07/02/2023 01:54
728 x 90

Kanada mətbuatı “Fransa erməniçiliyini” yerə sürtdü, Qarabağ rejimini HƏMAS-a oxşatdı...

Rövşən Rəsulov: “...Erməni separatçılarının əsl qiyməti verilib və onlar terrorçularla eyniləşdirilib”

img

Kanadanın nüfuzlu “Thej.ca” yəhudi media platformasında “Fransa Azərbaycanla Ermənistan arasında sülh prosesinə mane olur” sərlövhəli məqalə dərc olunub. Bu barədə Azərbaycan mediasında məlumat yayılıb.

Qeyd edilənə görə, tanınmış israilli politoloq və jurnalist, Dona Qrasiya Diplomatiya Mərkəzinin təsisçisi və baş direktoru Reyçel Avrahamın qələmə aldığı məqalədə bildirilib ki, Fransa Senatı tərəfindən Azərbaycana qarşı sanksiyaların tətbiq edilməsini və BMT Təhlükəsizlik Şurasının dörd qətnaməsini pozaraq Azərbaycan ərazisində yaradılmış, Qəzzadakı HƏMAS hökuməti ilə eyni beynəlxalq legitimliyə malik erməni separatçı qurumu olan “Dağlıq Qarabağ Respublikası”nın Fransa tərəfindən tanınmasını tələb edən qətnamənin qəbul edilməsi anlaşılan olmamaqla yanaşı, yolverilməzdir.

Qeyd olunub ki, iki postsovet respublikası arasında sərhədlərin delimitasiya olunmamasına rəğmən, cari ilin sentyabrında tərəflər arasında hərbi qarşıdurmanın qızışdığı bir vaxtda Azərbaycanı “erməni ərazisi”ndən çıxmağa çağıran Fransa Senatı bu hərəkəti ilə odun üstünə yanacaq əlavə edib, habelə sərhəddə qarşıdurmanın təşəbbüskarı erməni təxribatçıları olsa da, azərbaycanlıların ölümünə məhəl qoymadan məsələyə birtərəfli yanaşıb.

Müəllif Fransa Senatının qətnaməsinin məcburi xarakter daşımaması və heç bir hüquqi qüvvəyə malik olmaması müstəvisində sözügedən qətnamənin hələ də hər iki ölkə arasında sülh prosesinə ciddi əngəl törətdiyini diqqətə çatdırıb. Bu mövqeyini Fransa prezidenti Emmanuel Makronun verdiyi qərəzli ermənipərəst bəyanatlarla əsaslandıran israilli politoloq əlavə edib ki, Makron “Dağlıq Qarabağ Respublikası”nın tanınmasına heç vaxt çağırış etməsə də, BMT Təhlükəsizlik Şurasının dörd qətnaməsinə uyğun olaraq Azərbaycanın tərkib hissəsi kimi tanınmış Qarabağın “mübahisəli ərazi” olduğunu israrla iddia edib.

Məqalədə qeyd olunub ki, Azərbaycan Prezidenti İlham Əliyev cari il dekabrın 7-nə planlaşdırılan, Aİ rəhbəri və Makronun iştirakı ilə nəzərdə tutulan görüşü ləğv edib və Makronun anti-Azərbaycan mövqe tutduğunu, Bakını təhqir etdiyini və buna görə də sülh danışıqlarında heç bir rol oynamamalı olduğunu vurğulayıb: “Makron Azərbaycana həmlə edib, etmədiklərimizə görə bizi ittiham edib. Aydındır ki, Fransa bu şəraitdə, belə bir münasibətlə Azərbaycan və Ermənistan arasında sülh prosesinin bir hissəsi ola bilməz”.

  • “Kanadada yəhudi nəşrinin erməni separatçılarını faktiki olaraq terrorçularla eyniləşdirməsi həm də cürətli bir addım sayıla bilər”

Tanınmış israilli politoloq və jurnalist, Dona Qrasiya Diplomatiya Mərkəzinin təsisçisi və baş direktoru Reyçel Avrahamın sözügedən məqaləsinə şərh verən siyasi ekspert Rövşən Rəsulov “Bakı-Xəbər”ə bildirdi ki, Kanadada fəaliyyət göstərən yəhudi media platformasının Qarabağdakı separatçıları HƏMAS-a və digər terror təşkilatlarına bənzətməsi təəccüblü deyil: “ Çünki bildiyimiz kimi, Azərbaycanın yəhudi diasporu ilə əlaqələri kifayət qədər möhkəmdir. Eyni zamanda, istər Vətən müharibəsində, istərsə də ondan əvvəlki və sonrakı dövrlərdə İsrailin diaspor platforması daim Azərbaycan dövləti və azərbaycanlılarla sıx əlaqədə olub. Bu gün yəhudi-Azərbaycan birliyi özünü ən yüksək səviyyədə göstərməkdədir. Bu baxımdan      Reyçel Avrahamın Kanada mediasında çap etdirdiyi yazıda erməni separatçılarının əsl qiyməti verilib və onlar terrorçularla eyniləşdirilib. Gerçəkdən də Qarabağdakı separatçılar terrorla məşğul olur. Bu cür ciddi məsələ ilə bağlı yazının məhz Kanada mətbuatında çıxması da diqqəti çəkir.

Əslində həmişə Kanada Ermənistanın işğalçılıq siyasətinə müxtəlif vasitələrlə don geydirməklə ona bu və digər formada dəstək göstərib. Ermənipərəst mövqeyi ilə seçilən Kanadada separatçıları ifşa edən yazının çap olunması müsbət haldır”.

R.Rəsulovun sözlərinə görə, Kanada ilə Paşinyan hakimiyyəti arasında daha sıx əlaqələr mövcuddur, bu əlaqələrin də bir çox səbəbləri var. Paşinyanın Corc Sorosun əli ilə hakimiyyətə gəldiyini vurğulayan R.Rəsulovun bildirdiyinə görə, Kanada da ölkə olaraq C.Sorosun siyasi ofislərindən biri hesab edilir: “Məhz bu səbəbdən Kanadada yəhudi nəşrinin erməni separatçılarını faktiki olaraq terrorçularla eyniləşdirməsi həm də cürətli bir addım sayıla bilər. Halbuki, Kanadada nə qədər demokratik mühit olduğu iddia edilsə də, onlar bu məsələyə sərt yanaşırlar. Bu baxımdan, onlar hər vəchlə bu mövzunun işıqlandırılmasının qarşısını ala bilərdi. Lakin nəzərə alsaq ki, Azərbaycana dəstək verən yəhudi lobbisi öz gücünü göstərir, bunu da həmin gücün davamı kimi görə bilərik. Ümumiyyətlə, Qarabağdakı separatçıların və Fransanın Kanadada hədəfə alınması yəhudi-Azərbaycan birliyinin uğuru kimi göstərilə bilər. Digər tərəfdən bu, Azərbaycanın da bir uğurudur. Qarabağdakı separatçılar və onlara havadarlıq edən Fransa, bu ölkənin yanlış siyasəti hədəfə götürülüb. Belə hallar artıq Azərbaycanla isti münasibətdə olmayan ölkələrdə də cərəyan etməyə başlayıb. Çox istərdik ki, bənzər məqalələr Fransa mətbuatında da çıxsın. Əslində, həqiqət heç zaman gizlədilə bilməyib, həqiqət, ədalət hər zaman qalib olub, bu da o həqiqətin bir parçasıdır”.

İradə SARIYEVA

Peşə etikası

Son xəbərlər