05/02/2023 15:46
728 x 90

Bayramov-Lavrov görüşündən az əvvəl Rusiya XİN-in bəyanatındakı bir cümlə dərin suallar doğurub...

Əli Mustafa: “Rusiya, sadəcə olaraq, Türkiyədən bu nümunəni götürməlidir, rəsmi, yazılı münasibətlərə uyğun davranmalıdır”

img

Xarici işlər naziri Ceyhun Bayramovun  dekabrın 5-də Moskvaya etdiyi  səfər çərçivəsində Rusiyanın xarici işlər naziri Sergey Lavrovla görüşü oldu. Görüşdən əvvəl Rusiya Xarici İşlər Nazirliyi bəyanat yayımladı. Bəyanatda belə bir cümlə diqqəti çəkdi: “Azərbaycan Rusiyanın Cənubi Qafqazda və Xəzər regionunda mühüm tərəfdaşı, eyni zamanda müttəfiqidir”.

Rusiya Azərbaycanın müttəfiqidirsə, Qarabağdakı erməni separatçılarını niyə tərksilah etmir? Əksinə, Rusiyanın Qarabağdakı hərbi kontingenti erməni separatçıları ilə əməkdaşlığı genişləndirir. Digər tərəfdən, Rusiya Müdafiə Nazirliyinin Qarabağdakı məntəqələri erməni dilində adlandırması Azərbaycanda böyük etiraz yaradıb. Rusiya Ermənistanla Qarabağı birləşdirən yoldan xarici ölkə vətəndaşlarının keçidinə də şərait yaradıb. Bu, Azərbaycan qanunlarına ziddir. İran kəşfiyyat strukturlarının nümayəndələri Ermənistandan Qarabağa keçir və rusiyalı hərbçilər buna şərait yaradırlar. Rusiyanın öz emissarı olan milyarder Vardanyanı Qarabağa hansı məqsədlə göndərdiyi də hamıya məlumdur. Bizim ekoloqlar yolu bağlayanda, adını sülhmıramlı qoyan rus generalın arxasından boylanan silahlı erməni  “polis”lərinə göz yummaq nə dərəcədə doğru sayıla bilər?

Bütün bunlar müttəfiqlik mübasibətləri ilə uzlaşırmı?

Demokratik Dəyişim Partiyasının sədri Əli Mustafa “Bakı-Xəbər”ə açıqlamasında bildirdi ki, Rusiya ilə Azərbaycan arasında hərbi və digər sahələrdə əməkdaşlığı şərtləndirən bir müqavilə var: “ Söhbət 22 fevral 2022 - ci ildə imzalanan bəyannamədən gedir. Burada münasibətlərin strateji müttəfiqlik səviyyəsinə qaldırılmasından danışılır. Amma çox təəssüf ki, Rusiya da digər bəzi dövlətlər kimi dediklərinin tam əksinə hərəkət edir. Bu dövlətlərin davranışında mənəvi, əxlaqi dəyərlər bu gün ön planda deyil”.

Partiya sədrinin sözlərinə görə, hətta bir çox hallarda dövlətlərin bir-birini aldatmasına bir qabiliyyət və ya siyasətin tələbi  kimi baxılır: “Amma bu, məncə insanlıq, mənəvi və əxlaqi qanunlara ziddir. Yəni insanlar kimi dövlətlər də sözü ilə əməli eyni olanda əxlaqlı hesab olunur. Bütün hallarda davranışlar, fikirlər və sözlər bir-birini tamamlamalıdır. Əks təqdirdə bu siyasət deyil, riyakarlıqdır. Ona görə də, anlaşılandır ki, Rusiya sözdə Azərbaycanla müttəfiq olduğunu deyir, amma əməlində isə Qarabağda separatçıları himayə edir, İranın casus şəbəkəsinin ora doluşmasına şərait yaradır. Bütün bunlar, əlbəttə, strateji əməkdaşlığa tamamilə ziddir. Rusiya bir şeyi anlamalıdır. Ya yazılı, rəsmi öhdəliklərinə əməl etməlidir, ya da adekvat reaksiya ilə üzləşəndə təəccüblənməməlidir. Azərbaycan tərəfinin əslində haqqı var ki, Rusiyanın əməllərinə uyğun addımlarla  Rusiyanın özünə cavab versin. Odur ki, Rusiya tərəfi bir daha düşünməlidir. Əgər müttəfiqiksə, müttəfiqlik münasibətlərinə xələl gətirən fəaliyyətlərin hamısı dayandırılmalıdır, Qarabağ separatçılardan təmizlənməlidir, Azərbaycanın dövlət maraqlarına, Azərbaycanın süverenliyinə, milli maraqlarına hörmət edilməlidir və bunun da nümunəsini Rusiya göstərməlidir. Necə ki, bunu Türkiyə edir. Türkiyə strateji əməkdaşlıq münasibətlərinə sadiqdir, həm mənəvi, həm əxlaqi baxımdan sözü ilə əməli üst-üstə düşür. Rusiya da sadəcə olaraq Türkiyədən bu nümunəni götürməlidir. Rəsmi, yazılı münasibətlərə uyğun davranmalıdır. Mən düşünürəm ki, bir gün adekvat reaksiya ilə üzləşəndə təəccüblənməməlidir”.

Məhəmmədəli QƏRİBLİ

Peşə etikası

Son xəbərlər