Elşən Həsənov: “Bütün bunlar onu deməyə əsas verir ki, yeri gələndə İran Ermənistanın əvəzindən danışmaq, bəyanat verməkdən belə utanmır”
İRNA agentliyinin Prezident İlham Əliyevin İrana yönəlik ittihamlarına “cavabı” artıq ötən gündən müzakirə predmetinə çevrilib.
Möhsün Pakayinin (Bakıdakı keçmiş səfir) qələmə aldığı və Tehranın arqumentlərini əks etdirən cavabda deyilir: “İlham Əliyev hətta türkdilli ölkələrin sammitində erməni torpaqları ilə bağlı tarixi iddialar səsləndirdi və Zəngəzur dəhlizinin açılması və Ermənistanın bir hissəsinin öz ərazisinə birləşdirilməsi üçün hərbi yoldan istifadə etməyə çalışdığını bildirdi. Belə bir hərəkət regionun geosiyasi durumunu dəyişmək, coğrafi sərhədləri təhdid etmək, bir ölkənin ərazi bütövlüyünü pozmaq və yeni münaqişələr yaratmağa cəhd deməkdir. İran isə buna biganə qala bilməz”.
İran diplomatının bu mövqeyi onun “ermənidən çox erməniliyini" üzə çıxardırmı?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, İranın Zəngəzur dəhlizi ilə bağlı qərəzli mövqeyi çoxdan məlumdur: “Əvvəla qeyd edim ki, İranın rəsmi dövlət agentliyi tərəfindən yayılan bu yazı ilə tanış olduqda, adamda maraqlı qənaət yaranır. Belə təəssurat hasil olur ki, sanki bu xəbəri hansısa erməni diplomatına istinadən Ermənistan KİV-i yayıb. Ermənistanın öhdəliyi olan Zəngəzur dəhlizi ilə bağlı daha çox narahat olan İrandır. Oranı hətta özünün “qırmızı xətti” də sayır. Zəngəzur dəhlizi gündəmə gələn kimi İran dərhal Qafanda konsulluq açmaq və konsulluğu qorumaq adı ilə əraziyə qüvvələr yerləşdirməyə başladı. İran niyə 30 ildir Qafanda konsulluq açmırdı, niyə yalnız Azərbaycan ərazilərini azad edəndən və Zəngəzur dəhlizi məsələsi gündəmə gələndən sonra Qafanda konsulluq qondarmaq yadına düşdü?
Azərbaycan Zəngəzur dəhlizi ilə Orta Dəhliz yaratmaq ideyasını aktivləşdirən kimi İran niyə Şimal-Cənub dəhlizini gündəmə gətirib?
Məqsəd yalnız və yalnız Azərbaycanın müəlliflik etdiyi iqtisadi layihələrə qarşı çıxmaq, regionda erməni separatizmini qızışdırmaqla, Azərbaycan üçün daimi təhlükəsizlik problemi saxlamaqdır.
Bu, yalnız faktları təhrif etmək deyil, həm də həyasızcasına yalan danışmaqdır.
Azərbaycan heç bir yerdə, heç bir zaman Ermənistanın hansısa ərazisinə iddia etdiyini açıqlamayıb. Azərbaycan Ermənistanın ərazi bütövlüyünü tanıdığını dəfələrlə elan edib. Biz Ermənistandan da eyni addımı atmağı tələb edirik. İranın oynadığı əsas kart Ermənistandır, amma Ermənistanın burada həlledici rolu yoxdur. İkinci əsas rol Rusiyaya məxsusdur. İran çalışır, Rusiya üzərindən proseslərə mane olsun. İranla Azərbaycan arasında Zəngəzur dəhlizi ilə paralel şəkildə İran ərazisindən keçən yolun açılması anlaşması əldə edildi. Bu, İran üçün regionda verilə biləcək ən böyük jestlərdən biridir. Təbii ki, Azərbaycan tərəfinin bu yolda öz maraqları var. Bizim İrana verə biləcəyimiz bu idi, bunu da etdik. Görünür, İran qəbul etmək niyyətində deyil. Bütün bunlar onu deməyə əsas verir ki, yeri gələndə İran Ermənistanın əvəzindən danışmaq, bəyanat verməkdən belə utanmır. İran diplomatının ifadə etdiyi mövqe də elə həmin ölkənin rəsmi mövqeyi kimi qəbul edilə bilər. Biz bundan yalnız təəssüf keçiririk”.
Məhəmmədəli QƏRİBLİ
