30/01/2023 01:33
728 x 90

Fransa naziri Azərbaycan-erməni sərhədində Rusiyanın qarant rolunu heçə endirdi...

Tural İsmayılov: “Rəsmi İrəvan Parisin tarix boyu davam edən ekspansionist siyasətinin yenidən dirçəlməyinə yardım edir”

img

Fransadan növbəti ermənipərəst canfəşanlıq. Fransanın xarici işlər naziri Katrin Kolonna parlamentdə keçirilən “hökumət saatı” zamanı Ermənistandakı Avropa İttifaqı missiyasının mandatının uzadılmasına çağırıb.

Katrin Kolonna iddia edib ki, insidentlər yenə də baş verir, amma bu missiya eskalasiya risqini azaldıb və zərurət olduqda sərhəddəki situasiyaya nəzarət edir. Fransa naziri bildirib ki, missiyanın mandatı buna ehtiyac olduğu müddətdə uzadılmalıdır: “İki ölkə arasında istər sərhəddə, istərsə də Dağlıq Qarabağda gərginlik qalmaqda davam edir və bu, Rusiyanın regiona gətirmək istədiyi təhlükəsizlik qarantiyalarına etimadın olmadığını göstərir. Bu kontekstdə Fransa və Avropa İttifaqı. lap əvvəldən olduğu kimi, Ermənistana dəstəyə tam qoşulmuş olaraq qalırlar. Bugünlərdə Brüsseldə və Vaşinqtonda sərhədin delimitasiyası və sülh müqaviləsinə dair yeni görüşlər keçirilib. Biz hesab edirik ki, bu imkan əldən buraxılmamalıdır. Bunu respublika prezidenti (Emmanuel Makron) Azərbaycan prezidenti İlham Əliyevə də, baş nazir Nikol Paşinyana da deyib. Mən də bunu vaxtaşırı öz həmkarlarıma deyirəm. Biz bu iki ölkə arasında sülhün bərpa edilməsi üçün səylərimizi davam etdirəcəyik”.

Məlumat üçün qeyd edək ki, oktyabrın 6-da Praqada keçirilmiş dördtərəfli görüşün nəticələrinə uyğun olaraq Ermənistana Aİ-nin müşahidə qrupunun göndərilməsinə dair qərar qəbul olunub. Bu qrup oktyabrın 20-dən Ermənistan ərazisində sərhəd boyunca yerləşdirilib. Fransa məlum çağırışla həm də Rusiyanın sərhəddə qarant rolunu heçə endirir.

  • “Burada Fransanın real məqsədi Rusiyanı bölgədən tamamilə sıxışdırıb çıxarmaqdır”

Məsələyə münasibət bildirən politoloq Tural İsmayılovun sözlərinə görə, Fransa Ermənistan vasitəsilə Cənubi Qafqazda təmsil olunmaq istəklərini daha da gücləndirib: “Məlum çağırış bu siyasətin tərkib hissəsidir. Bu gün Rusiyanın forpostu rolundan Fransanın kaloniyası roluna iddia edən Ermənistan, eyni zamanda Parisin tarix boyu davam edən faşist və ekspansionist siyasətinin yenidən dirçəlməyinə yardım edir. İstənilən halda, Fransanın hansısa missiyaları Ermənistan ərazisində uzunmüddətli və yaxud da müddətsiz etməklə bağlı hədəfləri var. Bu hədəflər də boşuna müəyyənləşdirilməyib. O baxımdan hesab edirəm ki, Fransa xarici işlər nazirinin açıqlaması Nikol Paşinyan hakimiyyəti ilə danışıqlar fonunda verilən açıqlamadır. Burada Fransanın real məqsədi Rusiyanı bölgədən tamamilə sıxışdırıb çıxarmaqdır. Həmçinin Ermənistan vasitəsilə Cənubi Qafqaz regionunda daha fəal iştirak etmək və həmçinin Rusiya sərhədlərinə yaxın növbəti təxribatlara rəvac vermək məqsədi daşıyır. Ona görə də rəsmi Paris tərəfindən Ermənistan üzərinə çox böyük missiya qoyulub. Bu missiyanın ən böyük hədəfi mümkün olan qədər Rusiyanı Ermənistan ərazisində bloklamaqdır. Təəccüb doğuran odur ki, Rusiya bugünə qədər Fransanın bu məkrli siyasəti ilə bağlı Ermənistana hansısa təzyiqlər etməyib. Rusiya tərəfindən bununla bağlı hansısa etiraz bəyanatına rast gəlməmişik. Ancaq istənilən halda, Fransanın Ermənistana bu qədər güclü təsir etməsi Gümrüdə hərbi bazası olan Rusiyanı ciddi narahat edir”.

Bu baxımdan politoloq güman edir ki, yaxın zamanlarda Ermənistan ərazisində Rusiya-Fransa gərginliyi baş verəcək.

Vidadi ORDAHALLI

Peşə etikası

Son xəbərlər