcə vəsaitləri istənilən şəkildə talan edilib. Türk dünyasının ümid qapısı olan Naxçıvanı Allahın ümidinə buraxmaq olmaz. Uzun müddət blokadada yaşayan Naxçıvan əhalisi belə sərt münasibəti haqq etmir. Geci-tezi bunun cavabı verilməliydi. Hadisələr göstərir ki, Vasif Talıbov hazırda mərkəzi hakimiyyətlə dil tapmağa çalışır. Belə olacağı təqdirdə, mənimsənilən vəsaitlərin geri qaytarılması təmin ediləcək. Bəlli olur ki, oranın gömrüklərindən qaçaqmalçılıq üçün bir koridor kimi istifadə ediblər. Siz dövlət qurumlarında olan yeyintilərin miqdarına baxın. 132 milyon birində, 144 milyon digərində, bu gün saxlanılanın yeyintisi isə 212 milyon olub. Bu qədər vəsaitin mənimsənilməsindən necə olub ki, rəhbərliyin xəbəri olmayıb? Bir də dövlət əxlaqı olmalıdır. Dövlətin vəsaiti niyə belə dağıdılmalıdır? Bütün bu proseslər göstərir ki, bölgədə vəziyyət dəyişir. Naxçıvana verilən Muxtar Dövlət statusu ləğv edilməlidir. Konstitusion islahatla bunu etmək mümkündür. Vasif Talıbov könüllü istefa verə bilər. Dövlət başçısının iradəsində asılı olaraq onun gələcək taleyi bəlli olacaq. Əminəm ki, bundan sonra Naxçıvanın idarəetmə sistemində özbaşınalıq olmayacaq. Ola bilər ki, Prezidentin səlahiyyətli nümayəndəsi ora təyin edilsin. Bələdiyyəlır səviyyəsində yerli idarəetməni də gücləndirəcəklər. Qarabağla bağlı atacağımız addımlar Naxçıvanla uzlaşmalıdır ki, ermənilərin də əlinə əsaslar verməyək”.
Məhəmmədəli QƏRİBLİ
