05/02/2023 14:13
728 x 90

Sülhməramlılar Qarabağda Azərbaycan jurnalistlərinə qarşı - erməni talançılarına birbaşa dəstək... - FOTO

Mehman İsmayılov: “Azərbaycan jurnalistlərinə qarşı edilmiş qanunsuz hərəkət Rusiya sülhməramlılarının bütün əndazələri, bütün qırmızı xətləri keçməsi anlamına gəlir”

img

Məlum olduğu kimi, Rusiya sülhməramlıları Azərbaycanın media nümayəndələrinin - İTV və "Real" TV-nin əməkdaşlarının Azərbaycanın suveren ərazisi olan  Xocalıya keçməsinə, bununla da ölkə ərazisində peşə fəaliyyəti borcunu yerinə yetirməsinə maneə törədib.

Qeyd edilir ki,  azərbaycanlı jurnalistlər doğma Azərbaycan ərazilərinə buraxılmayıb. Nəticədə jurnalistlərlə sülhməramlılar arasında mübahisə düşüb. Jurnalistlər onlara nə qədər izah etməyə çalışsa da, Rusiya sülhməramlı qüvvələrinin komandanı general-mayor Andrey Volkovdan göstəriş almış hərbçilər onları Xocalıya buraxmaq istəməyib.

İTV-nin bölgəyə ezam olunmuş jurnalisti isə sülhməramlılara “bura sizin ərazi deyil” sözləri ilə cavab verib.

İTV əməkdaşı qeyd edib ki, Rusiya sülhməramlıları hazırda faktiki olaraq öz mandatlarına aid olmayan işlə məşğul olurlar.

Vurğulanana görə, Rusiya Sülhməramlı Kontingentinin əraziyə buraxmadığı Azərbaycan jurnalistləri  Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin əməkdaşlarından ibarət təbii ehtiyatların qanunsuz istismarını araşdıracaq monitorinq qrupunun Xocalıda Rusiya sülhməramlı kontingentinin rəhbərliyi ilə danışıqlarını işıqlandırmaq istəyən media nümayəndələri olub ki, onlar da öz doğma torpaqlarında bu cür qanunsuzluqla üzləşiblər.

Qeyd edək ki, sülhməramlı kontingentin rəhbərinin Azərbaycan jurnalistlərinə əngəl olması və onları öz suveren ərazimizə buraxmaması ciddi ictimai narazılıq doğurub. Azərbaycan Mətbuat Şurası da  Rusiya sülhməramlılarının Qarabağda Azərbaycan jurnalistlərinə qarşı qanunsuz hərəkətlərini qəti şəkildə pisləyən bəyanat yayıb. Mətbuat Şurası ölkəmizin ərazisində müvəqqəti məskunlaşmış Rusiya Sülhməramlı Hərbi Kontingentinin Azərbaycan jurnalistlərinin fəaliyyətini məhdudlaşdırmasını qətiyyətlə pisləyib.

  • “Azərbaycan jurnalistlərini Azərbaycanın suveren ərazisinə buraxmamaq ermənilərə ümid vermək üçündür”

