Ermənistanın hakim “Vətəndaş müqaviləsi” fraksiyasının deputatı Mariya Karapetyan bəyan edib ki, İrəvan Qarabağ münaqişəsində heç bir rol oynamayıb.
Erməni deputat bunu belə əsaslandırıb: “Ermənistanla Azərbaycan arasındakı sərhədin Dağlıq Qarabağ problemi ilə heç bir əlaqəsi yoxdur. Sərhəd 1991-ci ildə iki ölkə müstəqil olduqdan və Almatı Bəyannaməsi ilə təsdiqləndikdən sonra mövcuddur. Əgər Ermənistan başqa bölgədə olsaydı, “Artsax” xalqı öz müqəddəratını təyinetmə prosesindən keçərdi, elə deyilmi? Ermənistan-Azərbaycan dövlətlərarası sərhədinin Dağlıq Qarabağ məsələsi ilə heç bir əlaqəsi yoxdur, Ermənistan ərazi mübahisələrinə görə bu münaqişədə heç bir rol oynamayıb. Çünki bu, ərazi mübahisəsi deyil və Ermənistan ərazi mübahisəsinə cəlb edilməməlidir”.
Görünən odur ki, Ermənistan Qarabağı Azərbaycanın ərazi bütövlüyü məsələsindən ayırmaq istəyir. Beləcə, Almatı Bəyannaməsini öz maraqlarına uyğun təhrif edirlər.
“İrəvanın münaqişədə heç bir rolu olmayıbsa, son 30 ildə böyük insan itkiləri niyə baş verirdi?”
Məsələyə münasibət bildirən AMİP-in sədr müavini Afsəddin Nəbiyevin fikrincə, son günlərdə Ermənistan hakimiyyətini təmsil edən siyasi dairələrin nümayəndələri, hər zaman olduğu kimi, siyasi riyakarlıq nümayiş etdirirlər: “Mariya Karapetyan “İrəvan heç bir münaqişədə iştirak etməyib” dedikdə son 30 ildə Ermənistan silahlı qüvvələrinin Azərbaycanın ərazi bütövlünə qəsd etdiyi böyük dövrü gizlətməyə çalışır. Ermənistanın işğalçı dövlət olduğunu dünya ictimaiyyəti çox gözəl bilir. Əgər İrəvanın münaqişədə heç bir rolu olmayıbsa son 30 ildə böyük insan itkiləri niyə baş verirdi? Mariya Karapetyanlar bu sualların cavablarını çox gözəl bilirlər. Sadəcə etiraf etmək istəmirlər ki, Ermənistan oyuncaq dövlət olaraq bir çox dövlətlərin əlində maşa kimi istifadə olunub. Ermənistan siyasətçiləri Almatı Bəyənnaməsi ilə Azərbaycanın ərazi bütövlüyünü tanıdıqlarını məğlub olduqdan sonra dilə gətirirlər. Ancaq 44 günlük müharibədən əvvəl bu haqda demək olar ki, danışmırdılar. Erməni siyasətçiləri acı məğlubiyyətdən sonra Azərbaycan dövlətinə qarşı aparılan işğalçı siyasəti özlərinin siyasi maraqları naminə pərdələmək niyyətindədirlər. Ancaq bütün bunlar ermənilərin mənafeyinə uyğun baş tutacaq məsələ deyil. Azərbaycan işğal dövründə Ermənistanın işğalçılıq siyasəti nəticəsində dövlətimizə yüz milyardlarla dəymiş ziyanın hesabını beynəlxalq təşkilatlar qarşısında tələb etməkdədir. Onlar bunun hesabını versinlər. Azərbaycanın suveren ərazisində "artsax" mövzusu yoxdur. Qarabağ iqtisadi zonası, Azərbaycanın digər iqtisadi bölgələri kimi, Azərbaycanın yurisdiksiyasına daxildir və bu mövzu artıq qapanmışdır. Yaxşı olardı ki, Ermənistan öz üzərinə götürdüyü öhdəlikləri yerinə yetirməklə bölgədə nəhayət sülhə dəstək versin. Əks halda, gələcəkdə belə bir dövlətin mövcudluğu sual altında qalacaq”.
Partiyanın sədr müavini onu da əlavə etdi ki, zaman Ermənistanın əleyhinə işləyir.
Vidadi ORDAHALLI
