07/02/2023 03:19
728 x 90

Xamneinin doğma bacısı da ifrat molla rejiminə üsyan etdi...

Samir Adıgözəlli: “Xamneinin xalqdan uzaqlaşmasını vurğulamaqla mesaj verir ki, xalqdan uzaq olan liderin və hakimiyyətlərin sonu faciə ilə bitir”

img

İran adlandırılan mollakratiya rejimində vəziyyət o həddə çatıb ki, artıq o rejimə liderlik edənlərin ailə üzvləri də bu üsul-idarəyə qarşı çıxır, ona etirazını bildirir. Məlumdur ki, Tehran rejiminin yüksək səviyyəli məmurlarının ailə üzvləri, övladları əsasən xarici ölkələrdə yaşayır. Bu onların bu rejimlə razılaşmamasından irəli gəlir. Bu faktdır.

İranın ali rəhbəri ayətullah Seyid Əli Xamneinin də ailə üzvləri arasında onun siyasəti ilə razılaşmayanlar var. Xamneinin doğma bacısı qardaşını xalqın səsini eşitməməkdə ittiham edib.

İranın ali rəhbəri ayətullah Seyid Əli Xamneinin bacısı, hazırda həbsdə olan Fəridə Muradxaninin anası Bədri Hüseyni Xamnei müraciətində “Qardaşım İran xalqının səsinə qulaq asmır, yanlış olaraq öz muzdlularının, yaltaqların, xalqın payını yeyənlərin çıxışlarını İran xalqının səsi hesab edir” deyə bildirib. Bu barədə “İran İnternational” məlumat yayıb.

Onun sözlərinə görə, Xamnei günahsız insanları sıxışdırmaq və öldürməkdə Ruhullah Xomeyninin yolunu davam etdirir.

B.Hüseyni İranın ali rəhbəri ilə əlaqələri kəsdiyini, əvvəllər insani vəzifəsi olaraq dəfələrlə xalqın səsini ona çatdırdığını da vurğulayıb.

O, İslam Respublikası tərəfindən müxtəlif vaxtlarda yeniyetmə və gənclərin öldürülməsi, etirazçıların həbsinə toxunaraq yazıb: “Uşaq itkisi və övladdan ayrılıq hər bir ana üçün böyük kədərdir. Son dörd onillikdə bir çox analar yaxınlarını itiriblər”.

B.Hüseyni Xomeyninin və Xamneinin dövründə İslam Respublikası rejiminin törətdiyi cinayətlər nəticəsində günahsız ölən insanların analarına başsağlığı da verib.

“…Çox ciddi ittihamlar irəli sürür”

Mövzuya şərh verən İSBAM sədri Samir Adıgözəlli “Bakı-Xəbər”ə bildirdi ki, Xamneinin bacısının etirazı böyük məsələdir və buna kiçik bir hadisə kimi baxıla bilməz. “İranın dini rəhbərinin bacısının etirazına çox ciddi yanaşılmalıdır. Bu bir bacının qardaşına etirazı yox, molla rejimindən əziyyət çəkən cümlə qadınlarının etiraz səsidir. Bədri Hüseyni Xamneinin bacısı olmaqla yanaşı, həm də bir vətəndaşdır, vətəndaş olaraq da çox ciddi ittihamlar irəli sürür. Xamneinin xalqdan uzaqlaşmasını vurğulamaqla mesaj verir ki, xalqdan uzaq olan liderin və hakimiyyətlərin sonu faciə ilə bitir. O açıq bəyan edir ki, qardaşının başında durduğu rejim xalqla qarşı-qarşıyadır, xalqla üz-üzədir. Bədri Hüseyni bunlara rəvac verdiyinə və xalqın hədəf seçildiyinə görə qardaşını və onun yeritdiyi səhv siyasəti qınayır. Bu çox ciddi mesajdır.  Çox maraqlıdır, dünya təcrübəsi də göstərir ki, istənilən despot rejimə ailə daxilindən çıxan insanlar etiraz edirsə, bu həmin rejimin çürüdüyünü və məhvə məhkum olduğunu, xalqdan qopduğunu  göstərir. Xalqa zülm edən molla rejimi yalnız türkləri deyil, digər xalqları, elə farsların özlərini də hədəfə alıb. Hər bir dövlətdə xalqı idarə etmək üçün buna hakimiyyətin həm də mənəvi haqqı çatmalıdır. Mollakratyanın xalqa qarşı amansız davranışları, kütləvi qətlləri göstərir ki, bunu yalnız xalqa düşmən olanlar edə bilər. Molla hakimiyyəti bunu edibsə, demək o xalqa düşməndir. Molla rejimi özünün son dövrlərini yaşayır. Bu baxımdan Xamneinin bacısının da mövcud vəziyyəti çılpaqlığı ilə orta qoyması onlar üçün ciddi bir siqnal olmalıdır”-deyə S.Adıgözəlli qeyd etdi.

İradə SARIYEVA

Peşə etikası

Son xəbərlər