05/02/2023 15:41
728 x 90

Azərbaycan Qarabağda ermənilərin təbii sərvətlərimizi talan etməsini nəzarət altına ala bildi...

Əli Orucov: “Bu, qarşı tərəfə verilən mesaj idi”

img

Xəbər verildiyi kimi, Azərbaycan Respublikası Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və "AzerGold" Qapalı Səhmdar Cəmiyyətinin əməkdaşları Rusiya sülhməramlı qüvvələrinin müvəqqəti yerləşdiyi Azərbaycan ərazilərinə keçərək, Xocalıda sülhməramlı qüvvələrin qərargahında sülhməramlıların komandanlığı ilə müzakirələri davam etdiriblər.

Müzakirələr əsnasında Rusiya sülhməramlı qüvvələrinin müvəqqəti yerləşdiyi Azərbaycan ərazilərində aparılan qeyri-leqal iqtisadi fəaliyyətlər çərçivəsində faydalı qazıntıların qanunsuz istismarı, bundan irəli gələn ekoloji və digər törəmə fəsadlarla bağlı ciddi narahatlıq və narazılıq bir daha ifadə olunub. Bu xüsusda, faydalı qazıntıların qanunsuz istismarının aparıldığı yataqlarda və müvafiq digər məntəqələrdə monitorinq, əmlakın inventarizasiyası və ekoloji araşdırma işlərinin aparılmasının vacibliyi vurğulanıb. Xocalıda, sülhməramlı qüvvələrin qərargahında keçirilmiş müzakirələrin nəticəsi olaraq, qeyd olunan fəaliyyət istiqamətləri üzrə ərazidə işlərin aparılması üçün Azərbaycan Respublikası Ekologiya və Təbii Sərvətlər Nazirliyi və digər aidiyyəti qurumların iştirakı ilə yol xəritəsinin hazırlanmasına başlanıb.

Bu, olduqca əhəmiyyətli bir məsələdir. O baxımdan ki, həmin ərazilərin sahibsiz olmadığı həm rus sülhməramlılarının, həm də erməni separatçıların diqqətinə çatdırılır.

Maraqlıdır, bəs ekspertlər bütün bunları necə dəyərləndirir? Bunun əhəmiyyəti nədən ibarətdir? Nə kimi nəticələr verə bilər? Bu yöndə daha yaxşı nəticələr əldə etmək üçün bundan sonra nə etmək lazımdır?

  • “Separatçıların Qarabağın təbii sərvətlərini talamasını önləmək üçün davamlı olaraq bu məsələnin üzərinə getmək lazımdır”

Məsələyə münasibət bildirən AMİP funksioneri Əli Orucovun fikrincə, məlum müzakirələrin müəyyən əhəmiyyəti var: “Əhəmiyyəti odur ki, Azərbaycan bununla bağlı qarşı tərəfə mesaj verir. Mesaj verir ki, separatçıların Rusiya sülhməramlılarına arxalanaraq Qarabağın təbii sərvətlərini istismar etməsinə dözməyəcək. Yəni belə qanunsuz hallar sonsuza qədər davam etməyəcək. Erməni mətbuatında yazılanlardan belə məlum olur ki, separatçılar ciddi təşviş içindədilər. Çünki onlar bunu gözləmirdilər. Eyni zamanda hesab edirdilər ki, Azərbaycan cəhd etsə belə, sülhməramlılar buna icazə verməyəcək. Ancaq onların bu yöndə gözləntiləri özünü doğrultmadı. Hesab edirəm ki, bu hələ başlanğıcdır. Separatçıların Qarabağın təbii sərvətlərini talamasını önləmək üçün davamlı olaraq bu məsələnin üzərinə getmək lazımdır. Bununla bağlı bütün vasitələrdən sinxron olaraq istifadə etmək lazımdır. İstər siyasi-hüquqi, istərsə də hərbi vasitələrə əl atmaq lazımdır. Bir sözlə, daim bu məsələnin üzərinə getmək lazımdır. Ta ki, ərazilər tam nəzarətimizə keçənə qədər”.

Vidadi ORDAHALLI

Peşə etikası

Son xəbərlər