05/02/2023 15:19
728 x 90

Azərbaycan-Türkiyə hərbi təliminin ortaq bir düşmənə qarşı çevrildiyi rəsmən təsdiqləndi…

Daşdəmir Əliyev: “Türkiyə ilə keçirilən bu təlimlər bizi istəməyən, bizə güc nümayiş etdirməyə çalışan, hətta xəyallarında bizi qorxutmaq istəyən dövlətlərə açıq mesajdır”

img

Məlum olduğu kimi, Azərbaycanla Türkiyə arasında bağlanmış hərbi sahədə əməkdaşlıq haqqında sazişə əsasən "Qardaş yumruğu" adlı Azərbaycan-Türkiyə birgə təlimi keçirilib.

Azərbaycan Ordusu və Türkiyə Silahlı Qüvvələrinin müxtəlif qoşun növlərinin şəxsi heyəti, döyüş və xüsusi təyinatlı mühəndis-istehkam texnikası, həmçinin hərbi aviasiya vasitələrinin cəlb olunması ilə keçirilən təlim Bakı şəhərini, eləcə də Astara, Cəbrayıl və İmişli rayonlarının ərazilərini əhatə edib.

Ssenariyə uyğun olaraq, Azərbaycan Ordusunun Quru Qoşunları, Hərbi Hava Qüvvələri, Xüsusi Təyinatlı Qüvvələr, Mühəndis Qoşunları, Raket və Artilleriya Qoşunlarının bölmələri Türkiyə Silahlı Qüvvələrinin hərbçiləri ilə birgə müxtəlif təlim döyüş tapşırıqlarını yerinə yetiriblər.

Təlimdə müasir döyüş üsullarından istifadə etməklə artilleriya, aviasiya və digər qoşun növlərinin hərbi əməliyyatlarda tətbiqi, onların qarşılıqlı əlaqədə fəaliyyətinin təşkili, çaylar üzərindən keçid açmaq məqsədilə panton körpülərin salınması, şərti düşmənin dərinliyinə desant endirilməsi üzrə müxtəlif tapşırıqlar da icra edilb. Birgə təlimdə əsas diqqət qoşunların qarşılıqlı əlaqədə fəaliyyətləri zamanı döyüş uzlaşmasının təmin edilməsi, idarəetmənin təkmilləşdirilməsi, təcrübə mübadiləsi və şəxsi heyətin peşəkarlığının artırılmasına yönəldilib. Bundan başqa, Azərbaycan və Türkiyə hərbçilərinin iştirakı ilə keçirilən "Qardaş yumruğu" birgə təlimində gecə və məhdudgörmə şəraitində müxtəlif tapşırıqlar icra edilib. Təlimlərə Türkiyə Hərbi Hava Qüvvələrinin “F-16” qırıcıları cəlb edilib.

Xatırladaq ki, dekabrın 5-də Türkiyənin milli müdafiə naziri, ordu generalı Hulusi Akarın rəhbərlik etdiyi nümayəndə heyəti təlimləri izləmək üçün Azərbaycana gəlib.  Müdafiə naziri Zakir Həsənov və Hulusi Akar Azərbaycan-Türkiyə birgə təlimini izləyib.

Türkiyənin milli müdafiə naziri Hulusi Akar şəxsi heyətin təltifolunma mərasimində deyib: "Dünyada təhdid və təhlükələrin artdığı bir zamanda ölkələrimizin və millətimizin təhlükəsizliyini yalnız güclü orduya sahib olmaqla təmin etmək mümkündür".

Onun sözlərinə görə, birgə təlimlər də qarşılıqlı təcrübə mübadiləsi peşəkarlığın artırılmasında mühüm əhəmiyyətə malikdir.

H.Akar vurğulayıb ki, Türkiyə hər zaman Azərbaycanla istənilən təhdid və təxribatlara qarşı tək yumruq kimi birləşməyə hazırdır: "Dostumuzu birlikdə dost, düşmənimizi də birlikdə düşmən görürük".

Göründüyü kimi, Azərbaycan-Türkiyə hərbi təliminin ortaq bir düşmənə qarşı çevrildiyi rəsmən təsdiqləndi. Bundan kimlər və hansı nəticələri çıxarmalıdır?

Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki,  Azərbaycan-Türkiyə hərbi təlimlərinin keçirilməsi Azərbaycanın suveren hüququdur və qardaş dövlətlə aramızda olan hərbi-strateji münasibətlərdən irəli gəlir:

“Bu təlimlər iki qardaş dövlətin silahlı qüvvələrinin idarəetmə prosesinin sistemləşdirilməsi, mərkəzləşdirilməsi və eyni zamanda, təbii olaraq şəxsi heyətin professionallığının artırılmasına hesablanıb. Təbii ki, hərbi təlimlərin keçirilməsində bir hədəf də dünyaya, xüsusilə də ölkəmizə qarşı aqressiv münasibətdə olan bəzi xarici dövlətlərə hərbi potensialımızı nümayiş etdirməkdir. Türkiyə ilə keçirilən bu təlimlər bizi istəməyən, bizə güc nümayiş etdirməyə çalışan, hətta xəyallarında bizi qorxutmaq istəyən dövlətlərə açıq mesajdır.

Türkiyə ilə dostluq, qardaşlıq münasibətləri 2021-ci ilin 15 iyun tarixində işğaldan azad olunmuş Şuşa şəhərində imzalanmış Şuşa Bəyannaməsi ilə hərbi müttəfiqlik səviyyəsinə qalxmışdı. Hazırkı təlimlər də Şuşa Bəyannaməsinin maddələrinin icrası baxımından mühüm əhəmiyyət kəsb edir. Bu təlimlər zamanı bir sıra mühüm detallar təkmilləşdirilir, xüsusilə pantonlar vasitəsilə ağır texnikanın keçirilməsi, artilleriya, aviasiyanın təlimlərə cəlb olunması prosesin aktuallığından və əhəmiyyətindən xəbər verir. 

Son dövrlər İran tərəfinin Azərbaycana qarşı xoşagəlməz ritorikası müşahidə olunmaqdadır. Azərbaycanı işğal  etməklə bağlı müxtəlif informasiyalar yayılır, “Qüdsə gedən yol Bakıdan keçir” kimi təhdid dolu mesajlar narahatlıq yaradır. Məhz bu səbəbdən hərbi təlimlər həm də Azərbaycana qarşı məkrli plan quran tərəflərə qarşıdır. Prezident bu yaxınlarda çıxışlarından birində Türkiyə və Azərbaycan ordularının birliyi mövzusuna da toxundu. Yəni bizi təhdid edənlər bu gerçəkliyi nəzərə almalıdırlar. Azərbaycan və Türkiyə o ölkələrdən deyil ki, kimsə bizimlə  təhdid dilində danışsın”.

Məhəmmədəli QƏRİBLİ

Peşə etikası

Son xəbərlər