Uzun illərdir ki, Gürcüstanda yaşayan soydaşlarımızın bir sıra təhlükələrlə üz-üzə qaldığı barədə danışılır. Soydaşlarımızın yaşadıqları bölgələrdə yaşanan ciddi problemlərdən biri İranın, fars-molla rejiminin öz təbliğatını qurmağa nail olmasıdır.
Təəssüflər olsun ki, molla rejimi və onun əlaltıları borçalıların öz dini inanclarına sadiqliyindən, eləcə də Əhli Beytə sevgisindən geniş şəkildə sui-istifadə edərək şiəlik adı altında Xomeynizmi yaymaqla məşğul olur. Qumda xüsusi təhsil və təlim görmüş irançılar bu gün Borçalının bəzi yerlərində öz ideologiyalarını yaymaqla, daha çox insanın beynini zəhərləməklə məşğuldur, nəticədə borçalılar arasında İranın saxta dini təbliğatına uyanların sayı günü-gündən artmaqdadır. Bu ziyanlı təbliğatdan daha çox insanın zəhərlənməməsi, gənclərin daha artıq beyinlərinin yuyulmaması üçün Borçalı ziyalıları sosial şəbəkələrdə və mətbuatda həyəcan təbili çalmaqdadır. Bəli, bu gün fars şovinist rejimi nəinki əhalisinin çox böyük hissəsi müsəlman olan Azərbaycanda, eləcə də xristian ölkələrdə bu cür zəhərli və zərərli təbliğat aparır, insanların beyinlərini yuyur. Əlbəttə, borçalıların da bu hədəfə tuş gəlməsi narahatedicidir. Öz milli kimliyinə, dini inancına, dəyərlərinə hər zaman sahib çıxmağı bacaran borçalılar arasında İranın təbliğatına uyanların olması ürəyimizi ağrıdır. Bu yanlış təbliğatın qarşısının alınması üçün borçalıların qeyrət göstərəcəyinə inamımız tamdır.
Fars molla rejiminin Borçalı türklərini hədəf seçməsi nə ilə bağlıdır ki, onların xeyli hissəsi bu yanlış təbliğatın təsirinə düşüb?
“O vaxt Azərbaycanın başı öz problemlərinə qarışdığından, İran fürsətdən istifadə edib soydaşlarımızın içinə sızmağa, öz zərərli təbliğatını aparmağa başladı”
Milli Cəbhə Partiyasının (MCP) sədr müavini, tanınmış ilahiyyatçı Tural İrfan “Bakı-Xəbər”ə şərhində bildirdi ki, İran təkcə Azərbaycanda və Gürcüstanda deyil, bütün dünyada, əli çatan müsəlman ölkələrində bu cür təxribatlarla məşğuldur. “İran məzhəbçilik pərdəsi altında belə ziyanlı təbliğat aparır. Öz “inqilabını” ixrac etmək amalı ilə təbliğatını və kəşfiyyatını, terror dəstələrini qurur, yaradır. Bu, silsilə şəklində davam edir. Birincisi, insanları din pərdəsi, şiəlik adı altında fərqli təriqətə cəlb edirlər. Ondan sonra yavaş-yavaş kəşfiyyat orqanlarını, ardınca isə müxtəlif adlar altında terror təşkilatlarını qururlar. Gürcüstanın azərbaycanlılar yaşayan bölgəsi, Borçalı da bunlardan biridir. Deyək ki, İranın Suriyada, Yəməndə, İraqda nə oyunlar çıxardığı, hansı təxribatlar törətdiyi məlumdur. Həmçinin Azərbaycanda da İranın agentura şəbəkəsinin ifşa edildiyinin şahidi olduq, o şəbəkənin üzvləri həbs edildi, hazırda bu yöndə araşdırma gedir və bu məsələ təhlükəsizlik orqanları tərəfindən nəzarətə götürülüb. Çox təəssüf ki, Gürcüstanda İranın din pərdəsi altında zərərli təbliğat aparmasına zəmin yarandı və onlar da soydaşlarımızın arasına nüfuz etdilər. Bu şəraitdən istifadə edib insanların beynini yumağa başladılar. Sözün açığı, bunun bir günahı da bizim özümüzdə oldu. O dövrlər Azərbaycan dövlətinin Qarabağ münaqişəsi kimi ciddi problemi vardı, qaçqın-köçkün axını ilə üzləşmişdi, başqa digər çətinlikləri mövcud idi və bu üzdən xaricdə yaşayan azərbaycanlıların taleyi ilə elə də ciddi şəkildə maraqlana bilmədi. Eyni zamanda da azərbaycanlılar yaşayan ölkələrdə soydaşlarımızın problemləri qaldırılanda bu bizim ölkə ilə münasibətlərin kəskinləşməsinə gətirib çıxarırdı. Burada bir çox incə məqamlar vardı. O zaman Türkiyə və digər türk ölkələri ilə danışıb Borçalıda, Dərbənddə və soydaşlarımızın tarixən kompakt yaşadığı yerlərdə türkçülüyün təbliğatını qura bilərdik. O vaxt Azərbaycanın başı öz problemlərinə qarışdığından, İran fürsətdən istifadə edib soydaşlarımızın içinə sızmağa, öz zərərli təbliğatını aparmağa başladı. Bu problemin Dərbənddə mövcud olduğu istisna deyil, amma hələ oradan hər hansı bir səs gəlmir. Rusiyanın digər bölgələrində yaşayan azərbaycanlıların müəyyən bir hissəsi isə İranın təbiğatına uyub...
