İranda qadınlar hicaba “yox” desələr də, hələ də onlara qarşı təzyiqlər qalmaqdadır. “Donya-e-Eqtesad” qəzeti parlamentin deputatı və İran İslam Şurasının Mədəniyyət üzrə komissiyasının üzvü Hüseyn Cəlalinin açıqlamasını dərc edib. Cəlali bildirib ki, İran hicab taxmaq qaydalarına əməl etməyən qadınların bank hesablarını donduracaq.
Millət vəkili təklif edib ki, qadınlar hicab taxmaq qaydalarına tam və ya qismən əməl etmədikdə, həbs etməsinlər: “Hicab qanununun dəfələrlə pozulması halında ilk növbədə qadınlara yazılı xəbərdarlıq edilməsi, onların bank hesablarının dondurulması daha effektiv olar. Etirazların sonunda İranda mütləq bütün qadınlar əvvəllər olduğu kimi hicab və çadra geyəcəklər”.
Qeyd edək ki, İranda oktyabr ayında küçəyə hicabsız çıxdığı üçün öldürülən gənc qız - Məhsa Əmini üçün etiraz mitinqləri keçirilir.
Iranda baş örtüyü taxmayan qadınların bank hesablarının dondurulması beynəlxalq qanunvericiliyin tələbini pozur.
“Baş örtüyü taxmayan qadının bank hesabının dondurulması fikri ona görə səslənib ki, İran hakimiyyəti hicabdan vaz keçmək fikrində deyil”
Orta Doğu Araşdırma Mərkəzinin rəhbəri Sədrəddin Soltan “Bakı-Xəbər”ə açıqlamasında qeyd etdi ki, İranda hicab taxmaq qaydalarına əməl etməyən qadınların bank hesablarının dondurulacağı fikri əxlaq polisinin ləğv olunması qərarından sonra gündəmə gəldi: “Hicab taxmayan qadınların bank hesabının dondurulması məntiqli deyil. Çünki bu qərar İranın bank-maliyyə sistemini çökdürə bilər. Həmçinin, bu qərar ölkədən maliyyə axınının çıxmasına şərait yaradar. İranın hazırki vəziyyətdə belə bir təklifi müsbət dəyərləndirəcəyi real görünmür. İranın Mərkəzi Bankının məlumatına görə, 16 ayda həmin ölkə vətəndaşları kapitalını ölkədən çıxarıb. Iş adamları, maliyyə vəziyyəti yaxşı olan şəxslər artıq İranı tərk edir. Bu səbəbdən də İran iqtisadiyyatı ciddi şəkildə fəlakətə doğru yol alıb. Belə bir şəraitdə baş örtüyü taxmayan qadınların bank hesablarının dondurulması təklifi yersizdir”.
Həmsöhbətimiz onu da əlavə etdi ki, baş örtüyü taxmayan qadının bank hesabının dondurulması fikri ona görə səslənib ki, İran hakimiyyəti hicabdan vaz keçmək fikrində deyil. İranda fəaliyyət göstərən bəzi qüvvələr hicab qaydalarının daha da sərtləşdirilməsini, baş örtüyü taxmayan qadınlara sərt cəzaların tətbiq edilməsini istəyir. Ancaq ölkənin ali dini lideri Ayətullah Əli Xamneyi bəyan etdi ki, ölkədə mədəniyyət sahəsində dəyişiklik edilməlidir”.
Günel CƏLİLOVA
