05/02/2023 14:46
728 x 90

İran Ermənistana valyuta qazandıran əsas ölkə rolunda - ticarət dövriyyəsi erməni ixrac malları hesabına iki dəfə artıb...

Aydın Hüseynov: “İran lazım gəlsə özü ziyana gedər, təki Ermənistan qazansın”

img

İranın Ermənistana olan sevgisi ilə bağlı növbəti göstərici. 44 günlük müharibədən sonra 2 ölkə arasında ticarət daha da artıb. Ermənistanın iqtisadiyyat nazirinin müavini Armen Arzumanyan bəyan edib ki, 2022-ci ilin ilk on ayında Ermənistanla İran arasında ticarət dövriyyəsi 45,3% artaraq 565,6 milyon dollara çatıb.

Arzumanyanın sözlərinə görə, 2021-ci illə müqayisədə (390 milyon dollardan çox olub) bu il sabit artım qeydə alınıb ki, bu da digər amillərlə yanaşı, iki ölkənin ticarət attaşelərinin işi sayəsində əldə edilib: “Bu rəqəm işgüzar əməkdaşlığın müsbət istiqamətdə inkişaf etməsi deməkdir”.

Nazir müavini artımın dekabr ayında da qeydə alınacağına ümid etdiyini bildirib. Arzumanyanın sözlərinə görə, göstəricilərin yaxşılaşması əsasən Ermənistan məhsullarının ixracı hesabına təmin edilib. Nazir müavini onu da vurğulayıb ki, ölkəsi ixrac həcmini daha da artıra bilər: “Ermənistan məhsulları yüksək keyfiyyətlidir və iranlı istehlakçıların zövqünə uyğundur. Lakin 80 milyonluq bazarda rəqabət aparmaq üçün özünə yer tapmaq lazımdı”.

O xüsusi olaraq qeyd edib ki, hər iki ölkənin liderləri ticarət dövriyyəsini 3 milyard dollara çatdırmaqla bağlı qarşıya məqsəd qoyublar. Bu məqsədlə sözügedən qurumda işgüzar dairələrin nümayəndələrinin iştirakı ilə müzakirə təşkil olunub.

Burada diqqəti çəkən xüsusi məqam ondan ibarətdir ki, iki ölkə arasında ticarət dövriyyəsinin artması Ermənistan məhsullarının ixracı hesabına əldə olunub. Deməli, İran Ermənistan məhsullarının bu ölkəyə ixrac olunmasına hər cür şərait yaradıb. Bu o deməkdir ki, İran məqsədyönlü şəkildə Ermənistana valyuta qazanmaqla bağlı şərait yaradır. İran həm də ölkə ərazisi vasitəsilə Ermənistan məhsullarının digər dövlətlərə ixrac olunmasına əlverişli şərait yaradır.

  • “Tehran rejimi iqtisadi baxımdan belə bir şərait yaradır ki, bu ölkə çökməsin”

Məsələyə münasibət bildirən millət vəkili Aydın Hüseynovun sözlərinə görə, İran məqsədyönlü şəkildə Ermənistana bu şəraiti yaradır: “Əslində, İranda Ermənistan məhsullarına elə bir tələbat yoxdu. Çünki Ermənistanın ixrac edəcəyi elə bir strateji məhsulu yoxdur. Ermənistan əsasən aqrar məhsullar istehsal edir, amma onlara da İranda elə bir xüsusi tələbat yoxdu. Üstəlik, Ermənistanda qonşu ölkələrin marağına səbəb olacaq elə bir sənaye məhsulu, texnoloji avadanlıqları da yoxdur. Bir sözlə, bu gün İran bazarında Ermənistan məhsullarına elə bir tələbat yoxdur. Sadəcə olaraq, Tehran rejimi iqtisadi baxımdan Ermənistana belə bir şərait yaradır ki, bu ölkə çökməsin. Ona görə ki, fars rejimi Ermənistanı özünə müttəfiq hesab edir. Bu ölkədən türk dünyasına qarşı bir alət kimi istifadə edir. Xüsusən də Azərbaycana qarşı. Məsələnin fəlsəfəsi bundan ibarətdir. İran lazım gəlsə özü ziyana gedər, təki Ermənistan qazansın. Bu səbəbdən orada ermənilər üçün çox böyük şərait yaradıb. Məhz bu səbəbdən 2021-ci illə müqayisədə 2022-ci ilin 10 ayında iki ölkə arasında ticarət dövriyəsi 390 milyon dollardan çox artıb. Bu, Tehran rejiminin birbaşa erməni sevgisinin bariz nümunəsidir. Bu həmin İrandır ki, ərazilərimiz işğal altında olanda Ermənistanla birlikdə sərvətlərimizi talayırdılar. Necə ki ərazilərimiz işğaldan azad olundu, bu dəfə başqa formada Ermənistanı himayə edirlər. Bu baxımdan İranın Ermənistanla bağlı siyasətində dəyişən bir şey yoxdur”.

Millət vəkili onu da əlavə etdi ki, İran rejimindən nə desən gözləmək olar.

Vidadi ORDAHALLI

Peşə etikası

Son xəbərlər