Bizimkilər indi ayılıblar, halbuki, Gürcüstanda, Borçalıda yaşayan soydaşlarımızın içinə İran çoxdan daxil olub. Orada sələfilik, vəhabilik də yayılıb. Amma bu cüzidir. Digər tərəfdən, şiəlik adı altında əsasən İran erməniləri Borçalı türkləri arasında din pərdəsi adı altında zərərli ideologiya təbliğ edirlər.
Rusiya sülhməramlılarının Qarabağa buraxdığı 14 nəfər İran vətəndaşı həmin ermənilərdir. Onlar cildini dəyişib Marneulidə mədrəsə açıblar, onların əksəriyyəti Livan, İran, Suriya erməniləridir. Bu adamlar orada anti-Azərbaycançı insanlar yetişdirirlər. Nəinki Borçalıda yaşayanlar, hətta əslən Borçalıdan olan və Bakıda yaşayan soydaşlarımız var ki, elə bir dərəcədə İrançıya çeviriliblər. Bu şəxslər İranın əleyhinə danışanlara sərt reaksiya verirlər”.
T.İrfanın sözlərinə görə, İran öz zərərli təbliğatını Gürcüstanın azərbaycanlılar yaşayan bölgələrində həyata keçirməklə azərbaycanlıları Azərbaycana düşmən olaraq yetişdirmək istəyir. O vurğuladı ki, fars-molla rejiminin əsas məqsədi Azərbaycan dövlətini dağıtmaq, bütün dünyadakı müsəlmanları parçalamaq və öz rejimini bərqərar etməkdir. “İranın bütün bu təxribatları Sasani imperiyasını dirçəltmək məqsədi daşıyır. Çox təəssüf ki, dünyada çox adam hələ də İrandakı rejimin “İslam dövləti” olduğuna inanır. Guya İran müsəlman ölkəsidir, guya oradakı insanlar müsəlmandır…”
Bu gün İranın Borçalı türkləri arasına sünni-şiə nifaqı saldığını deyən ekspertin fikrincə, camaat qohumluq, eloğluluq bağlarına sadiq qalsa da, molla rejimi yenə də bu məsələni körükləyir, qızışdırır.
T.İrfan təəssüflə qeyd etdi ki, molla rejiminin Gürcüstanda yürütdüyü siyasət çox təhlükəlidir, bu, Gürcüstan dövlətinə də, Azərbaycan dövlətinə də ciddi təhdidlər yaradır. “Bilmirəm günahkar kimdir, kimi ittiham edim, amma bu sahədə çox ciddi boşluqlara yol verilib, özümüzün dini ideologiyamız İranın xeyrinə artıq əldən gedib. Gürcüstandakı azərbaycanlılar da bu gün İran ideologiyasının qurbanıdır, Azərbaycanın özündə də bu ideologiyanın qurbanları var. Gündə beş adamla rastlaşıram, onun üçü İrançıdır…”
Bu gün həqiqətən də İran təsirinə uymuş borçalıların, eləcə də Azərbaycandakı insanların bu yanlış, ziyanlı ideologiyanın təsirindən xilas olması üçün işlər görülməli olduğunu deyən ekspert hesab edir ki, əks halda vəziyyət daha da gərginləşəcək.
Əli TURABOV