“Bakı-Xəbər” TV-nin aparıcısı, politoloq Mehman İsmayılov qəzetimizə şərhində bildirdi ki, Azərbaycan jurnalistləri qanunazidd addım atmayıb, onlar öz peşə fəaliyyətlərini yerinə yetirmək üçün öz suveren ərazilərimizə daxil olmaq istəyiblər, lakin sülhməramlılar qanunsuz olaraq buna mane olublar: “Birincisi, Azərbaycan jurnalistlərinə qarşı edilmiş qanunsuz hərəkət Rusiya sülhməramlılarının bütün əndazələri, bütün qırmızı xətləri keçməsi anlamına gəlir. Rusiya sülhməramlıları qanunsuz olaraq bizim jurnalistlərin qarşısını kəsiblər. Azərbaycan jurnalisti qanunların imkan verdiyi çərçivədə Azərbaycanın bütün suveren ərazilərində, o cümlədən də Xocalıda, Xankəndidə çəkiliş etmək, məlumat toplamaq və bunları da birbaşa mətbuatın missiyasına aid olan şəkildə yaymaq hüququna malikdir. Sülhməramlılar heç bir vəchlə jurnalistlərin qarşısını ala bilməz, bura Azərbaycanın suveren ərazisidir. Rusiya sülhməramlıları orada Azərbaycan vətəndaşları arasında ayrıseçkiliyə yol verməməlidir. Yəni hökumət nümayəndələri gəlsin, amma media nümayəndələri gəlməsin. Nə üçün? Ona görə ki, onlar üçtərəfli bəyanatın heç bir bəndinə əməl etmir, Azərbaycan ərazilərinə qanunsuz gələnlərin nəinki qarşısını almırlar, hətta Qarabağa gəlmələrinə özləri yardım edirlər. İrandan, Ermənistandan, başqa ölkələrdən ora terrorçuların, Fransa prezidentliyinə namizədin gəlməsi, Ruben Vardanyanın ora atılması, bütün bunlar Rusiya sülhməramlılarının Azərbaycanın dövlətçiliyi və torpaq bütünlüyü əleyhinə fəaliyyət göstərdiyini göstərir. Amma burada əsas məqam nədən ibarətdir? Azərbaycan jurnalistlərini Azərbaycanın suveren ərazisinə buraxmamaq ermənilərə ümid vermək üçündür. Ermənilər Azərbaycanın hökumət nümayəndələrinin, jurnalistlərinin Qarabağ iqtisadi zonasına gəldiyini gördükcə ümidsizliyə qapılırlar, depressiyaya girirlər, ərazini tərk etməyə baş vururlar. Ermənilərin Qarabağın ərazisini tərk etməsi isə Rusiyanın işğalçılıq siyasətinin əleyhinədir. Rusiya qəti şəkildə görmək istəmir ki, erməni Qarabağın ərazisini tərk etsin. Siz Qarabağa gedib orada gördüklərinizi ictimailəşdirmək istəyəcəksinizsə Rusiya sülhməramlıları onun əelyihə addımlar atacaq. Görürsüz ki, jurnalistlərə necə müqavimət göstəriblər, əl-ələ tutub onlara maneçilik törədirlər ki, Azərbaycanın ərazisinə getməsinlər. İTV-nin jurnalisti çox professional şəkildə dedi ki, mən öz dövlətimin ərazisindəyəm, sən niyə məni buraxmırsan. Sənin jurnalisti buraxmamaq üçün əlində bir qərarmı var? Sən onda niyə Fransa prezidentliyinə namizəd olan adamı bizim əraziyə buraxırdın? Andrey Volkov texniki vasitələrin olmamasından şikayət edirdi ki, biz İrandan gələn 14 casusun kim olduğunu bilməmişik, onları inşaatçı kimi əraziyə buraxmışıq. Bəs nə bildin gələnlər Azərbaycan jurnalsitləridir, bunu nə ilə yoxladın və buraxmırsan? Bu, Rusiyanın yeritdiyi işğalçılıq, erməniyə dəstək vermək, separatizmi ölməyə qoymamaq siyasətidir, bu aşkar görünür”.

Bu halla bağlı hansı addımların atılımalı olduğuna gəlincə, M.İsmayılov qeyd etdi ki, Azərbaycan ən yüksək səviyyədə sülhməramlıların qanunsuz hərəkətlərinə sərt reaksiya verməlidir. “Azərbaycan ən yüksək formada bu qanunsuzluqlara etirazını bilməlidir, eyni zamanda kütləvi şəkildə Azərbaycan jurnalistlərinin Xankəndiyə, Xocalıya səfərləri təşkil edilməlidir. Azərbaycan jurnalsitlərini Azərbaycan hərbiçiləri müşayiət etməlidir. Jurnalistlər ora qorumasız getməli deyil. Jurnalistlərimiz ora Azərbaycan hərbçilərinin və sözdə sülhməramlı adlandırılan kontingentin müşayiəti ilə getməlidir, çəkiliş aparmalıdır və göstərməlidir ki, bura bizim ərazimizdir, Azərbaycanın suveren hüquqları burada bərpa olunmalıdır. Məncə, ən yaxşı cavab bu olardı. Bir də onların qarşısına konkret olaraq zaman qoyulmalıdır ki, hansı zaman ərzində qanunsuz erməni hərbi birləşmələri, separatçıları Azərbaycan ərazilərindən çıxaracaqsan.  Azərbaycan Qarabağın ərazisində siyahıyaalma aparmalıdır. Orada yaşayanlar kimdir? Bu ermənilərin 1988-ci ilə qədər Azərbaycan vətəndaşlığı olub? Bu ermənilər hardan gəlib? Nə üçün Azərbaycan torpağında erməni silahlısı olmalıdır? Sülhməramlı sülh şəraiti yaratmalıdır, amma sülhməramlı silah daşıyır, sülhməramlı Azərbaycan əhalisi ilə erməni əhalisi arasında sülh yaratmalıdır, amma onların gözünün qarşısında atəş nöqtələri düzəldirlər, yeni səngərlər qazırlar, ağır teznika gətirirlər, mitinq təşkil edirlər, Andrey Volkov da birbaşa bu işlərdə iştirak edir” - deyə M.İsmayılov vurğuladı.  

İradə SARIYEVA

Peşə etikası

Son xəbərlər