Biz Rusiya sülhməramlılarının müvəqqəti məsuliyyət zonasında olan Azərbaycan ərazilərində qanunsuz iqtisadi fəaliyyətə göz yuma bilmərik.
Bunu Trend-in Şuşaya ezam olunmuş müxbirinə Laçın yolunda keçirilən etiraz aksiyasının iştirakçılarından biri - “EkoSfera” Sosial-ekoloji Mərkəzinin əməkdaşı Jalə İsmayılova deyib.
"Artıq üçüncü gündür ki, etiraz aksiyası keçiririk. Məqsəd və tələblərimiz eynidir. Ölkəmizin təbii sərvətlərindən qeyri-qanuni istifadə dayandırılmalı və ekoloji terrora son qoyulmalıdır", - deyə J.İsmayılova bildirib.
J.İsmayılova vurğulayıb ki, Ermənistanın Azərbaycan ərazilərini işğal etdiyi dövrdə qəsdən əkin sahələri yandırılıb, qiymətli ağac növləri kəsilib. İndiyədək Ermənistanın mis-molibden zavodlarının tullantıları Oxçuçay çayına axıdılır.
"Biz bütün bunlara göz yuma bilmərik və buna görə də məqsədimizə çatana qədər sonadək burada dayanacağıq", - deyə o yekunlaşdırıb.
Qeyd edək ki, Azərbaycanın qeyri-hökumət təşkilatlarının nümayəndələri Rusiya sülhməramlılarının Şuşa şəhəri yaxınlığındakı postu yanında etiraz aksiyası keçirirlər. Onlar azərbaycanlı mütəxəssislərin Azərbaycan yataqlarının qanunsuz istismarı ilə bağlı monitorinq aparmaq üçün əraziyə buraxılmamasına etiraz edirlər.
