Ermənistanın xaricu işlər naziri Ararat Mirzoyan bəyan edib ki, ilin sonuna qədər Ermənistan və Azərbaycan arasında sülh müqaviləsinin yekun variantını işləyib hazırlamağın mümkün olacağından əmin deyil.
O bunu belə əsaslandırıb: “Sülhün bərqərar edilməsi və ya münasibətlərin nizamlanması fəal mərhələdədir və davam edir. Yeni redaksiyadakı sənəd dövriyyədədir. Biz hazırda Azərbaycan tərəfin növbəti təkliflərini aldıq, öz növbəti təkliflərimizi təqdim edəcəyik. Təəssüf ki, tərəflərin bir çox məsələlərlə bağlı yanaşlamaları hələ bir-birindən çox uzaqdır, amma danışıqlar da təmas nöqtələri tapmaq üçün aparılır. Hazırda ilin sonuna qədər xarici işlər nazirləri səviyyəsində görüş planlaşdırılmayıb. Amma təxmin edirəm ki, ilin sonuna qədər daha bir görüşümüz olacaq”.
Daha sonra Mirzoyan bunları əlavə edib: “Hər halda, biz həmin görüşə hazırıq, eləcə də bu danışıqlarda fəal və konstruktivik. Mən əmin deyiləm ki, ilin sonuna qədər müqavilənin az-çox yekun variantını əldə edə biləcəyik, baxmayaraq ki, biz bunu əvvəlcədən elan etmişik, lakin bu niyyət bəyanatıdır. Bizim niyyətimiz böyük ölçüdə etibarlıdır. Biz sülhə və bu hərtərəfli nizamlanmaya mümkün qədər tez nail olmaq üçün çalışırıq”.
Görünən odur ki, Ermənistan hər vəchlə danışıqları pozmaq istəyir. Hər dəfə bir bəhanə uydurur.
“Azərbaycan Silahlı Qüvvələrinin sülhə məcburetmə əməliyyatlarına başlaması artıq an məsələsinə çevrilir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, Ararat Mirzoyanın bu tipli yanaşmaları bir daha göstərir ki, Ermənistanın rəhbərliyi Azərbaycanla sülh razılaşmasını əldə etməmək üçün müxtəlif bəhanələrlə çıxış edir: “Üstəlik, prosesin uzadılması yönündə növbəti çıxış yolları axtarır. Belə addımlar ümumilikdə Cənubi Qafqazda dayanıqlı sülhün bərqərar olmasına nəinki maneələr törədir, habelə Azərbaycanın Ermənistanı sülhəməcburetmə prosesində daha qətiyyətli addımlar atmasına zərurətlər yaradır. Mirzoyanın daha bir fikrinə şərh vermək istərdim. O, qeyd edilən bəyanatı ilə yanaşı iddia edib ki, guya Ermənistana məxsus silahlıların Qarabağda olmamalarına rəğmən, orada, yəni cinayətkar rejimin qaldığı ərazilərdə “müdafiə ordusunun” qalmasına ehtiyac var və s. Yəni Mirzoyan bununla Qarabağdakı separatçı silahlıların qalması tərəfdarı olduğunu dilə gətirib və bu fakt da artıq belə qənaətə gəlməyə zəmin yaradır ki, Bakı sülhə maneələr törədən belə bəyanatlara laqeyd yanaşmayacaq. 44 günlük müharibədə olduğu kimi, növbəti işğaldan azadetmə kampaniyasına start verməklə yerdə qalan terrorçu, separatçı tör-töküntülərini torpaqlarımızdan rədd edəcək. O cümlədən, heç bir beynəlxalq təşkilatlar, ölkələr Azərbaycanın haqq işinə maneə yarada bilməyəcəklər. Çünki Prezident İlham Əliyevin də vurğuladığı kimi, bizim hələ də işğal altında qalan torpaqlarımız var və biz o torpaqları mütləq şəkildə azad etməliyik. İrəvanın isə ayrı seçimi yoxdur - ya sülh, ya da ümumiyyətlə siyasi xəritədən silinmə”.
B.Quliyev hesab edir ki, günü bu gün Rusiya sülhməramlılarının müvəqqəti yerləşdikləri Qarabağ ərazilərində Ermənistandan, İrandan müəmmalı yük maşınları rahat şəkildə Xankəndiyə və digər ərazilərimizə daxil olurlar və bu fakt özünü sübuta yetirib: “Əlbəttə, bu məsələdə də Ermənistanın rəhbərliyi ölçü götürməli və işğalçılıq missiyasından əl çəkməlidir. Bura Azərbaycanın suveren əraziləridir və üçtərəfli bəyanata əsaslanaraq həmin qüvvələr bölgəmizi tərk etməlidirlər. Rusiya Sülhməramlıları Komandanlığı isə bu məsələdə üzərinə düşən məsuliyyətini dərk edərək əməli şəkildə fəaliyyət göstərməlidir. Biz artıq bir neçə dəfə müşahidə etdik ki, Laçın-Xankəndi yolu istiqamətində jurnalistlərimizə qarşı hansı qeyri-qanuni hərəkətlərə rəvac verildi və bu prosesi RSK-nın arxasında dayanan qanunsuz erməni silahlıları “polis” geyimində müşahidə etdilər. Bütün bunlar nə deməkdir? O deməkdir ki, RSK-nın yerləşdiyi ərazilərdə silahlı separatçılar qalmaqda davam edirlər. Bəs Bakı nə tələb edir? Həmin qanunsuz silahlı birləşmələr Qarabağdan dərhal, qeyd-şərtsiz çıxarılmalıdır. Bu baş vermədikcə regionda müharibə risqi artır və Azərbaycanın qərar qəbul etdiyi vaxtda kimsə, heç bir dövlət, yaxud beynəlxalq qurum Azərbaycanın qarşısını ala bilməyəcək. Hesab edirəm ki, hər gün geridə qaldıqca bu kimi risq daha da artır və güclü, qüdrətli, qalib Azərbaycan Silahlı Qüvvələrinin sülhə məcburetmə əməliyyatlarına başlaması artıq an məsələsinə çevrilir. Bizim tarixi və dədə-baba torpaqlarımızda heç bir qüvvə - istər Ermənistan, istər İran, istər Fransa, istərsə də Rusiyanın qaranlıq dairələri istədikləri özbaşınalıqları törədə bilməzlər. Eləcə də Azərbaycanın faydalı qazıntılarını, digər vasitələrini talan etməyə də bundan sonra kimsə icazə verməyəcək. Artıq buz yerindən tərpənib və düşünürəm ki, Ermənistan rəhbərliyinin də bənzər və sərsəm bəyanatları müqabilində limitləri tükənib. Bundan sonrakı proseslərdə isə bütün məsuliyyətlər həm Ermənistan rəhbərliyinin, həm də onlara bu və ya digər şəkildə havadarlıq edən ölkələrin və qurumların üzərinə düşəcək. Azərbaycan dövləti və xalqı heç vaxt imkan verməyəcək ki, Zəfər ilə başa çatmış Vətən müharibəsindən sonra hər hansı qüvvələr yenidən torpaqlarımızda baş qaldırmaqla öz mənfur niyyətlərini reallaşdırsınlar. Bizim səbrimiz tükənməz deyil və nə qədər gec deyil, Ermənistan bunları anlasın”.
Əks təqdirdə, politoloq hesab edir ki, Ermənistan üçün nəticələr ağır olacaq.
Vidadi ORDAHALLI
